رد: 4 مارس 1965 مسرح حديقة الازبكيه * اراك عصي الدمع *انت الحب الاولى *
عن قوة شخصية السيده ام كلثوم ساحكى اليوم ماقاله لى الصديق الحبيب اميل عزيز بالحرف عما شاهده يقول لى كانت الفرقه الماسيه مسافره فى الكويت فى ذلك الوقت وحفلة الست ام كلثوم بكره وكنا فى ذلك اليوم متاواجدين فى فيلتها مع الاستاذ عبد الوهاب بنعمل بروفة انت الحب وعددنا غير كامل بسبب ان عبد المنعم الحريرى ومحمود القصبجى ولبيب حسن وغيرهم هم اعضاء فى الفرقه الماسيه ايضا وموجودين فى الكويت فى ذلك الوقت واحنا بنعمل بروفه رن جرس التليفون فسكتنا وقامت الست ترد قالت ايوه اهلا بيك لا ابدا تبعتلهم طياره خاصه تجيبهم انا حاعمل بروفه بكره ولازم يكونوا موجودين شكرا سللملى عليه كتير وانتهت المكالمه وفعلا تانى يوم الساعه 11 الصبح كانوا متواجدين فى البروفه
وبالنسبه لطبقة اغنية انت الحب اميل قال لى المفروض انها نهاوند صول الطبقه الكبيره العاديه وحكى لى ان يوم الحفله بعد ماخلصوا البروفه الفرقه مشيت وهو دخل الحمام كان حمام صغير فى الصاله تحت اللى بيعملوا فيها البروفه ومحمود رشاد عازف الكمان واعز اصدقائه رحمه الله منتظره فى الصاله
قال خرجت لقينا الاستاذ عبد الوهاب واقف معاها على باب الفيلا فوقفنا بجوارهم سمعناه بيقول لها حتغنى ايه الليله دى قالتلو اراك عصى الدمع والاغنيه الجديده وحختم بهوا صحيح ثم قالت على فكره وهنا كانت المفاجاه قالت انا حاسه ان الطبقه واطيه شويه فبصلنا وقال حد يطلع الكمنجه انا تركت محمود رشاد يطلع كمنجته لان كنت باحترمه جدا لانه كان اكبر منى سنا فى ذلك الوقت الاستاذ عبد الوهاب قاله ارفعلى الكمنجه كده نصف تون بعد مارفعها محمود سال الاستاذ عبد الوهاب نفسه وقال فين فين اعلى حاجه اه قولى كده من هنا فغنت الست المقطع العالى فى الاغنيه وقالته اه كويس كده من هنا فقال لها دلوقتى لازم اتصل بفاروق سلامه علشان يوضب الاكرديون اميل بيندهش وبيسال نفسه لماذا سكتت ام كلثوم طوال هذه الفتره حتى اخر لحظه هل احتراما منها للاستاذ عبد الوهاب ام ماذا الله اعلم ويقول
وكان بها بالليل فى الحفله رفعنا الالات نصف تون فى اغنية انت الحب يعنى اعلى من الطبقه العاديه واصبحت نهاوند على لا بيمول يقول لى الاخ اميل يالها من ذكريات لاتغيب عن عينى لحظه اراها امامى وكانها بالامس خساره خساره كبيره ويرجع يقول ولكنها سنة الحياه لانستطيع ان نفعل لها شي بس ربنا يصبرنا ويبعد عنا بلاوى اليومين دول وانا فاهم طبعا يقصد ايه لانه لما بيفتح التليفزيون قدامى ويلاقى اى فيديو كليب او ما شابه ذلك بيروح مغير القناه على طول ويفضل يقول بقى اللى مايتقلش عنده حق مش كده ولا ايه
|
العرض الشجري