بعض الذكريات

**علاء طه ياسين** · #1 27/05/2009, 17h25

كان ياما كان ..
عيدان الدرة في الغيطان عالية .. والجو حرارة .. وكأن جهنم فتحت باب من بيبانها .. وعاوزين نجيب كام قنديل درة نشويهم .. ومفيش علي الجسور صريخ ابن يومين .. بس فيه عفريت القيالة .. العفريت اللي مكانشي يطلع إلا علي الجسور التراب اللي وسط الغيطان .. مكانشي فيه جسور مرصوفة أياميها .. عفريت القيالة ده مكانشي يطلع إلا في عز الضهر .. غتاتة بقا ..
وكنا نلم بعضينا شوية عيال اصحاب .. ونشجع بعض .. ونمشي علي الجسر واحنا حافيين .. كانت حالتنا علي قدها .. الفقر والحياة الجافة .. والتراب كان سخن بيلسع ..
نمشي واحنا خايفين من صاحب الغيط ومن العفريت .. وندخل جوه غيط الدرة .. ونبدأ نقطع القناديل .. ولما كانت أي نسمة هوا تلعب في عيدان الدرة .. تميل العيدان علي بعضيها وتعمل صوت .. كنا نطلع نجري وكأن فيه مليون عفريت بيجروا ورانا ..
وطبعا الأخد بالتار كان بيكتر في الأيام دي .. فالبندقية اللي مترصدة .. تلاقيها مدارية ورا عيدان الدرة .. واللي عليه العين راجع من الغيط قرب المغارب .. مش داري باللي مخبياه الأقدار .. مع إنه بيكون حذر جدا .. وفجأة يطلع الطلق الناري المكتوم .. يعني العيار صايب .. وتنقلب البلد .. وتتقلب المواجع .. وتسمع العدودة أو البكائية الجنائزية ..
كنت فين يا وعد يا مقدر
كنت ف خزانة وبابها مِسَتَّر (أي : مستور ومغلق)
وقت الطلوع طلعوا عُزاز وملاح
وقت الرجوع رجعوا علي الألواح
وبعد طلوع الجنازة .. أهل القتيل يشكروا الناس اللي طلعت ورا الجنازة .. وميخدوش عزا .. دليل علي إنهم ناويين ياخدوا التار .. ومتشكرين يا جماعة واجبكم وصل .. وكأن العز معقود علي طلقات الرصاص .. ولو كملت ذكريات الطفولة هيبقي ليا رجوع للتار .. والندب (العديد) .. وكيف كان الناس في مناطق العداوات والتارات اللي في الصعيد الجواني .. ورثنا من النيل الطيبة والوداعة .. وورثنا من الجبل القسوة ..
وكان ياما كان ..
ليالي الصيف وحرارة خنقة .. ماكانشي عندنا تكييف ولا حتي مروحة .. مكانشي فيه كهربا أصلا .. كانت الكهربا بتاعتنا لمض غاز .. وكنا ننام علي سطوح البيت .. نبص للنجوم ونعدها ونعرف أماكنها .. وكان فيه شجرة كافور عاليه جنب البيت .. نستني منها شوية هوا ييجوا فالواحد فينا ينعس .. وكانت جدتي مليانة بحواديت .. كانت دايما لما تبدأ تحكي تقول كان ياما كان .. ولا يحلي الكلام إلا بذكر النبي عليه الصلاة والسلام .......... وكانت حب الرمان حلوة .. جل الله فيما خلق .. وأسرح انا .. وبعدين يا جدة .. وبعدين قاله عايزك تبني قصر طوبة فضة وطوبة دهب .. واسرح أكتر .. وتروح جدتي تقطع الحدوتة .. وتنادي علي أمي .. وتقولها حوطتي البيت .. فتروح أمي تكلم أشياء مش موجودة .. وتقول مرتين تلاتة .. حابس حابس .. تحت الحيط يابس .. اللي فهمته وقتها إن كلامها ده بيبعد أي تعبان أو عقربة من إنها تقرب من البيت .. أو من أي حد من اهل البيت .. وخلاص نعنست .. بقيت فيه مسافات كبيرة بيني وبين الصحيان .. وصوت جدتي كأنه جاي من بعيد .. توتة توتة .. خلصت الحدوتة .. مش عارف جدتي كانت بتجيب حكاياتها الحلوة الكتيرة دي منين ... ولا غناويها اللي دايما كانت حزينة .. أفتكر منها ..
توب الحرير يا زبيدة شبك في النَبَقَةْ .. (شجرة النبق)
قطع النبق واصحابه .. خلانا بقينا غُرَبَا (أغراب)
ولا عديدها .. كان لها أخ مات مقتول .. كنت دايما أشوفها لابسه السواد .. لغاية ما ماتت .. حزينة علي أخوها .. كانت لما تفتكره تعدد .. والله والله العظيم .. تسمع نغمة العديد والكلام اللي يوجع .. متملكشي نفسك أبدا من البكا ..
وكنت فين يا وعد يا مكتوب ..
كنت ف خزانة وبابها مردود ..
وكانت الله يرحمها دايما تقول .. الدنيا ليها أول وآخر .. صح يا جدتي ..
وكان ياما كان ..

