مذكرات مجنون تحف ونوادر ..

[جرامافون]

((( رسالة من داخل عربة الترحيلات)))

إخواني الأعزاء اكتب لكم في عجالة من داخل عربة الترحيلات وعندما تصلكم رسالتي يا ريت متعيبوش علي وحاشة الخط لأنه خط الشاويش أول أحمد أفندي الشوبكي قائد أركان عمليات الضبط والربط والإحضار، والحمد لله أنه رضي يسرسب الرسالة دي بعد عدة محاولات فاشلة للرشوة مره بسيجاره مستورده ومره بنكته تفقع لكنه اتضح إن الباش شاويش راجل شريف موت بس علي مين أنا رحت فاقعه موال من التقال بتوع عمنا الكبير مداح المداحين وامير الغنائيين الشعبيين عمنا محمد الشوبكي لقيتلك الباش شاويش بين أديه باش (عيل) عيونه رغرغت بالدموع وهاتك يا نهنه وأحضان وبوس وسجاير كمان
وقالي :
- والله يا تحفجي باينك بتفهم في الفن يا وله .. والله يا بني أنت دخلت جليبي علي طول واللي يشوفك رغم البهدله والكلابشات وشعرك المنكوش ووشك المنفوش وعنيك المعمصين المدخششين دول يجول عليك ولد ناس طيبين انا تحت امرك .. انشاله لو عايز تهرب اهربك يا اعز الحبايب
قلتله :
- لا .. اهرب إيه ! أنت عايز تبوظ فكرة المحكمة .. أنا بس عايزك توصل الكام رسالة دول سرسبة لمنتدي سماعي .

قالي :
- من عنيه ياوله .. طيب وأخوك سماعي ده بيشتغل إيه ؟
قلتله :
يوووووووه .. يا باش شا ويش افهم .. سماعي ده منتدي علي النت.
قالي :
- انشاله يكون في زحل حوصلهاله .. بس انت اتسلطن كده وافقعنا موال تاني .
قلتله :
يا باش شاويش أنت عايز تبوظ فن عمنا محمد الشوبكي بصوتي المحشرج المنيل ده ..

راح مفعصني وواخدني بالحضن وهاتك يا بوس وعياط وقالي بنبرة حنان امومي وابوبي :
- والنبي عندك حق .. بصراحة صوتك وحش موت ..مش بقولك أنت بتفهم ياوله
- مليني وانا حكتب ..
******
السلام عليكم ورحمة الله بركاته
أخي الفاضل /كمال بك
قاطعني الباش شاويش وقال :
- بس البكوية اتلغت من زمان يا وله .
قلتله :
- لا بقي .. حتكتب ولا اغنيلك .
قال:
- لا .. خلاص والنبي حاكتب .. قول ..

اخي الفاضل كمال بك
بعد التحية والسلام اسعدتني مشاركتك الجميلة جدا
وعلشان ما اتشرفتش بمقابلتك في الواقع اطريت
انسج من خيالي مقابله وياريت تتحقق بس بعيد عن المحاكم طبعا
وربنا يعلم مدي حبي واحترامي العميق لشخصك الكريم
تحياتي الحارة
***********
اخي الفاضل ايهاب عامر
قاطعني الشاويش الممل تاني وقالي:
- الله انت تعرفه يا وله .. ده صاحبي الروح بالروح .
قلت:
لا بقه .. ده انا خلاص حتفقع منك وحغني بجد اهه .. احم .
قال :
- متملي وتخلصنا يا وله .