محمد قنديل .. في ذكراه نتذكر أجمل أغانيه ( 2009 )

[هامو]

إضغط هنا
المذيع الراقي mokhtar haider
يتحاور مع القديرمحمد قنديل




mokhtar haider
مختار حيدر

من أجمل ما سمعت من المقابلات الإذاعية
مع القدير محمد قنديل والحوار الممتع
والمذيع الراقي صاحب الصوت الرخيم مختار حيدر
أترككم تستمتعو زي ما انا استمتعت في المقابلة
يا غالين علية يا اهلي بجاية الجزائرية جميلة يا عزيزي مختار بصوتك

[M O H A M E D]

المشاركة الأصلية كتبت بواسطة هامو

إضغط هنا
المذيع الراقي mokhtar haider
يتحاور مع القديرمحمد قنديل


mokhtar haider
مختار حيدر

من أجمل ما سمعت من المقابلات الإذاعية
مع القدير محمد قنديل والحوار الممتع
والمذيع الراقي صاحب الصوت الرخيم مختار حيدر
أترككم تستمتعو زي ما انا استمتعت في المقابلة
يا غالين علية يا اهلي بجاية الجزائرية جميلة يا عزيزي مختار بصوتك

يااااااااه يا مدام هامو ... الحوار ده بعتز بيه جداً .. و هو ده اللي نقدر نقول عليه " لقاء السحاب "
أعز الأحباب .. مختار حيدر و محمد قنديل .. يا سلام ع الاتنين
أستاذ مختار ترك قنديل يتكلم براحته .. و واضح إن عمنا قنديل كان مرتاح للكلام مع عمنا مختار و مبسوط منه .. فطلع الحوار تلقائي و أظهر جوانب في شخصية قنديل .. و دا غير المعلومات الهامة اللي بيتضمنها اللقاء الغير موجودة في أي مصدر آخر

فاكر أول يوم سمعت فيه الحوار .. كان يوم جمعة ، فتحت المنتدى الساعة 8 الصبح وجدت الحوار .. و كانت مفاجأة !
ظللت أسمعه طول اليوم مع أغنية ( كل ما تفكر في فكرة ) و ( هواك أسرار ) و لا أقوم إلا للصلاة .. و مش عايز أقول لكم بكيت يومها قد إيه !.. و خصوصاً لما قنديل غنى ( هواك أسرار ) و اتكلم عن هواياته و غنائه للبغبغان
و اكتشفت على الساعة 2 بعد منتصف الليل إني لا فطرت و لا اتغديت و لا اتعشيت

[هامو]

انا لي طلب منك عزيزي محمد السلاموني
يا ريت تصدق التسجيل كتابيا وتنشرو هنا بسماعي
دا معلومات هامة موجود فيه
علشان في ناس بتحب تقراء اكتر من سماعها للتسجيل
يا ريت يتحقق لو انت مش عايز قوللي ممكن انا اتفرغله
لكن انا اكيدة انه حتقبل

[M O H A M E D]

والله فكرة هايلة يا مدام هامو
و ان شاء الله أخصص موضوع لكتابة كل حواراته الإذاعية
خصوصاً مع المعلومات الخطأ الكتيرة الموجودة في كل المقالات عن قنديل !
و اللي بتنتشر و تتنقل بسهولة من موقع لآخر ، و ما أسهل copy >>> paste !
إن شاء الله أبدأ في أقرب فرصة .

