ياقلبي يا مليان هوي وتنهيدات
وشايل غناوي وشوق وحكايات
وست البنات الرقيقة .. بعيدة
وبرضك غاويها لحد الممات
يا قلبي اللي فالت عياره وطايش
عشانها انت عايش وبيها انت عايش
وتغزل لها الشمس دبلة وغوايش
ولكن لقاها من الممنوعات
يا قلبي ودايما طريقك طويل
تغامر وتمشي بدون الدليل
وترجع قتيل الهوي المستحيل
ودمّك يغرق جميع الجهات
يا قلبي الخجول البريء الحنون
بتسرح وتحلم ف لحظة جنون
وتمضي حياتك ف غربة وظنون
وآهه بتسحب وراها آهات
يا قلبي اللي دايما بتنـزف وجودك
وترسم ملامح جديدة لحدودك
وضحكة وطلة بتهدم سدودك
ورقة مشاعرك بتنطق سكات
بتعطش لغيرك ومنتش أناني
وتنسي مكانك وتنسي مكاني
أجيبك ولكن تتوه مني تاني
مابين حلم واقف .. وبين حلم فات
يا قلبي يا مليان هوي وتنهيدات
وشايل غناوي وشوق وحكايات
وست البنات الرقيقة .. بعيدة
وبرضك غاويها لحد الممات
علاء ياسين
غناوي .. وشوق .. وحكايات
العرض الشجري