الشاعر .... جمال بخيت

[عصفور طاير]

قصيدة مـدد لجمال بخيت
كتبها لكل أحرار مصر المناوئين للتردي..

باموت يا مصر المتباعة
باموت يا مصر المنهوبة
شمسك تسير عكس الساعة
والعين عالعمى مغصوبة
الصفر خيم على زمنك
وعروق رقابتك مطلوبة
على الحدود قتلوا ولادك
وتقفي ساكته ومرعوبة
مدد يا هيكل .. يا ضميري
مدد يا كامل يا زهيــــري
مدد يا قاضي يا خضيري
مدد يا مكي يا زكريا
يا جورج إسحاق
يا مسيري
يابسطويسي.. يا حرية
مدد يا أجملأعصايري

مدد يا قلب الوطن الحر
مدد يا سيرة عوض المر
مدد يا ندهة كمال خليل
مدد يا حلم ندى القصاص
مدد يا خط رؤوف عياد
شقيان وماشى بكل عناد
مدد يا قمح سكينة فؤاد
مدد يا بنت يا مصرية
يا جميلة يا أخت بهية
مدد يا شعر العامية
مدد يا صاحبى اللي قاسمته
مدد يا علم اتعلمته
من عم عودة وصدقى عزيز
شباب لبس وش العواجيز

مدد يا سورة إخلاصي
مدد يا خويا وتاج راسي
يا معصراوي .. ياحسيني
مدد يا ست نهى الزينى
يا فجر صبّح على عينى
صالح ما بين نفسى وبينى
وقاللى دى الست القاضية
كشفت عن الالوان زيفها
وخلت الورده الزاهية
تعيش على وش خريفها

مدد يا فادى يااسكندر
على خطى محمد الاشقر
على طريق ابن أبوعيطة
جمع مظاهراتنا مشاعر
ويغير من الهتافات شاعر
يحفظ ديوان لأمين الديب
يلاقى شعب كأنه أديب
عندك فى شعره
بلاد.. تقاسيم
عندك حجازى
وعمرو سليم
والنكته بوزارة تعليم
**
باموت يا مصر المتباعة
باموت يا مصر المنهوبة
شمسك تسير عكس الساعة
والعين عالعمى مغصوبة
مدد يا وائل ويا عيسى
مصر الشباب عالترويسة
فضحوا الوحوش السعرانة
أكلتنا جامع وكنيسة

مدد يا وائل ويا عيسى
مدد يا غد ويا كفاية
أبو العلا .. ماضى.. معايا
ف طريق ما يعرفش نهاية
إلا بميلاد مصر الحرة
إلا بميلادنا ... ومددنا
وكرامة تفضل لولادنا

مدد يا آية في سورة العصر
مدد يا تمثال نهضة مصر
مدد يا فيلم صلاح الدين
مدد يا حماد .. ويا حمدين
متصدرين باسم الامة
للمجزره وقوانين سكاكين
للمبخره وقوانين زنازين

باموت يا مصر ومخنوقلك
عبدالحميد شتا مشنوقلك
ميّت عشان فرصته بتضيع
لولاد كلاب وولاد جرابيع
ثابتين على عرش فشلهم
نايمين على وش عسلهم
سرقوا الرغيف والحرية
سرقوا السياسة الخارجيه
ادوا الحرامى بنوك الوز
وادوله مصنع طعمه يلذ
وادوله فندق لجل يهز
وادوا الحديد لاولاد العز
والبورصه محشورة فى جيبهم
والسد لو كنا نسيبهم
بميته وبكهربته
بكره هايدخل فى نصيبهم

مدد يا صوت عبد الناصر
مدد يا شيخ حسن البنا
نفسى فى شىء قبل الجنة
يقوم بأه حزب وطنا
ونقضي ع اللي مسرطنّا
الليل يتوب عن كوابيسه
وأشوف فى مصر رئيس سابق
والجى ميكونش وريثه

مدد يا يحيى حسين يا أمين
بيخصخصوا الهوا والميادين
بيمصمصوا الناس والفدادين
باعوا الطريق الصحراوى
وباعوا احلام الجامعه
وهتكوا عرض الشرقاوى
وعملوا بيصلوا الجمعه
باعوا وباعوا وهايبيعوا
شيخ الوطن ولّلا رضيعه
وباعوا صوت عبد الباسط
وشهر يوليه واسابيعه
**
باموت يا مصر المتباعة
باموت يا مصر المنهوبة
شمسك تسير عكس الساعة
والعين عالعمى مغصوبة
هاتى المدد يا منى الشاذلي
لا تخافى يوم ولا تتنازلي
وصوري مصنع غزلي
ف الاعتصام العمالي
انا كنت رب العوم .. مالي؟
مقتول غريق ويا آمالي
آدي الغريق... والقاتل فين؟
مدد يا عبدالغني يا حسين
صورلي مصر المحتارة
صورلي غرقى العبارة
مالهومش حد ينجيهم
غرقوا بحاضرهم وماضيهم
البحر مفيهوش قشاية
والملح نار جوه عيونهم
وعيون بلدهم نسّاية
ومنارة الشط تخونهم

باموت يا مصر الغرقانة
باموت يا مصر المنكوبة
طعم الحياة كله إهانة
وانتي ع النيل مصلوبة
**
مدد يا بنت الإيه يا آلاء
يا حصة الوطن المشتاق
الأولى في علم التغيير
بشرى.. بألوان الطباشير
راسمه العلم في الصفحة أسير
وبتعلنى بقلب الموجوع
ان الوطن ميادين ونجوع
تعبان من الحرمان والجوع
عين المراقب .. غفلانة
عن العيون الانسانة
بنت الخمستاشر احساس
بنت الخمستاشر تفكير
بنت الخمساتشر غنوة
على وتر علم التعبير
عين الملاحظ بتلاحظ
ان العقول جوه قوالب
مفيهمش خنساء ولا جاحظ
عين المصحح مبهوتة
من الخطوط المفلوتة
المصحح: يا نهار مقندل مش فايت
مش دى الاجابه المظبوتة
اضبط يا ناظر واتصرف
الناظر: يا نهار مزفّت ومدوحس
مش دى الاجابة العلمية
شيلونى هيلا يا افندية
نوصل لحد المديرية
المدير: أنا مش مدير فى القِصّا دي
وعينيا مش شايفه قصادي
سؤالنا مفيهوش أمريكا
والبنت هى المحقوقة
وضرورى ...قطعا مزقوقة
يا اما حزب الله فى لبنان
يا اما سوريا او طهران
او المقاومه العراقية
قوموا بينا نعملها قضية

(ومن الادارة التعليمى الى الادارة الامنية)
آدي سين سؤال انطقى يا آلاء
منين عرفتى أساس الداء؟
مين بلغك ان المأمور
بيبوس فى رجلين الأعدا ء؟
مين جندك للشيوعية
ولبّسك اخوانجية؟
آلاء: أنا بنت مصر الحرية
يا ديول ديول الحرامية
سرقتوا فرحتي بشبابي
سرقتوا بهجتي بكتابي
سرقتوا من لغتىالاولى
سطور فى كشكول التعبير
خدوا منى صفر على غباكوا
وألف صفر لكل جبان
ما ذاكرش درسه عن الاوطان
بتتبني بفكر وبإيمان
بتتبني بدفتر مواليد
فيه الشهيد قبل الفنان