،،،،،،،،،
و بمناسبة أبو سمرة السكرة ، بما إنك بتحبيها ..
قنديل بيقول فيها : النهاردة فات و عدى و الا لسه يا ترى ؟
الجملة دي حيرتني .. و فكرت في معناها كتير و وصلت لكذا تفسير :

* أول تفسير ورد في بالي إن المقصود هو اليوم .. من كتر ما هو مبسوط و في حالة مزاجية عالية بسبب رؤية حبيبته فلم يعد يشعر بمرور الوقت و هل اليوم انتهى أم لا .. و بصراحة ما اقتنعتش بالتفسير ده

* التفسير التاني إن المقصود هو " أبو سمرة " و ليس اليوم .. و كأن قنديل في انتظاره محبوبته طول اليوم تمر من أمامه .. فبيسأل هل عدت و الا لسه ؟ يعني كإنه قاعد على قهوة مثلاً منتظر مرورها ... فبيسأل يمكن ما خدش باله و هي بتعدي من كتر التفكير فيها !

* التفسير التالت .. إن المقصود هو اليوم لكن بيسأل لإنه عارف مواعيد مرور حبيبته و اللي لسه ما ظهرتش .. فبيسأل هو اليوم فات و بالتالي فات معاد مرورها !

ده اللي قدرت أوصل له و برجح التفسير التاني ... و الا حد عنده تفسيرات تانية ؟؟

[Islam Eidrisha]

وهل ثمة تفسيرات تركت لنا بعد تفسيرك يا سلاموني؟!
لاريب بأن التفسير الثاني هو الأقرب للمعنى الصحيح الواضح
فمحورنا هنا هو انتظار أبو سمرة السكرة بطلعته المنورة
ولا يمكننا في هذا الموضع أن نغفل جماله أيضا من حيث المعنى
استمروا يا عشاق القنديل فحتى الآن لم نستنير إلا بالقليل من نوره وما خفي سيكون أجمل وأعظم

[MOHAMED ALY]

و من عجائب ما سمعت من فن الغناء القناديلى هذه الأغنية العاطفية من كلمات عبد الفتاح مصطفى و الحان أحمد صدقى .. و فيها يغنى قنديل بلسان حال عاشق صادق الود عفيف المقصد بعيدا عن النوح و الولولة و لطم الخدود ... و كيف أنه اكثر ما يراه جميلا فى محبوبه صدق الود و العطف و الوفاء ... معان لم يعد لها مكان فى زمن العولمة .

همسة الود

همسة الود الــــــرقيقة
علمت قلبى الحقيـــــقة
الجمال مش ورد خدك
مش عيونــك و لا قدك
الجمال عطـفك و ودك
يا حبيبى

كنت أفكر فيك بعيـــــــــنى مش بقلبى
و اسمعك يشغلنى صوتك عن كلامك
كنت افكر
كنت أفكر إن شــــــــــــوقى هو حبى
و إن قربك هو غايتى من غـــــرامك
كل يوم تهــــــــــدينى من قلبك هدية
كل يوم المح فى حبك شـــــــئ جديد
تبقى جنبى و ابقى شايفك بين ايـــديا
و انت عالى و السمــا دايما بعــــــيد
همسة الود الــــــرقيقة
علمت قلبى الحقيــــقة
الجمال عطفك و ودك
يا حبيبى

كان غرامى للعــــــيون الحــــــــلوة ديه
و لرمــــــــوشها لما تسجد ع الخـــــدود
شفت اجمل من الجمال عطفك علـــــــيا
شفت ودك اغلى عندى من الوجــــــــود
يا دارى بى و قلبى يمكن مش دارى بى
قول لى اعمل ايه لو انت قسيت علـــــيا
الزمان مش وافى زيك يا حــبــيـــــــبى
نفسى تقسى شوية و اتــــــألم شـــــــوية
همسة الود الــــــرقيقة
علمت قلبى الحقيــــقة
الجمال عطفك و ودك
يا حبيبى

همسة الود الــــــرقيقة
علمت قلبى الحقيـــــقة
الجمال مش ورد خدك
مش عيونــك و لا قدك
الجمال عطـفك و ودك
يا حبيبى

[M O H A M E D]

همسة الود ... إبداع من عمنا عبد الفتاح مصطفى الذي كتب فيها عن الحب الناضج .. المتزن بين القلب و العقل
فالإعجاب بالمظاهر و الجمال الحسي يزول أما المشاعر الطيبة و حسن المعشر و المودة هي ما تضمن استمرار العلاقة
فكما قال الله تعالى " و جعلنا بينكم مودةً و رحمة " فالمودة و الرحمة هما الأساس
و كم من زيجات فاشلة بسبب تجاهل هذا المعنى .. و الانسياق وراء الصورة المبهرة التي يرسمها خيال العاشق دون تفكير أو وعي لحقيقة الحياة !

