معزوفات على الكمان للأستاذ عادل صموئيل

[عادل صموئيل]

عزيزى الاستاذ محمد الآلاتى
اشكرك من كل قلبى على رد على موضوعى مع انك ما ابديتش رأيك فى العزف وقد كنت مشتاق جدا لسماع رأيك فى المعزوفتين
واشكرك جزيل الشكر انك ابديت روح طيبة جدا فى مساعدتى فى موضوع الايقاع على الكمبيوتر وممكن بهذا نفتح نافذة جديدة للإبداع فكرتنى بأصدقائى الذين رحلوا رفاق الزمن الجميل لأنهم كلهم كانوا بيحبوا بعض ويساعدوا بعض على الابداع بس فيه مشكلة فنية ممكن تكون انت بالذات فكرت فيها اولا انت لما تسمع اغنية لأم كلثوم مثلا تلاقى دور عازف الايقاع مش ماسك الوحدة بس ولكن محور خطير من محاور اللحن يعنى قوة ضاربة قائمة بذاتها يعمل على سلطنة وابداع جميع اعضاء الفرقة وعلى رأسهم ام كلثوم بمعنى ان كل جملة لحنية بيديها ايقاع حلو يخدم عليها وحتى لما تعيد الجملة ممكن يديها لمسة فى الجملة الايقاعية يخليها لو عادت الجملة عشر مرات بيبقى فيها شىء جذاب والجمهور يعوز تعيد تانى ده طبعا بخلاف التصدير المحفوظ والتصدير الفجائى الفورى لما المطرب يحس انه عايز يأخر كروش او حاجة زى كده انا عندى كمبيوتر وباكتب عليه اعمال موسيقية واوزع عليه اعمال موسيقية بس ما تعرضتش للإيقاع خوفا من شىء اسمعه فى الوسائل المختلفة طول النهار وهو اعادة توزيع اعمال موسيقية خالدة كان الايقاع فيها ملك المقطوعة يعنى عشر ايقاعات مختلفة فى المقدمة الموسيقية وافاجأ انهم عاملين اياع واحد زى القطار بيؤذى سمعى لأن كما ذكرت انا عزفت مع الفرقة الماسية عشرن سنة وفيه الحان من دول عملنا فيها خمسين بروفة وييجى حد يشوهها بالشكل ده وانا عزفت منفرد مع الاساتذة العظام الذين ذكرتهم بس يا خسارة ما عملتش حساب الزمن وما سجلتش الاعمال دى انا آسف على الإطالة عليك ولكن من زمان ما اتكلمتش مع استاذ كبير وحايفهم قصدى
ياريت لو فى الكمبيوتر الاقى الاحتياج اللى قلت عليه وهو الايقاع اللى يزيد الابداع مش يضيع مضمون اللحن وانا سعيد انك مقيم بمصر لأن ممكن نكون اصدقاء وانا تحت امرك فى اى وقت واتمنى ان اسمع ردك والف شكر

[الألآتى]

أستاذى الفاضل عادل بك ..

لقد كتبت لك ردى السابق أثناء تحميل الملفات وقبل أن أسمعها ..

والأن سمعتها .. وأريد أن أقول لك بكل صراحة .. لقد أعدتنى لجو الزمن الجميل والموسيقيين إللى بجد .. إحساس رائع .. ووحدة زمنية مضبوطة على الشعرة .. فى إنتظار المزيد دائماً ..

بالنسبة لمسألة الإيقاعات ..

بالطبع الإيقاعات الحية أجمل وأكمل .. ووجود العازف الحقيقى بجوارك .. لا يعوضه أى برنامج ..

ولكن لابد مما ليس منه بد .. والحاجة أم الإختراع ..

نحن نلجأ لبرامج الكمبيوتر عندما لا يتواجد العازف الحقيقى .. كما أننا يحلو لنا أن نعزف أو نسجل أى مقطوعة فى أى وقت .. ومن غير المعقول .. أن يتواجد معنا عازف إيقاع ليل نهار ..

أما بالنسبة لنوعية الإيقاعات وأشكالها المختلفة .. فهذا ماأحرص عليه .. لأنى لا أستخدم لوبات جاهزة .. ولكن أصنع الإيقاع بنفسى ضلع ضلع .. وأضيف الزخارف والحليات حسب الجملة اللحنية أو الموسيقية ..

وعموماً .. سأضع لك تليفونى فى رسالة خاصة .. ويشرفنى التعرف عليك وتبادل المعرفة والمساعدة ..

مع تحياتى ..