شوف يا صاحبي شوف
شوف مول الحيلة
يتمشى ديما مخطوف
تقول شي دعوة و لا تبهديلة
يكلف نفسه كلوف
لا عقل و النية قليلة
تشوفه تحسبه خروف
معلق في رقبتوا حبيلة
سروالوا طايح مرخوف
لباسوا كتان النيلة
كالديك ريشوا منسوف
ناقص و صحتوا عليلة
تعلم حرفة و حروف
جعلهم في رزقوا وسيلة
عايش عيشة حلوف
ما صدقت لو حتى خليلة
كلاموا صامط معيوف
فعايلوا خبث و رذيلة
فالصلاة يسبق فالصفوف
و يزكي في شهر الفضيلة
يقول لك أنا أصلي معروف
و جدي كان شيخ القبيلة
طعامي كبدة ملفوف
سلاطة طابعتها تخليلة
فالمايدة تجبروا ديما ملهوف
تقول ما كلاش عام و ليلة
قولي عليك ماهو تلوف
ما حكاه جمال و لا جميلة
سولوا خويا مخلوف
يجيب لكم البيان بالدليلة
كلامي فيك هذا موصوف
مانزيد قيل و لا وقيلة
أديه من عندي دراهم مصروف
قضي و شري بيه تبديلة
قولي رزين ماهو منتوف
وزني (ما)طابعتوا تفعيلة
شوف يا خويا شوف
شوف ذاك المكشوف
شوف مول الحيلة
العرض الشجري