جميل وبخيل - محمد عبد المطلب

[حسن كشك]

اغنية جميل وبخيل
غناء محمد عبد المطلب
تاليف :
تلحين :

تشعر وانت تستمع الى هذه الاغنية ان طلب
متسلطن على الاخر ويؤدى الاغنية بمذاج عالى اوى
ويعمل بصوته تقسيمات روعه وكل كلمه بيقولها تشعر
انه مش عاوز يسبيها تطلع من حنجرته الا بعد ان يظبطها
على الاخر ويزوقها - الاغنية كأنها درس فى الاداء
وكيفيه ترويض الصوت وتحنينه والسيطره عليه ذلك الصوت
البرى المتفجر الذى يخرج من حنجره طلب وتابعوا حرفنته فى
متى ياخذ نفسه - لكنه استلف نفس عند كلمه حرام تنسى ودادى معاه وانا براعيه لكنه لما اعادها كرر نفس الحكايه واستلف نفس عند ذات الكلمه ( براعيه ) مش عارف ليه كانها لازم تتقال كده - طلب بيغنى بمذاج عالى اوى ياجماعه فى الاغنيه دى

كلمات الاغنية
اناديلك واشتقلك كتير وقليل
ويبخل بالوداد قلبك جميل وبخيل

اسلم والعيون عارفه حنينى اليه (اليك)
عيون فيها الهوى وخايفه تصرح بيه
اصون حبك واحلف بيه
واغنيلك وافكر فيه (فيك )
واناديلك واشتقلك كتير وقليل
ويبخل بالوداد قلبك

مافيش فى القلب حد سواك ياساكن فيه
حرام تنسى ودادى معاك وانا باراعيه
اضيع فى هواك عمرى
ويحتار الهوى فى امرى
واناديلك واشتقلك كتير وقليل
ويبخل بالوداد قلبك

مافارقش ضياك عينى سنين وسنين
وعطشان مهما تروينى وكلى حنين
وحبى يوم يزيد عن يوم
ويحلى فى هواك اللوم
واناديلك واشتقلك كتير وقليل
ويبخل بالوداد قلبك
جميل وبخيل
شد حيلك ياعمنا المايسترو الكبير - بس عشان خاطرى كلمنا شويا عن صوت طلب فى الاغنيه دى
ماتكروتناش زى ماعملت فى اغنية انا وانت والهوى
واليكم المقطع اللى عبد المطلب استلف فيه نفس عشان يكمل كلمه ( براعيه وكررها مرتين )

[M O H A M E D]

السمـّيع الجامد قوي حسن باشا كشك

تصدق أنا لسه محمل كل أغاني محمد عبد المطلب من يومين

و بدأت أسمعهم واحدة ورا التانية لحد ما وصلت لأغنية فضلت أعيد فيها و كل ما اسمعها أعجب بيها أكتر

و هي ( جميل و بخيل ) ..

كلمات : محمد علي أحمد
ألحان : رياض السنباطي

اختيار رائع .. طلب فيها رايق قوي و واخد راحته ع الآخر
واضح اني هكون من مجاذيب عبد المطلب عن قريب

مطرب مش سهل أبداً
و الا اللزمات الموسيقية فى الأغنية دي .. و الا الكمنجات ... لحن متكلف

فى انتظار تحليل أستاذ محمد الألآتي و رأيه فى حكاية النفس اللى خده طلب عند براعيه

و آدي الرابط :http://www.sama3y.net/forum/showpost...0&postcount=45


و شكراً

[MOHAMED ALY]

يا ابو على ...انت اللى جميل لكن مش بخيل .... هؤلاء العمالقة طلب و البليدى و قنديل و كارم و عبد الغنى .... ارى اننا لا زلنا فى بداية الطريق لاعادة اكتشافهم ... و البحث و التنقيب عن نفائس الدرر و الجواهر التى تركوها لنا ... الله يرحمهم جميعا .

[غواص النغم]

اهلا بكم
ابوعلي اشكرك على اختيارك الرائع
هذه الاغنية هي التي جعلتني احب فن عبدالمطلب فقد كنت لا اميل للاستماع له كثيرا
واستمعت لها من عشر سنوات وكانت فعلا رائعة
والموسيقار السنباطي كان رائعا كعادته والشاعر البديع محمد علي احمد في غاية الجمال
تحياتي

[الألآتى]

بسم الله نبدأ فى تحليل أغنية ( جميل وبخيل )

الكلمات : محمد على أحمد

الألحان : رياض السنباطى

الغناء : محمد عبد المطلب

قبل أن أبدأ فى التحليل .. يجب أن أنبهكم لكم المقامات والتحويلات فى الأغنية .. يعنى بالبلدى .. لازم تصحصحوا معايا ..

إختار السنباطى مقام ( العجم ) لبدأ به لحنه ..

والعجم ياسادة .. هو نفسه سلم ( الميجور ) فى الموسيقى الغربية .. أو ( سلم دو الكبير ) ..

