مفيش أحلام بتدوم

**علاء طه ياسين** · #1 26/06/2009, 14h34

مش هابقا مجرد سكة
تمشيها ف ليلة ويوم
ولا ضحكة ساعات تضحكها
لو كنت ف يوم مهموم
...
مش هافضل دايما ساكته
ولا هابقا الصورة الباهتة
اللي هتصعب علي قلبك
لو تصادفها ف ألبوم
...
مش هابقا حاجات تكتبها
والهامش يبقا نصيبها
وان مرة عاتبتك تزعل
وتعاتب أوي .. وتلوم
...
مش هافضل كده قدامك
نجماية ف ليل أحلامك
قلبي يقاسمك ف آلامك
ومن الأفراح محروم
...
وان كان علي وعدك ليا
أهو كان أحلام وردية
راح تبقي ف يوم منسية
ومفيش أحلام بتدوم
....

**أبوعبدالرحمن** · #2 26/06/2009, 14h46

الله الله الله
على الشخصية القوية
التى لا تعير للآخر أى من صور الإهتمام
النفسى والأحاسيس المتبادلة
رائع أخى الحبيب
سلمت أحرفك الذهبية
لك خالص تحياتى وتقديرى وإحترامى

**سعدالشرقاوى** · #3 26/06/2009, 16h33

الشقيق الغالى/علاء طه
مش هابقا مجرد سكة

تمشيها ف ليلة ويوم
ولا ضحكة ساعات تضحكها
لو كنت ف يوم مهموم
...
مش هافضل دايما ساكته
ولا هابقا الصورة الباهتة
اللي هتصعب علي قلبك
لو تصادفها ف ألبوم
...
مش هابقا حاجات تكتبها
والهامش يبقا نصيبها
وان مرة عاتبتك تزعل
وتعاتب أوي .. وتلوم
...

يعنى بابو اكلام ع الكيف
تنسى الحبايب كيف
حارمنا يابو علوه من الكلام الجميل ده
وقلبك جمد علينا
وجاى كمان مش عاجبك
وان مرة عاتبتك تزعل
وتعاتب أوي .. وتلوم
ربنا يخليك لنا يابوياسين
ياغالى
مانسيبش الدنيا ضلمه
فى بعادك ياحبيبى
مطمّن مانتا عارف
انك قدرى ونصيبى

**علاء طه ياسين** · #4 26/06/2009, 18h02

الشاعر / أبوعبدالرحمن
شاكر ليك مرورك والرد الجميل ..
وعلي فكرة
الشخصية القوية هي اللي تكسب في الحب ..
اللي مش يحبني زي ما أحبه وأكتر ..
ميلزمنيش ..
صح ؟؟
تحياتي ..
ودمت يالغالي بخير ..
علاء

**علاء طه ياسين** · #5 26/06/2009, 18h17

وحشتني جدا جدا يا سعد يا شرقاوي
والمشاغل الشخصية بعدتني عنك اليومين اللي عدوا
وحشتني ردودك
ووحشني كلامك
وكلك علي بعضك حلو
واحنا من غيرك ولا حاجة
وعلي رأي سعاد محمد
وحشتني
عدد نجوم السما
علاء

**NAHID 76** · #6 27/06/2009, 17h01

بسم الله الرحمن الرحيم
الشاعر الغنائى علاء يا سين
ولا موجه صبحت بعد الليل
لقيت فى حضنها نفس الشط
تحياتى

**Tarek Elemary** · #7 27/06/2009, 17h59

اقتباس:

المشاركة الأصلية كتبت بواسطة علاء طه ياسين

مش هابقى مجرد سكة

تمشيها ف ليلة ويوم
ولا ضحكة عنيك تضحكها
لو كنت ف يوم مهموم
...
مش هافضل دايما ساكته
ولا هابقا الصورة الباهتة
اللي هتصعب علي قلبك
لو تصادفها ف ألبوم
...
مش هابقى حاجات تكتبها
والهامش يبقا نصيبها
وان مرة عاتبتك تزعل
وتعاتب أوي .. وتلوم
...
مش هافضل كده قدامك
نجماية ف ليل أحلامك
قلبي يقاسمك ف آلامك
ومن الأفراح محروم
...
وان كان علي وعدك ليا
أهو كان أحلام وردية
راح تبقي ف يوم منسية
ومفيش أحلام بتدوم
....

لونك و عليك بيليق
و الكلمة بتطلع منك
فى الحر تبل الريق
وموسيقى بتلبس فنك
باسعالها لما تضيق
تتبسم و تنوب عنك
أغانيك و الاقيلها بريق
و لوإنى بعيد و كأنك
أخ قريب و شقيق
و إنت و عم الشرقاوى
دويتو ف أحلى فريق

**علاء طه ياسين** · #8 28/06/2009, 07h40

الرائعة المدهشة التي أقبلت بعد غياب
مدام / ناهد

فيه بيتين شعر كنت قريتهم زمان مش عارف مين كاتبهم ..
بيقولوا ..

فيه ستات روايحهم طيب
يتحطوا ع الجرح يطيب
(دول إنتي أولهم)
وفيه ستات لو يوم بصوا لك
كان ارحم لو أكلك ديب
(دول ربنا يبعدهم عننا)

وحشتينا يا ست الكل ..

علاء

**علاء طه ياسين** · #9 28/06/2009, 07h52

الأخ الكبير / طارق العمري

أقدم لك هذا الالتماس برجاء الموافقة عليه

أرجو من سيادتك الموافقة علي الانضمام للدويتو سعد الشرقاوي
وعلاء ياسين
لتصير ثلاثية رائعة
ولك الشكر والتقدير
......................
وياطارق إنت حبيبنا
ودليلنا ف كل طريق
معتز أنا جدا بيك
أكتر من أخ شقيق
لكن عاوزك ويانا
تشاركنا ف فرحة وضيق
موجة مشتاقة لموجه
وصديق يسند ف صديق
ايه رأيك تبقا معانا
وافق من غير تحقيق !
احنا بنحبك جدا
يابو قلب بريء ورقيق

علاء

**سعدالشرقاوى** · #10 28/06/2009, 14h51

شقيقى الاستاذ/علاء طه ياسين
لازم ح يخش معانا
ويضيف طعم الاحساس
والكلمه اللى ح نقولها
تقدر توصل للناس
لازم تستنىّ قراره
يؤمر ع العين والراس
العمرى صحيح استاذنا
وبتحبّه جميع الناس
والكلمه الغاليه مانرضه
نوزنها بدنية ماس
والقلب يشوفكم دايما
الاقيه بيشع حماس
فى انتظاركم