إيه تهمتى ؟

[سلمى القمر]

تعالى يا عم وقولى بيتين قدام راجلين ونقلك هايل
فلان وفلان والحج احمد وام محمد عملوا عمايل
يا استاذى ......استنى شوية اسمع بس
لية سؤال اكيد من الدرس....اية تهمتى؟
اللى تخلى حياتى حبس فى حبس
شعر اية اللى جى بتحكى علية يا خال
لا انا جى اقولك شىء مضايقنى
والا غايظنى ولا اهو موال
انا بس قلت اوضح حاجة وشىء فى خيالى
ما شفتة اتقال
مواويل بنحكى ونقول فى قصايد وعروض بحر
خيال فى خيال
سبنا اية ؟؟ قول غير هم يهد جبال
بنوتة حلوة شبة البدر خفة ودلع
بس يا خال القلب بين ضلوعها انقلع
العمر فات والقطر عدى ما ساب للحلوة ........
حتة جدع
لسة هقولك شعر ولا اقولك اية تهمتى ؟؟
وشاب فى العشرين عشرة منهم ضاعوا فى سجاير
لا شغلة ولا مشغلة واللى زية ابن مين بنى العماير
يا خال ويقولك عبرة دة فى شعبنا شفنا العباير
لسة هقولك شعر ولا اقولك اية تهمتى ؟؟
جعان يامة...صرخة طفل لحمة اختفى
دموعها جفت حاضر يابنى البير اكتفى
وقبل غسلة قالت امه كفانا فلسفه
لسة هقولك شعر ولا اقولك اية تهمتى؟؟
طابور طويل ومحطة بس للانتظار
لا دور بييجى ولا عيش بيوصل ..موت يا حمار
اخرج منة....روح بيتكم..كدة انتحار وكدة انتحار
لسة هقولك شعر ولا اقولك اية تهمتى؟؟
عنكبوت فى سقفى وتلاتين مريض منين تفوت
يا طبيب اكشف من بعيد لجل الزحام لحسن تموت
راحت جروحهم للى يرحم قبل منك
والعنكبوت راضى السكوت
لسة هقولك شعر ولا اقولك اية تهمتى؟؟
عيال كتير وجهاز تنفس ودوا فى ازايز
مسابقة هى مين اللى يرحل قبل غيرة مين اللى فايز
بس خابت لان اخره جنازة واحدة مش جنايز
لسة هقولك شعر ولا اقولك اية تهمتى ؟؟
سجن كبير زنازين كتير قال اية فصول من غير تلامذة
فى الحوش دة فسحة بعد حصة من غير مدرس ولا طفل فذة
سنين والدرس زهقنا منة قول يا اطرش ياء وهمزة
لسة هقولك شعر ولا اقولك اية تهمتى؟؟
قالوا لنا المية غالية حافظ عليها خاف الشبح
بعلو صوتى قلت ..وبالمجارى والله صوتى انتبح
قالوا لى هى مجارى منكم فى البلدية بير وانتزح
لسة هقولك شعر ولا اقولك اية تهمتى؟؟
تعبت يا خال...اظن فهمت قضيتى
اسال سؤال الرد يرجع سؤال؟؟؟؟؟
تهمة الزمن يا خال ولا برضة تهمتى؟؟؟؟
وان كنت حكمت شوف الحكم هيبقى لمين!!!
احكام بتطلع على الاحياء مش ميتين
ولا اقولك....نفذ باة برصاصة هى او مشنقة
ما تفتكر هنحس بيها متنا يوم رضينا الشقى
بس كلمة قبل السكوت
كلمة واحدة وموت بموت
التهمة يا خال مش تهمتى
التهمة انى من البلد دى
عشت فيها.....ومت فيها بحسرتى