تبدأ اللازمة الموسيقية بعزف منفرد من ألة العود ( صولو ) .. فى الحقيقة .. إن العود لم يكتفى بمقام العجم فقط .. ولكنه تجول بنا مع النهاوند والكرد من نفس درجة العجم .. الواضح أن هناك نية مبيتة على إستخدام هذه المقامات داخل الأغنية .. أى أن هناك تحضير لأذن المستمع لكى تتقبل ماهو آت ..

يدخل الإيقاع ( السامبا ) مع مقام العجم .. ثم يتحول الإيقاع للواحدة الكبيرة تمهيداً لدخول الغناء ..

ويغنى عمنا طلب .. من العجم .. ( أناديلك وأشتاقلك كتير وقليل ) .. ويظل مع العجم .. حتى نفاجأ بتحويلة من مقام النكريز .. ليستقر على الكرد من نفس درجة العجم لينهى المذهب ..

هذه التحويلة التى سيستخدمها السنباطى عند نهاية كل كوبليه ..

تعالوا بنا نشرح هذه التحويلة ..

أراد السنباطى أن ينهى المذهب عند الكرد .. ومن نفس درجة العجم .. وهى نقلة غريبة وغير تقليدية .. فعمد إلى مقام النكريز لإستعماله ( كوبرى ) للوصول للكرد .. وبدأ هذا الكوبرى من الدرجة الخامسة للعجم .. حتى لايحدث نشاز فى الإنتقال .. ( إللى يفهم يفهم .. وإللى مافهمش ..... نفهمه ) ..

لازمة موسيقية من العجم أيضاً .. ويغنى عبد المطلب ( أسلم والعيون عارفه حنينى إليه ) .. ويتحول لمقام الحجاز عند ( أصون حبك وأحلف بيه ) .. من نفس درجة العجم أيضاً .. يظهر إن السنباطى أصر ألا يترك هذه الدرجة ..

ويعود للعجم مرة أخرى عند ( أناديلك وأشتاقلك كتير وقليل ) لينهى الكوبليه كما إتفقنا على مقام الكرد ..

لازمة موسيقية من مقام الحجاز .. ونسمع ألة الكمان تبدع فى صولو متفرد وجميل ..

يغنى عبد المطلب من الحجاز أيضاً .. ( مافيش فى القلب حد سواك ياساكن فيه ) ..

ملحوظة لمن يهمه الأمر : الحجاز هنا ليس حجاز طبيعى .. ولكنه حجاز أخر يسمى ( الشد عربان ) وهو من فصيلة الحجاز .. ولكنه يحتوى على حجازين من درجتين مختلفتين .. لذا لزم التنويه ..

نعود لأغنيتنا .. نسمع هنا لحناً أخر لنفس المقطع ( مافيش فى القلب حد سواك ياساكن فيه ) ومن نفس المقام ..

ونسمع أيضاً فى هذا المقطع .. الكلمة التى أشار إليها أخونا حسن كشك .. ( وأنا براعيه ) ..

السبب فى إستلاف عبد المطلب للهواء أثناء أداؤه لهذه الكلمة .. الكلمة طويلة لحنياً .. وتقترب من الأوكتاف الكامل .. أى ثمانية درجات صوتية .. ولا أحد يستطيع غناؤها إلا بهذا الشكل .. وخاصة أن الزمن هنا بطئ .. أى أن الكلمة اللحنية تأخذ وقتاً طويلاً فى الأداء .. فماذا يفعل عبد المطلب غير هذا التصرف ؟ والدليل على ذلك .. أنه كرر نفس التصرف والإستلاف عندما أعاد الشطرة .. مطرب خبرة ولا تعوقه أى جملة لحنية .. والسنباطى كان يعرف أنه يلحن لعبد المطلب .. لذا لم يخشى من تلحين الجملة بهذا الشكل ..

يعود عبد المطلب للحجاز العادى عند ( أضيع فى هواك عمرى ) .. ويعود للعجم عند ( أناديلك وأشتاقلك كتير وقليل ) لينهى الكوبليه على الكرد كالعادة ..

لازمة موسيقية من مقام الكرد .. ونسمع صولو من ألة القانون ..

ويغنى عبد المطلب ( مافارقش ضياك عينى سنين وسنين ) من الكرد .. ويعود للحجاز عند ( وحبى يوم يزيد عن يوم ) ..

ومنه للعجم وتنتهى الأغنية على الكرد كالعادة ..

سنلاحظ أن السنباطى لم يترك درجة الركوز التى بدأ بها الأغنية .. برغم تعدد المقامات .. ولكنه أدار المسألة بإقتدار وبراعة .. لم نشعر معها بأى إختلاف أو تحويلات غريبة ..

سنلاحظ أيضاً أن السنباطى لجأ للعزف المنفرد عند كل لازمة موسيقية تسبق الكوبليهات .. وأعطى لكل ألة حقها ..