علاء ياسين

**NAHID 76** · #2 27/05/2009, 17h56

بسم الله الرحمن الرحيم
الاستاذ علاء
كان يا مكان شيئ جميل يفكرنا بليالى زمان
وأزاى الحياه كانت بسيطه والناس عايشه
ويمكن تعمل سلسله كان يا مكان وكل مره تشرح قضيه
من خصائص اى بلد يعنى يمكن من بحرى من الصعيد من القاهره عن الشراقوه وهكذا وتسميها سلسله كان يا مكان وكل مره تعرض وتلقى الضوء على موضوع مختلف
نستفيد منه ونرجع ليالى زمان
تحياتى وسلم قلمك

**علاء طه ياسين** · #3 27/05/2009, 18h17

والله يا أخت ناهد كلامك عجبني .. وفعلا ليه مش نخصص سلسلة لكان ياما كان .. ونتناول فيه قضية معينة في كل مرة نرجع بيه لأيام زمان .. مرة التعليم .. مرة الشهامة والأصالة .. مرة التقاليد والعادات ..
والله انتي بتاخدي بايدنا لقضايا مهمة .. وتخلينا نكتب عنها .. مع إننا مش كنا مهتمين بالقضايا دي واصل ..
شكرا لنصايحك .. وجاري تعديل الأوضاع ..
علاء

**سعدالشرقاوى** · #4 27/05/2009, 18h25

ابو علوه
انت شغّال فى الصنف واللا ايه
قصص واللا اشعر
واللا الاتنين
الكلام عايزين نسمعوه غناوى
متخرّطه زى السلطه
مهى كات ست كبيره وعاقله وهيّا ياناس نوّارة الـــــــــّدار
تخرم ودن البـــــــنت بابره شالتها ف شق فى قلب جدار
,,,,,,,,,,,,,
تصحى الفجر تمللىّ تصلىّ وف حلتها تخض السّمنه
وتتوه فــــــــينا لو تنادينا ولا الابنودى وعمّتو يامنه
,,,,,,,,,,,,,,
هات اللى عندك كلهّ حلو
لانك على بعضك حلو

**علاء طه ياسين** · #5 27/05/2009, 19h16

عم سعد الشرقاوي
دا انت اللي كلك علي بعضك حلو يا عم سعد .. وانا بأحاول أوصل العالم بتاعي ليكم .. يمكن بأخبط .. يمكن بأعبط .. بس في النهاية أتمني انه يكون كلام حلو .. يسعد اللي يقراه ..
شكرا ليك خالص يا أبو الكرم
علاء

