فؤاد حداد شاعر شعراء العاميه

[رائد عبد السلام]

كان فؤاد حداد -رحمه الله- شاعرا مثقفا ولم يلجأ إلي العامية عن عجز بل كان يكتب بها ليكون أقرب إلي نبض الجماهير وعندما تقرأ أشعاره بالفصحي لا تفرّق بينه وبين كبار شعراء الفصحي...وكان مترجما جيدا عن الفرنسية وخاصة أشعار لويس أراجون الشاعر الفرنسي الكبير ....رحم الله الشاعر الوالد فؤاد حداد ..وهذه مرثيته بقلم العبد لله:
كل الجراح كدّابة ....
إلاك ياجرح الموت
تشبه وحوش الغابة
تنهش ومالك صوت
إزاي تجيلك روح تقبض فتي الفتيان
أبو صوت كمثل الموج ..يعلي كما الطوفان
ينطق يقول الحق
حتي ولو ينشق
قلبه من الأحزان ..
مين اللي عاش النهاردة وما بكي بالدمّ ؟
صعب الجراح العميقة بالضماد.. تتلمّ
عيني النهاردة عشانك
سابت بكا ودموع
وعرفت أول مرّة
طعم العطش والجوع
طعم العطش للندي
والجوع لكلمة ضيّ
تفتح طريق قدام
تهدي طريق الجايّ
أنا عارف الأحزان تشبه لون الجراح
وإن عشت بعدك وحيد
يفضل لجرحي براح
بين الوريد ..... والوريد
يسقيني حزن جديد
يسقيني ليه الفراق
دابحني وانت بعيد
بعد النهاردة مفيش صوتك يهز المدي
يبوس شواشي الشجر
يطيب لضحك الندي
آدي الحياة ياوالدي
تشرق علشان .... تغيب
مكتوب عليك الشقا والوحدة والتغريب
تبني قصور الأمل
تبني آمال وتخيب
مين اللي قالك تكون بين البشر شاعر؟
شايل هموم الكون
علي طريق واعر ..
أصل الحمل التقيل لابد راح يتعبك
وإن كان قلبك كبير ..
بحر الحياة ....كدّبك
صاحبك ماهوش صاحبك
وماعادش فيه إخوان
إنت الطير المسافر
علي جناح الزمان
واخد م الشعر سكّة
ومن الخوف ...الأمان
ياوالد الشعراء....سامحني مش بارثيك
لو كان حجر الطريق بيحس كان يبكيك
إنت الآهه الذبيحة بتشق موّالنا
صدقني مش بارثيك
ده انا رثيت ....حالنا