فكر تاني

[سعدالشرقاوى]

انت منايا وروحى ياعمرى
عايش على حسّك طول عمرى
يبقى معانا (طارق العمرى )
وانت ياعلوه ماتقوليّش

ح ارجع اقول ويّاكم تانى
واحجز دورى وتستنـّانى
ياللى كلامك كله معانى
حبيبى ياعمرى ماتسبنيش

[علاء طه ياسين]

حبيبي .. أبو مدحت
سعد الشرقاوي

وانت حبيبي وسهمك راشق
وهاحبك لو حتي تفارق
أيوه معانا الأستاذ طارق
ومنور علي كل أفيش
....
هاستناك واقعد واحكيلك
بس تعال وقول مواويلك
يا بومدحت يا فلتة جيلك
هتزعلني لو متجيش
...
وانا عمري ما هاسيبك واصل
رغم الجاري ورغم الحاصل
واذا موتنا برضك هنواصل
نكتب عن حبنا تناتيش

علاء

[سعدالشرقاوى]

ياحمدى يااسمر فين بيلسان
ونخلط ليبيا فى السودان
وييجى كلام من كل مكان
يملى الدنيا وماتكفيّش

عند علاء نتجمع دغرى
واللى يشوفنا علينا ح يجرى
شمس الحب بتطلع بدرى
والكلمه الحلوه بتعيش

ودعوه لكل حبايب لينا
ونتشرّف بيهم عندينا
واللى ح يزعل من اغانينا
ح نقول له خليّك ماتجيش

[علاء طه ياسين]

يا حبيبي وجهت الدعوة
اعمل لنا بقي شاي مع قهوة
بس اوعاك تهرب علي سهوة
وتجيب لنا في القعدة شاويش

نفسي الكل معانا يشارك
مش نتخانق ولا نتعارك
مش ناقصة ع الكلمة معارك
وخناقة وضرب وتلطيش

عاوزين نتكلم ع الحب
شمس الدنيا وهبة الرب
وتَلاقي بين قلب وقلب
فيهم ثورة وفيهم طيش

لكن يا بومدحت يا أصيل
عاوزين منهم كل جميل
يبقوا نسايم غاوية تميل
ويا الشوق وتروح متجيش

ياسين