فنسمع العود فى أول الأغنية .. ثم نسمع الكمان فى الكوبليه الثانى .. وبعده القانون فى الكوبليه الأخير .. حرفنه وصنعة وخطة موضوعة ..

أرجو أن أكون وُفقت فى هذا التحليل المتواضع ..

[Talab]

جميل و بخيل هي أغنيتي الصديقه المرافقه لي دايمآ بالسياره....و ازداد الآن حنيني لها بعد فتح المواصفات و التحاليل و كأن هناك منظار مكبر كما تكبر الصور لنرى المواصفات...؟
شكري لحبيبي و سميي حسن ـ أبو علي الكشك, و إعجابي للتحليل الفني إللي قدمه لنا الكبير أبو حسام ...و إللي كمان أستسنح الفرصه لأسأله : ما رأيك يابو حسام لو تعطينا شوية أخبار مماثله عن المقطوعه الحنونه لحبيبي طلب : صورتنا واحنا سوا....أو إما تكون حللتها من زمان وانا مش داري ؟؟
تحياتي للجميع

[Egy_LoveR]

فعمد إلى مقام النكريز لإستعماله ( كوبرى ) للوصول للكرد .. وبدأ هذا الكوبرى من الدرجة الخامسة للعجم .. حتى لايحدث نشاز فى الإنتقال .. ( إللى يفهم يفهم .. وإللى مافهمش ..... نفهمه ) ..

أنا مفهمتش يعني هو عجم دو...وبعدين نقل على نكريز الصول ؟ وبعدين نزل تاني لكرد الدو؟

وبالنسبة للحجاز هل الاولاني حجاز كار(دو) والثاني على الصول؟ صح كده؟

شكرا على لتحليل الممتاز زي كل مرة وشكرا على الاغنية كمان...

معتز

[الألآتى]

المشاركة الأصلية كتبت بواسطة Talab

جميل و بخيل هي أغنيتي الصديقه المرافقه لي دايمآ بالسياره....و ازداد الآن حنيني لها بعد فتح المواصفات و التحاليل و كأن هناك منظار مكبر كما تكبر الصور لنرى المواصفات...؟
شكري لحبيبي و سميي حسن ـ أبو علي الكشك, و إعجابي للتحليل الفني إللي قدمه لنا الكبير أبو حسام ...و إللي كمان أستسنح الفرصه لأسأله : ما رأيك يابو حسام لو تعطينا شوية أخبار مماثله عن المقطوعه الحنونه لحبيبي طلب : صورتنا واحنا سوا....أو إما تكون حللتها من زمان وانا مش داري ؟؟
تحياتي للجميع

حبيب قلبى : عم حسن ..
أنا تحت أمرك ياكبير ..

بس أستأذنك .. تضع لنا طلبك أغنية صورتنا وإحنا سوا فى موضوع مستقل .. لكى تشرح لنا لماذا تحبها .. ولكى نتيح الفرصة لإخوانا الأعزاء ليدلوا بدلوهم فى التحليل ..

[الألآتى]

المشاركة الأصلية كتبت بواسطة Egy_LoveR

أنا مفهمتش يعني هو عجم دو...وبعدين نقل على نكريز الصول ؟ وبعدين نزل تاني لكرد الدو؟

وبالنسبة للحجاز هل الاولاني حجاز كار(دو) والثاني على الصول؟ صح كده؟

شكرا على لتحليل الممتاز زي كل مرة وشكرا على الاغنية كمان...

معتز

أخى العزيز : معتز باشا ..

أنا قلت ( إللى مش فاهم .... نفهمه ) ..

واضح أنك موسيقى .. ولكن المعنى لم يصل إليك بالشكل الصحيح .. المهم ..

لقد ذكرت أن السنباطى إستعمل كل المقامات من درجة واحدة ..

ودرجتنا فى هذه الأغنية هى الصول ( النوا ) ..

يعنى .. العجم نوا .. والكرد نوا .. والحجاز نوا .. والنكريز أيضاً نوا ..

ولكنه عندما إستعمل كوبرى النكريز للوصول إلى الكرد .. بدأ من الدرجة الخامسة للنكريز .. أى من الرى ( دوكا ) .. لكى يصل لدرجة ركوز النكريز ( الصول أيضاً ) ولكنه بدلاً من أن يرتكز على النكريز .. إرتكز على الكرد .. أعتقد أن المعلومة وصلت هكذا ..

أما الحجاز .. فهو حجاز النوا ( المقام إسمه كده ) .. وليس حجاز كار .. لأن درجتنا هى الصول وليست الدو .. أما الحجاز الثانى .. فهو فى الحقيقة .. شد عربان .. أى حجازين .. حجاز الدوكا .. وحجاز النوا .. ولكنه إرتكز على النوا أيضاً ..

تحت أمرك أخى معتز ..

[محمد محي الدين]

الف شكرا علي الأغنية الجميلة ديه النادرة اللي كان نفسي فيها وانا فخور أني عضو في موقعكم