مذكرات مجنون تحف ونوادر ..

[جرامافون]

عدت إلي المنزل فرحا بتحفي الجديدة .
وقلت في نفسي :
- مراتي لو رقعت بالصوت يبقي ليها حق .. بس معلهش هيه اللي غلطانة مين قالها تتجوز واحد طيب !

فتحت زوجتي الباب ونظرت في (الكيس) الذي احمله :

- جبت لبس ؟

- جبت حاجات احلي من اللبس .

فقالت بدهشة :

- زى إيه ؟

- فقلت لها بنبرة ود :

- جبتلك يا حبيبتي نيازك من الفضاء .

فصرخت في وجهي :

- ااااااااااااايه ؟

نيازك عم محمد ارمسترونج
***************************
(يتبع)

[جرامافون]

في الليل جلست في صالة المنزل كعادتي بجوار زوجتي
وأطفأت كل نور المنزل كنت أريد أن تنسي زوجتي موضوع الفضاء (إياه)
وضعت أحد الاسطوانات التي أحبها كثيرا للشيخ أمين حسنين علي جهاز الجرامافون وأدرت المانفيلا عدت دورات ..
وبدأ الشيخ أمين يلعلع ويطربنا :

علي إيه بيعمل كل ده .. ما كنش طبعه زمان كده
علي إيه.. علي إيه .. علي إيه ده كله

بعد دقائق استأذنت زوجتي للدخول للنوم .. وجلست بمفردي استمع الي صوت أمين حسنين الشجي .. كان جوا رومانتيكيا جرامافونيا جميلا خاليا من النيازك و(التي شيرتات) ..
وفجأة
خيل لي في الظلام أني اسمع صوتا آخر بالقرب مني كان يدندن مع أمين حسنين نفس كلمات الأغنية

(إيه ده !! البيت فيه عفريت ولا ايه)
.. تجمد الدم في عروقي وأنا أحدق في ظلام المكان
محاولا اكتشاف مصدر الصوت ..
وكانت المفاجئة الكبري

من خلال حجب الظلام رئيت بصعوبة وجه رجل كان يجلس أمامي وينظر نحوي مباشرة .. خفق قلبي من الخوف .. كيف دخل هذا الرجل إلي منزلي

كان وجها اعرفه جيدا .. ورغم ذلك قلت في نفسي :
(طيب وايه اللي حيجيبه بس هنا )
فركت عيني ونظرت مرة أخري محاولا التأكد
لكن الرجل قطع تفكيري وسمعته يقول :

- أزيك يا جرامافون .. عامل إيه أنت وأسرتك .

ابتلعت حلقي الجاف قبل أن أقول له بصوت مرتعش :
- انت علي فكرة يا أخ عفريت تشبه محمد زمنطر بالظبط .
فقال العفريت ضاحكا :

- أنا محمد زمنطر فعلا .

فقلت له بدهشة كبيرة :
- أزاي يعني ؟ هو أنت جيت من تونس ولا إحنا اللي رحنا هناك .. معلش مش واخد لبالي .

أجابني محمد :
متفرقش كتير .. هنا وهناك واحد .. انت مش قلت أن أنا أنت وانت أنا .
قلت له :
أيوه .. لكن وقتها كان قصدي ..

لم أكمل عبارتي فقد توقف فجأة غناء أمين حسنين
وأنطلق صوتا آخر من احد جوانب صالة (بيتنا) يقول :

- الأغنية دي موجودة عندنا في المنتدي مش كده يا محمد ؟

أجابه محمد زمنطر بنبرة مرحة :
- ايوه يا كمال !!
التفت نحو مصدر الصوت الأخر مصدوما وقلت :
- مــــــــين ؟؟

جلس السيد كمال عزمي إمامي مبتسما وقال لي بهدوء:
- أزيك يا توحفجي .

هززت راسي مرحبا به لكن الدهشة عقدة لساني عن الكلام .

أشار السيد كمال نحو صورة كانت معلق علي حائط صالة منزلي كانت لام كلثوم في شبابها ولا ادري كيف شاهدها في الظلام وقال لي مداعبا :

- انت مش كاتب تحت الصورة دي المصدر ليه ؟

( انفجرنا نحن الثلاثة في الضحك )

قلت لهما متسائلا :
- هاها .. بس انتوا جيتم هنا أزاي ؟

تبادل الاثنان نظرات لم افهمها ثم قال السيد كمال لي بهدوء :

- رغم إن الموضوع صعب شوية بس أنا حافهمك يا توحفجي .. بص يا سيدي ..أنت شفت فيلم (ماتريكس) .

قلت له بتلقائية :
- لا .. شفت فيلم ابن حميدوا ..

