و هذه إثـْرَ فوز ِمنتخب مصر لكرة القدم ببطولة كأس أفريقيا
في فبراير الماضي ،، و خروج كافة قوى الشعب المصري
( العامِل و العاطل ) ، إلى الشوارع و الميادين و الحارات و الأزقة و الحقول و النجوع ، في تظاهرةٍ غير مسبوقة ،،
و شاطرتهُ بعضُ الجماهير العربية فرحته بالكأس ..
(1)
بحر و هايج
عالي الموجة
خرج الشعب ف أكبر هوجة
ناسي الفقر و ناسي الحُوجَة
دي مش كورة .. دي مزيكا
و فريقنا ..
دا بطل أفريكا
عَـدَل الدَفــَّة و كانت عُوجة
و اتفـَك الشعب المزنوووء
(2)
كل الشعب زحف متعافي
مُرسي و حودة و عبد الشافي
و مُشجع شايلو على كتافي
رافع علم المجد لفوووء
(3)
يا شوارع يا حارات يا زآييء
الليلة ما حدش يـِدَّاييء
كل شعوبنا الليلة شـَآييء
فرحة و سارحة
يصبح بُكرة لأيام جارحة
محني الضهر
حزين ..مسحوووء
(4)
عربيـَّات ..
زمامير و أغاني
و هتاف م النوع الوجداني
ملعون أبو عقلي المُتـَفاني
لسة حايتفلسف و يعاني
شعب و مجني عليه ..
و الجاني
حاشر نفسه تحت الضوووء
(5)
فرحان ... لاكِن
فيه شىء داكِن
متشعلق في ضميري و ساكن
يـِمكن عَـدَّاد فرحتي راكِن
و خايِنني وعيي المحزوووء
(6)
هيصي يا جماهير عربية
فرحتنا الليلة اشتراكية
و (الحَضـَري) أمن و قومية
لا طبقات و لا قِـلـِّة ذوووء
(7)
صواريخ في الجو مضَوِّيـَّة
مشاريب حمضية و قلوية
زغاريت فِطرية و وراثية
هيستيريا و انفجرت فِيـَّا
عاشت لعبتنا الجماعية
حُقنة بـِنج و بكرة نفوووء
(8)
مصر يا مصر
يا راس مرفوعة
التشجيع دا حقوق مشروعة
مَصُّوا و سابولنا الزعزوعة
و لا حد بيشتكي م الطوووء
(9)
جمهور زى القش يوَلـَّع
و يعيش له كام يوم مِدَّلـَّع
شوفه الصبح هزيل و مخلع
و يقول برضو مسيرها تروووء
(10)
كاس أفريقيا يا مجد معاصر
مبروك ع الشعب المِتحاصر
إحنا الأحرار .. مافيناش آصر
رقص دا ولا َّ
على حبل الأحزان و الذِلـَّة
بْتـِتطـَوَّح جُثة مشنوووء
(11)
الليلة عريسنا أبو تريكة
بـِيْغـَزِّل فـَشـَر المزِّيكا
مش وقت مبادىء بولوتيكا
و كفاية الدم المحروووء
( 12)
تحيا جنود الأمن الكـَرَوي
إنسوا الليلة واقعنا ال ( ....)
هِىَّ الكورة سلاحنا النووي
إنسوا الليلة ..
فيروس كبدي و فشل كلوي
كله اتصالح ..
في الهُلـِّيـلة
و لا سُني زعلان من عَـلـَوي
شعبنا طول عمره مرزوووء
(13)
يا ختي جَمَالو
شعب ف حالو
بيجاهد على رزق عيالو
و ساعة الكورة
يبان في الصورة
و فريقنا الستات داعية له
و جماهيرنا بتنفخ في البوووء
(14)
إصحي يا دنيا
داحنا فراعنة
ياما قلعنا وياما زرعنا
حتى ف فن الكورة برعنا
و لا فيه حد ف يوم جوعنا
نسونا يا أبطال أوجاعنا
و ابعدوا عنا نذير السوووء
(15)
رجالة
و عايشين الحالة
تسلم أيادينا الشغالة
و شعوب بتحقق في رسالة
رفاهِيَّة و مساواة و عدالة
مش عايشين ع العالم عالة
جبنا الجون .. سمعنا الكون
نصر خرافي و غير مسبوووء
(16)
خط دفاعي
صاحي و واعي
و لا ميت ( إيتـُّو )
يهز
( صباعي )
و دعا الداعي
نزلنا الشارع
شايلين علم النصر الفارع
نصرخ نشرخ بهتاف بارع
إحنا الليلة زماننا مُضارع
عشاق و فريقنا المعشوووء
(17)
فلتحيا قذايفك يا زيدان
يا مولعها و لا البركان
شوطة جنان
و بلادنا أمان
و لا فيه حد يبات مخنوووء
(18)
يا محني ديل العصفورة
إحنا بقينا ملوك الكورة
يا محني ديل الحِدَّاية
ما تبصش أبداً في مراية
لحسن تاخد بالك .. تحزن
و الكورة تصبح سِلا َّية
عُمر ما وشك يوم حايغشك
مِنجـِل أيامك بيحِشـَّك
فانسَى الليلة انـَّك مسروووء
(19)
هنا بتشوط الكورة
.. تخـُش
و في الأمم المتحدة تكِش
هنا بتسجل
و هناك حقك ليه متأجل
هنا بتغـَزّل
و هناك وضعك مخزي و مخجل
هنا بتباصي
و هناك حقك ضايع ..عاصي
هنا بتخطط
و هناك سايبينك تتنطط
هنا عفاريتو
و لا بيهمك سونج و إيتو
و هناك رِف رافع لك فيتو
ينبطح الوطن المَمْزوووء
(20)
يبقى خلاص خليك في السالك
و لا حرب و تشريد و مهالك
( يَبقىَ الوضع العربي كذالِك )
هِىَّ بطولة كاس أفريقيا
شمعة تنور ليلنا الحالِـك
و ما تبآش نِمَكي و محموووء
(21)
إوعىَ تسَيـِّس
خليك كـَيِّس
شجع كورة تبقى كويس
أوعى تماطل
مالك إنت بحق و باطل ؟!
أوعىَ تفوووء
خليك رافع راية المجد العربي
لفـووووووووووووء
__________________
شاء اللي شاء ،، و اللي داء ،، مِـن وَردِة الشـِّفة
نـَـهَـل نـبـيـذ لاِشـْـتِيـاء ،، نهـــرِين ،، و لـَم كـَـفـَّىَ
شـَـهَـقْ شـُعاع خِصرَهَا ،، سَرْسِـب نـَدَى مَصْهـور
وِ فْ كلّ سَـرسوب شُـعاع ،، مَـلايكة مُصْـطـَـفـَّــة
يا تـراب و مخلوط بماء ،، إزاى غـَوِيـت النـُّـــور
يـِفـُــــــــــور علـى سِحــرَها ،، و فِــيها يـِتخـَـفـَّـىَ
كمال
رد: قارئة ُ المَجّ . .// سمعجي
العرض المتطور