**Tarek Elemary** · #6 28/05/2009, 07h35

إسمع يا واد يا علاء ...
كلامك جميل و لديك مخزون حلو و محبب للأذن و جديد على ناس كتير أنا منهم
مطلوب منك تعمل موضوع واحد (مشاركة واحدة) تسميها يوميات ياسين .. نافذة على الصعيد .. هنا وجه قبلى .... اللى يعجبك
و تجمع كل الذكريات دى فى هذا الموضوع
و لكن .....
خللى بالك من لكن دى
الفقر مش عيب .... اكتب عنه ما يحلة لك
السرقة عيب .... و فيه صغار و يافعين يدخلون المنتدى يبقى لازم نكون على قدر مسئولية تكوين شخصياتهم و ثوابتهم
يعنى مش لازم كنا بنسرق ذرة ممكن نلف حول الموضوع (كان معنا إبن صاحب الغيط مثلا بس خايف من ابوه) الفكرة وصلت و لم تغير من أصل الموضوع بس بشكل غير مخجل أخلاقيا ....
طبعاً فهمتنى

**فؤاد** · #7 28/05/2009, 07h54

الله
ياأستاذ علاء
الله عليك
ذكرتني بأيام .... شى 25 سنه أو 30
من هالشى
لكن أحنا كان عندنا البلح مش الذره
كنا بنلف حوالين النخل علشان البلح
والعفريت اللي في القايله
تتصور ياأستاذ علاء
انا لدلوقتي بحب أمشي في عز القايله وشرط أن أكون بعيد لوحدي
وفي عز الظهر كمان
ذكريات حلوه
وأنت أحلي ياأستاذ
علاء
حواديتك وكلامك حلوووووووو

**فؤاد** · #8 28/05/2009, 07h56

اقتباس:

المشاركة الأصلية كتبت بواسطة سعدالشرقاوى

ابو علوه

انت شغّال فى الصنف واللا ايه
قصص واللا اشعر
واللا الاتنين
الكلام عايزين نسمعوه غناوى
متخرّطه زى السلطه
مهى كات ست كبيره وعاقله وهيّا ياناس نوّارة الـــــــــّدار
تخرم ودن البـــــــنت بابره شالتها ف شق فى قلب جدار
,,,,,,,,,,,,,
تصحى الفجر تمللىّ تصلىّ وف حلتها تخض السّمنه
وتتوه فــــــــينا لو تنادينا ولا الابنودى وعمّتو يامنه
,,,,,,,,,,,,,,
هات اللى عندك كلهّ حلو

لانك على بعضك حلو

وحياة الله
حتي أنت حلو ياأستاذ
سعد ياشرقاوي

**سعدالشرقاوى** · #9 28/05/2009, 07h57

ياعم علاء نصيحه لوجه الله
اللى يخوّف الحقيقى هوّنفسه الاستاذ/طارق
مش الجماعه اللى بيتكلم عنهم
لانه يستطيع ان يسرق القلوب
ح يعجز فى دول ؟هوّعارف الباقى

**علاء طه ياسين** · #10 28/05/2009, 13h16

الأساتذة الكرام .. فؤاد عبد الحميد .. سعد الشرقاوي .. مدام ناهد ..
كلامكم أخجلني وأسعدني جدا .. ويارب أكون عند حسن الظن .. ونكمل حكاوينا .. فلكم كل الشكر .. وانتظروا القادم إن شاء الله ..
علي فكرة يا أستاذ فؤاد الحدوتة اللي جاية عن العفاريت .. قول بسم الله الرحمن الرحيم ومتخافشي ..
أما عمي طارق بقا .. فانت بصراحة رائع وانا بجد باستفيد منك في كل مرة ترد عليا .. وكفاية كده لأنك بتزعل من المدح .. وانا هأعمل يوميات ياسين زي ما قولت .. وربنا الموفق ..
علاء ياسين