تحليلات سيادة الرئيس ـ أبو على

**unicorn** · #1 23/12/2008, 21h48

اقتباس:

المشاركة الأصلية كتبت بواسطة abuzahda

جــــيــــــــــــــــــــــــــل بحاله اتحرم من إبداعات حسين بيكار
وكنا زمان بنستنى "بروازه" بالصفحة الأخيرة من "الجرنان"
مابين رسم و بين خواطر ...

لو لسة عندك حاجة من شغله ، إرفعها هنا . وقولنا أخباره إيه (لسة عايش؟)

انا زيك و الله يا استاذ "سيكا" ( عشان تبطَّل تقولى يا "حمو")
كان بيتهيألى انى الوحيد اللى كنت باشترى الاخبار يوم الجمعة , عشان رباعيات بيكار
و انا فاكر انى كنت بادقق كتير اوى فى الصورة و فى الكلام
و حالة الشجن الدائمة فى رسومه و رباعياته
و باستعجب من هذا الفنان اللى بيجسد كلامه بالرسم , و دايما كنت أسأل نفسى
هو رسم الصورة الاول و كتب عنها كلامه؟؟
و لا كتب الكلام الاول و رسم صورته ؟؟

**سيادة الرئيس** · #2 24/12/2008, 08h36

أنا إللي بعضي من تراب الأرض و بعضي من أثير
أنا الظلام و النور . و جوايا الصغير و الكبير
أنا إللي ممكن أزحف على بطني و ممكن ف الهوا أطير
أنا الشر لو أطاوع نفسي و كل الخير لو يصحى الضمير

**سيادة الرئيس** · #3 24/12/2008, 08h39

إيه يعني شوية أسى . و إيه يعني حبة ألم
و إيش تكون كل الآلام لو قارنـّاها بالنعم
الدنيا فيها ألم و أنين . لكن كمان فيها النغم
و العيشة من غير ده و ده . تبقى بعيد عنك عدم

**سيادة الرئيس** · #4 24/12/2008, 08h49

واقف على الناصية و بيبيع ورق يانصيب
و بيوزع على الناس الحظوظ . و هوه ما لوهش نصيب
ياللي بتعتمد ع الحظ وقت الحاجة و في اليوم العصيب
الحظ غادر و طايش . نادر لما سهمه يصيب

**سيادة الرئيس** · #5 24/12/2008, 08h53

علمتني الحياة إن سهم يصيب و سهم يطيش
و علمتني الدنيا إن الأناني ياخد و لا يعطيش
و علمتني الحكمة إن الجبان يعري و لا يغطيش
و علمتني الكرامة أرفع راسي و لا اوطّيش

**سيادة الرئيس** · #6 24/12/2008, 09h38

موجوع وقف ع السور يتفرج على بحيرة بجع
و يشوف الوز إللي رايح و يشوف الوز إللي رجع
و يشاهد إللي ع الميه عايم و إليي ف الضله هجع
و يتعجب على البط إللي بيعلم ولاده العوم و الدلع
منظر صحيح يفرح . . . لكن ما يشفيش م الوجع

**سيادة الرئيس** · #7 24/12/2008, 09h41

عارف يا طويل العمر يعني إيه سحابة صيف ؟
غمامة فايته ف السما زي الشهاب و الطيف
و كل واحد في الحياه . عابر سبيل . أو ضيف
و العمر واحد . . لو كان ع السرير أو بحد السيف

**abuzahda** · #8 24/12/2008, 14h25

اقتباس:

المشاركة الأصلية كتبت بواسطة unicorn

كان بيتهيألى انى الوحيد اللى كنت باشترى الاخبار يوم الجمعة , عشان رباعيات بيكار
و انا فاكر انى كنت بادقق كتير اوى فى الصورة و فى الكلام
و حالة الشجن الدائمة فى رسومه و رباعياته
و باستعجب من هذا الفنان اللى بيجسد كلامه بالرسم , و دايما كنت أسأل نفسى
هو رسم الصورة الاول و كتب عنها كلامه؟؟

و لا كتب الكلام الاول و رسم صورته ؟؟

أخي الحبيب محمد أبو مندور
شوف الظروف الحلوة؟
تقابلني بعد وحشة ،هنا، عند العزيز الغالي أبو عالي
و الموضوع ، زي كل مواضيع سيادة الرئيس ، مدهش و مباغت .
لدرجة إني فكرت اعمل رد "جاهز" لكل مشاركات فخامته أختصر فيه عجبي:
ياما في الجراب ياصلاح

و حسين بيكار "حالة" كررها الشعب المصري ، بنفس درجة الإدهاش ، أذكر منهم:
خالد الذكر عمنا صلاح جاهين و العبقري المنسي عمنا عبد الرحمن الخميسي ، رحمهما الله
و عمنا درويش الأسيوطي أطال الله عمره
و ليسمح سيدي صلاح علام أن أعطر الصفحة بصورة لعمي وصديقي و أستاذي:
درويش الأسيوطي ، صاحب المواهب التي تكفي جيل من عينتي
(ما انا عارف ان البرنس عمرو التوحفجي هيعدي هنا و أكيد "فتى البداري" الجميل صبرة أبو حسن . فأكون قد أحسنت استقبالهم بهذه الصورة)

درويش الأسيوطي في حضرة بهاء طاهر بمدينة الأقصر