لقاء جميل بين الاخوه

[الألآتى]

تلاقينا ( كالعادة ) نحن الثلاثة .. ثلاثى القاهرة .. المشاعلى وغازى والعبد لله ..

كان اللقاء فى موقف عبود .. إمتطينا أول سيارة متجهة لشبين الكوم .. ودرجن درجن .. وصلنا بسلامة الله .. وقبل أن نفكر فى الإتصال بجناب اللورد .. لنخبره بوصولنا الميمون .. فوجئنا بإتصال من أبو على كشك .. إنتوا فين ؟ .. إنت إللى فين .. أنا أهو .. ونرسل أبصارنا إلى الآفاق .. لنجد عم حسن يجلس على مقهى قريب .. وصل قبلنا .. ومعه الجميل الفنان ( محمود العيادى ) ..

وأهلاً وسهلاً .. وحشتونا .. وبوسه من هنا .. وبوسه من هناك .. وإتصال بجناب اللورد .. وخمس دقائق وجاء اللورد بسيارته الزوبة .. وأعدنا المشهد .. أهلاً وسهلاً .. وحشتونا .. وبوسة من هنا .. وبوسة من هناك ..

مش ياللابينا ... ياللا بينا .. المشوار مش بعيد .. قوام قوام .. لقينا نفسنا بجوار فيلا اللورد ..

طلعنا .. دخلنا .. قعدنا .. وبدأت التحيات والمشاريب بدرى بدرى .. وشوية وجاء وفد الإسكندرية ..

الدكتور حسن حافظ .. والأستاذ محمد أبو مندور .. سعادة مابعدها سعادة .. ياسلالالالالالالالام ... أنا فرحان ياجدعان ..

الله .. أمال فين الدكتور ثروت .. ده أنا مستنيه ياناس .. الدكتور ثروت إعتذر فى أخر لحظة .. زعلت .. إتقمصت ..

لكن الأمل فى لقاء قريب أعاد لى البسمة ..

طيب فين الأستاذ كمال عبد الرحمن .. إعتذر .. يادى النيلة .. هو فيه إيه ؟ .. الراجل عند شغل .. طيب ..

وإتفتحت حنفية الذكريات الشخصية والعسكرية ..

سيادة اللواء محمد عمر .. أحد أفراد المجموعة 39 فى حرب أكتوبر .. الدكتور حسن حافظ .. أحد الأطباء فى كتيبة الخدمات الطبية فى حرب أكتوبر أيضاً .. الأستاذ محمود العيادى .. أحد أبطال أكتوبر برضه .. إحنا باين علينا وقعنا فى ملقف حربى ..

وهات ياذكريات وحكايات وبطولات .. و .. جاء ميعاد الطعام .. بس .. كله ييجى على جنب .. جاء ميعاد بطولاتى ..

وهجووووم ... وإندفاع حسب الخطة الموضوعة .. وإلتفاف حول السفرة .. لمعرفة نقاط الضعف عند العدو .. وحددت أهدافى بدقة .. ونشنت .. وأطلقت مدفعيتى .. وكانت أسلحتى ( الشوكة والملعقة والسكينة ) بالإضافة لأسنانى ( سلاحى الإستراتيجى ) .. سبباً فى كسبى المعركة دون خسائر تذكر ..

عارفين ياجماعة .. بالرغم من وجود أصناف عديدة على السفرة ( دجاج ، لحوم ، كفتة ، أرز ، مكرونة ، محشيات ، سلاطات ، مخللات .. ألخ )

لكنى لاحظت وجود صنف غريب .. طاجن كبير .. قاعد على جنب .. مكسوف من باقى الأصناف .. إيه ده يالورد ؟ .. ده مسقعة .. معمولة مخصوص وجايه من البلد .. مسقعة !!.. إوعى .. وسع .. سيبك من اللحوم والدواجن .. وهات الطاجن ده جنبى .. وعينك ماتشوف إلا النور .. قمت بالواجب تمام .. ولم أغفل باقى الأصناف بالطبع .. أصل أنا عندى مبدأ ياجماعة .. ماحبش أكسف صنف موجود على المائدة .. يعنى كل صنف تاعب نفسه وجاى يرحب بينا .. نسيبه .. نكسفه .. مش معقول ..

وعدنا من المعركة منتصرين .. لنكمل القعدة .. ويالا ياأستاذ ألآتى .. سمعنا شوية مزيكا .. مافيش أورج .. لأ فيه .. فين ؟ .. أجاب جناب اللورد .. عندى .. طيب عايزين طبلة علشان الأستاذ محمود العيادى يشاركنى .. فيه طبلة .. فين ؟ .. أهيه ..

إيه ده .. الراجل ده ماعندوش مشكلة .. كل حاجة موجودة بعون الله .. وهات ياتزمير وطبل وهيصة .. وقلبناها سيرك ..

ومش عايزين نروح .. مش عايزين القعدة تخلص .. لكنها خلصت للأسف ..

أتمنى تكرارها .. كثيراً كثيراً ..