قلبي يهفهف .. يرفرف لما يشوف بنوته
و يبعت رسايل هوى كاش و عالنوتة
و لا يهمه الملامة و لا يهمة الناس
هوه هايموت موتة واحدة و لا 100موتة
أنا أحب أقول اللي حاسة و اللي شايفاه عنية
و عواطفي زي الهوي ظاهرة مش مستخبية
قالو الصراحة راحة و إنتي .. آه من عنيكي
شبكة و سنارة .. و أنا قلبي ياما إنشبك في الرايحة و الجاية
إنت اللي فيهم يا حلو لو حتي خبيت عيونك
و الصورة باهتة و غبية لو كات من دونك
يا زينة الصحبة يا معطر البساتين
خايف عليك من عيونهم لا يحسدونك
أحلي ما فيكي عيونك الناعسة
و السحر ما يتوصف .. خايف انا أنسي
أبيع سنيني أنا لأجل الجمال و الزوق
طمعان يدوبك أنا في همسة أو لمسة
من حقك يا واد تتعاجب
و تقول إن أنا مش عاجب
مع إني في هواك متبهدل
من سحر الرموش و الحاجب
عاشق صحيح جمال الورد في الخدين
لكن أبيع العمر .. كل العمر .. و أحضن النهدين
محروم يا ناس م الحنان .. و العمر بيعدي
و لو قدرت أهرب من هواكي أروح من عيونك فين
هاتروح بلاد الواق واق .. وبرضة راح ترجع
أصل الهروب م المصير و الله ما بينفع
ومهما طال السفر لك عش يا طيري
ما بين ضلوعي سكن مشتاق لو ترجع
فيه منك طويل و بوردة ... فيه منك طويل الكعب
ياما شال الجميل أحمال .. من نوع التقيل الصعب
يا محير وراك خطوتنا .. ياما دوخنا وراك مشاوير
ياما دابوا ف هواك شنبات وريتهم ليالي الغلب
يا حلاوة العصير في شفايفك غيران من الشاليمو
لو فاكر ان انا مش شايفك شوف قلبي يقول إمبو
إسكندرية ماريا و إنتي زينتها
و مارية غنوة جميلة عنيكي غنتها
و الرملة رقصت عشانك و إتلهفت ليكي
سألوها إيه السبب قالت .. سحر خطوتها
حلو و جميل المحيا و العيون زرقة
و رموشه زي السيف حامية ياناس حارقة
لو عمري ضاع في الهوي من شان يادوب نظرة
أقول فداك يا قمر و حياتي مش فارقة
تتقل علي أنا ... و أنا الل علمتك
معني الكلام و الهوي و قلبي سلمتك
تصعب عليا صحيح بس مش زي قلبي
آسف يا قلبي أنا اللي جنيت عليك و بهدلتك
لغة العيون أسرار و بحر ماله قرار
و إنتي عيونك ليل من اللي ماله نهار
عملت فيها بطل و سهرت علي رمشك
رماني رمشك بقسوة بقيت غريب الدار
يا أهل الهوي يا مجروحين يا عاشقين قبلي
ما فيش طريقة اللي بيها أغير اللي إنكتبلي؟
أصل الحقيقة غريبة و مين فينا بيقبلها
لا خلو بالي هويته و لا إنشغال البال طابلي
تخاريف و السلام
العرض الشجري