فها هو المحب و قد اهتدى لسر الجمال الحقيقي ...
الجمال مش ورد خدك
مش عيونــك و لا قدك
الجمال عطـفك و ودك
يا حبيبى
فقد يبدأ الحب بإعجاب ظاهري :
كان غرامى للعــــــيون الحــــــــلوة ديه
و لرمــــــــوشها لما تسجد ع الخـــــدود
لكن لو توقف عند الحد لما استمر .. فالجمال زائل كما قال حسين السيد في أغنية ( عاشق الروح ) : و عشق الروح مالوش آخر لكن عشق الجسد فاني
و زهرة الحب تعيش بحسن المعاملة و العطاء المتبادل و المودة و الوفاء و إلا ذبلت و ماتت :
كل يوم تهــــــــــدينى من قلبك هدية
كل يوم المح فى حبك شـــــــئ جديد
....

الأغنية بها الكثير من الجماليات في الكلمات أعجبني جداً هذا المعنى : و اسمعك يشغلنى صوتك عن كلامك
و هذا ما يحدث معي أحياناً عندما أستمع لقنديل في بعض أغنياته .. أنشغل بصوته عما يقول و كأنه تنويم مغناطيسي
طبعاً في هذه الأغنية أبدع أحمد صدقي في صياغة اللحن .. و أحمد صدقي عندما يلحن لقنديل فإنه يسافر معه إلى مناطق غير مسبوقة في سماء الطرب
و من ألحانه لقنديل : ع الدوار / أحببتها / أمانة يا نجم / من زمان / سماح / ممكن / خد التفاح / رمش الغزال/ تحت ليل الكحل و غيرها من الأغنيات و الكثير من الصور الغنائية و البرامج الإذاعية كـ سوق بلدنا التي بها المقطع البديع حلاوة زمان .

[M O H A M E D]

المشاركة الأصلية كتبت بواسطة MOHAMED ALY

صدق الود و العطف و الوفاء ... معان لم يعد لها مكان فى زمن العولمة .

و عن هذا المعنى .. و عن سطوة المال و المادة أما القيم و المعاني النبيلة غنى قنديل من كلمات أحمد شفيق كامل و ألحان محمد الموجي ...

يا دي العجب

يا دي العجب .. رخص الدهب .. في السوق يا ناس
يا دي العجب .. رخــص الدهب و غِلي النحــــــاس
إزاي .. إزاي .. إزاي يـــا نــاس ؟!

***

يا حــب هانـــت ع النـــاس غلاوتك
في الليـــل و تــــاهت منهم حــلاوتك
نزل المجيــدي في الســــوق و خانك
تقـــــل ميــــــزانه و شال ميـــــزانك

***

يا حــب سيبــــك م النـــاس و مـالهم
يا حـــب مالنـــــــــا إحنـــــا و مالهم
المــــال دا قشـــــرة و انت الجواهـر
كـتـر في إيــدهم و انـت اللي نــــادر

***

الله علينــــا الله يــــــا حـــــــــــــب
الله علينـــــــا يـا روح و قلـــــــــب
خــداع يا مــــــالهم خــــداع يا مال
خــداع يا زايــــل في إيديـــن زوال
تطــــول يا عمـــري إن دق قلبــــي
و فـ كــــل دقــــــة حيــــــــاة بتغلى
و إيه ح تعمــل يا مـــال و تسـوى ؟

اضغط هنا للتحميل