هز السيد كمال رأسه بأسف ولم ينطق بكلمه واحدة .. فخفت أن يعتقد أني (غبي ولا جاهل)
فقلت له محاولا إظهار ذكائي وفطنتي وثقافتي وكياستي :

- آاااااه .. ايوه ايوه فهمت .. حضرتك تقصد تقول إنكم جيتم بيتنا عن طريق برنامج سوفت وير في الكومبيوتر مش كده ؟ طيب والبرنامج ده اسمه ايه ؟ (بيتنا فوتو شوب) مثلا ..

ثم أفلتت مني ضحكة ظننت وقتها أن ما قلته كان ظريفا ..
لكن السيدان المحترمان التزما بالصمت فأدركت سخف ما قلت ..

حدق السيد كمال نحوي بنظرة أسي كبيرة ..
وكأنه كان يريد أن يعزيني في رأسي التي تحمل كمية كبيرة من الجهل .. لذلك انسحبت افكاري بهدوء وجلست في احد اركان جمجمتي في خجل ..

لكن محمد زمنطر قطع الصمت والحرج وقال لي :

- احم .. مش مهم دلوقتي جينا هنا أزاي يا توحفجي .. المهم جينا هنا ليه ؟

فقلت له بلهفة :
- ليـــــه ؟ قصدي يعني .. طبعا تشرفوا وتانسوا .. بس ..

.. وفجأة ..

[جرامافون]

مد أحدا يده نحو مفتاح النور وأضاء كل صالة المنزل وهو يقول
- خلينا في المهم .. أزيك يا جرامافون ياتوحفجي .

- نظرت نحوه مصدوما وقلت :
- لا دي الحكاية كبرت قوي بقي .. تونس وألمانيا والجمالية في بيتنا .. هوه فيه ايه يا دكتور انس ؟

فابتسم الدكتور انس البن وقال وهو يجلس بجواري :
- فيه كل خير طبعا ..
ومد يده ووضع علبة حلويات علي المنضدة وقال :
أنا مرضيتش أجي بأيدي فاضية .

كل هذا كان يحدث وزوجتي بالداخل غارقة في النوم .. لكنها استيقظت واتت الي صالة المنزل لتستطلع الأمر .. تلفتت حولها بدهشة وسألتني :
- إيه ده ؟.. فيه ايه ؟
فقلت لها :
- لا ما فيش حاجه بس الظاهر إننا قعدنا نرفع ونرفع ونرفع حجات في منتدي سماعي والظاهر غلطنا ورفعنا بيتنا كله في المنتدي وإحنا جواه .
(ضحكنا جميعا مره أخري .. وتفاءلت خيرا)

قال محمد زمنطر :
- بص يا توحفجي .. انت فتحت موضوع في المنتدي تحت عنوان مذكرات مجنون تحف .. قلنا ماشي عضو مجنون ما فيش مشاكل .. كمان جرامافون بمنافيلا مش مشكلة .. وتحفجي برضه قلنا مندققش معاك ..
وقعدت تحكي وتشوقنا ووصلت للخازنة وشكلك كده حتطول وحتطلع روحنا لغاية ما نعرف ايه اللي كان في الخازنة فقولنا ناخد بعضنا ونجيلك بالتي هي أحسن عشان تسلمنا باقي الحجات اللي لقيتها في الخازنة .. بهدوء ومنغير شوشرة .

التفت نحو الدكتور انس مستنجدا فهز رأسه وهو يربت علي كتفي وقال :
- ربنا أمر بالستر يا ابني .

أما السيد كمال عزمي فقد أخرج ورقه من جيبه وأخذ يلوح بها أمامي وهو يقول بنبرة جادة:
- طبعا إحنا معانا إذن بالتفتيش من نيابة المنتدي .. ومتنساش انك عضو .. وأنت اللي دخلت القفص قصدي المنتدي برجليك .

ذهب عقلي بعيدا وظننت أن السادة الأفاضل يعتقدون أنني وجدت كنز أو ذهبا في الخزانة (وعايزين نقسمه علي بعض) فقلت بنبرة ودوده :
- يا جماعة مكنش فيه في الخازنة غير جنيه إدريس والتاجر شبط فيه فسبتهوله .. ومكنش فيها فلوس تاني .
صاح الدكتور انس البن بنبرة عتاب ولوم قائلا :

- إيه ده يا توحفجي .. هو ظنك فينا كده ..

وأضاف السيد كمال :
- فلوس إيه وكلام فارغ إيه .. أنت يظهر متعرفناش كويس ..

ثم قال محمد زمنطر :

- أنا زيك بالظبط بنضف جيوبي أول بأول علشان يفضل المنتدي شغال والحال من بعضه .. وكل واحد مننا اللي بيقدر عليه بيعمله وربنا العالم ..

[جرامافون]

تأثرت كثيرا بهذه الكلمات ..
وشعرت بالخجل الكبير وودت أن اصفع نفسي (قلمين) تكفيرا عما صدر مني فقلت بنبرة آسف :
- أنا آسف يا جماعة مكنتش اقصد .. معلش برضه في دي طلعت مغفل مش في التحف بس .

