قلبي علي طرف الطرحة
إنسانة إنتي .. وانا إنسان
والحب مش محدود بمكان
وانا يا بنت الناس عاشق
مهما أخبي الحب يبان
بأحلم وبأسرح وبأحسك
وقلبي يرقص علي حسك
وأخاف من النسمة تمسِّك
وتصحي رمشك دَا النعسان
أنفاسك الحلوين طارحة
أشواق ومغزولة بفرحة
قلبي علي طرف الطرحة
عايش معاكي بقاله زمان
عاشقك ف غيبي وف حضوري
يا حلم شارد في سطوري
جاي م الزمان الأسطوري
ومن حكاوي كان ياما كان
من غير شبك قلبي اتْشَبّك
وقعني في الحب وحبك
وضحكتك غاوية تْحَبِّك
عقدة هوي ف قلبي الخجلان
غني علي الجسر العالي
وتعالي يا حبيبتي تعالي
تعالي وبـلاش تتعالي
يمكن نلاقي بر أمان
علاء ياسين
|
العرض الشجري