قطع الدكتور انس الصمت وقال بنبرة تمتلئ بالطيبة والحب وهو يربت علي كتفي :
- ولا يهمك يا توحفجي .. أحنا كلنا بنحبك ..
وبعد كده مين حيدافع ويترافع عنك في قضيتك في المحكمة غيري أنا ومنغير مقابل كمان .

قلت له بنبرة ود :
- الله يطمنك يا دكتور
(ثم انتبهت لكلماته )
- ..محكمة .. محكمة ايه دي ؟

في هذه اللحظة سمعت عدة موبيلات تدق بنغمات مختلفة دفعة واحدة .

وتنحي كل واحد من السادة الأفاضل جانبا ليتحدث بكلمات غير مسموعة مع الطرف الأخر

في محمول أخي محمد زمنطر سمعت صوت كان تقريبا
صوت الأستاذ صلاح (سيادة الرئيس)
وكان يقول تقريبا أيضا :

- هه .. اعترف وطلع المستندات وألا أجيلك يا محمد .

أما السيد كمال فكان يتحدث مع عضو يقيم في الخارج لم أتعرف عليه حقيقة .. فقد كان يحادثه باللغة الألمانية التي لم اعرف منها منذ صغري سوي الحصبة الألمانية .

أما الدكتور انس فقد كان يملي تقريبا السيدة الفاضلة زوجته مدام ناهد أنواع المأكولات التي عليها إعدادها (غير العيش والحلاوة) كي يزودني بها بيت الكرم الحاتمي إذا لا سمح الله شرفت في تخشيبة المنتدي و(عصلجت).

ثم توالت المكالمات علي السادة الأفاضل من إخوة كرام

بصراحة فكرت أن امسك أنا الأخر بالمحمول الخاص بي واطلب من عائلتي وأصدقائي في الصعيد المدد وابعث برسالة (S.OS)
لكني تذكرت أن جميع موبيلات الصعيد لا تعمل علي نفس الشبكة بل لها شبكة أخري خاصة بها (صعيد منافيلا فون)

وها أنا يا إخواني انتهز هذه الفرصة (انشغالهم بالمكالمات )
وبصراحة
لا ادري إن كان ما حدث حلم أم علم

ورغم أن المجنون مريض وليس عليه حرج

لكن الاحتياط واجب
وخلينا ماشيين جنب الحيط
والجبن سيد الأخلاق
واللي يعوزه المنتدى يحرم علي بيتنا
وهنيالك يا رافع الخير
وبدال منقع في كمين من أولها بنقول آمين
والصراحة راحة والكدب مالوش رجلين
واللي ليه ضهر متتحذفش مشاركاته
والصور دي لا لقيه ولا ورث .. دي جايه بخلع الدرس
ومين طلع من منتداه .. حيروح فين يا حول الله

عشان كده حطيت وشي في الحيط ورفعت ايديه لفوق
وحرفع كمان المستندات اللي لقيتها في الخزنة
وتحيا المنتدى وأعضاءه ..
ويسقط اللي يحب نفسه
.. جرامافون ..

(مع خالص حبي واحترامي لأخي محمد زمنطر .. الاستاذ كمال .. الدكتور أنس البن)

[جرامافون]

علي الكسار
لا اعتقد ان احد منا لم يحب بربري مصر الوحيد الفنان الجميل علي خليل الكسار رحمه الله فهو يدخل قلبك فورا وبلا استئذان بتلقائيته الجذابة وبابتسامته البريئة انه الرجل الاسمر الساذج الطيب الذي كان في ايام المجد ينافس العملاق الكبير نجيب الريحاني ويدندن بالحان سيد درويش وبهذه المناسبة يستغرب الكثيرون بأن الكسار لم يكن لونه اسمر ومن الصور المرفوعة مسبقا طبعا يظهر ذلك .. رحم الله عثمان عبد الباسط فكم مرة اضحكنا واسعدنا ..

بروجرام مافيش كده

صورة أبنة علي الكسار في صغرها

عقد زواج عائشة ابنة علي خليل الكسار

[جرامافون]

كلمات نعي الفنان الكبير علي الكسار رحمه الله بخط يد نصر ابنه وبها معلومات دقيقة وهامة عن الفنان الراحل

فاتورة الصيوان الذي اقيم للعزاء في وفاة الفنان علي الكسار وكذلك الميكروفون وغيره ..

فاتورة الكفن والسيارة وغيره

[جرامافون]

رد النقابة (تقريبا) علي طلب المعاش الذي كان قد تقدم به علي الكسار

وصلين من شركة المياه باسم علي الكسار علي عنوانه احداهما استهلاك والاخر يبدوا تركيب عداد .. تقريبا