سيد حجاب

[سمعجى]

عمنا السيد حجاب..
إتشرفت بالجلوس في حضرته ييجي كام مرَّة
نداهة أشعاره ما بترحمش
إللي خايف .. يبعد !!
و آدي أصل عاميته ( الموجـِعة ) في ( أرابيسك ) :

يا مركب العمر
يا مشلوح ما بين هِلبين
تِنشـَدّ بينهم .. تعيش
في الشك ما بين بين
تنفك منهم تتوه..
مندوه في بحر البين
و لفين نروح ؟! ..
يا ريت كان لي يا هوووه ..
قلبين !

ما تقولشي أصلك و فصلك
قول حليم ستار
حاتغـَمّي بايدك عنيك..
تِعمىَ الخـُطىَ و تحتار
عقلك في راسك ..
و ملزوم كل يوم تختار
عيش في الحقيقة ،
لا يندار نصلها البتـَّار
و تحِشـَّك النار .. د
و تتسوى على الجنبين

مين و ابن مين ؟! ..
الحياة ما يهمهاش أصلك
أصلك بفعلك ..
تِواصل فِعله و يواصلك
فعلك دا من عقلك..
إن طاوعته رقص لك ..
زمنك و دنياك ..
و اذا قصقصتـُه ..نغـَّص لك
زمنك و دنياك ..
فـَشوف و اختار
ما بين دربين

يا مركب العمر ..
هو العمر كام ؟
واحد !
يا عشته كله يا ضيعته ..
و عليك واحد
ما تقولشي أصلك و فصلك ..
كلنا واحد
من أصل واحد ..
و رب الكون إله واحد

تقول زماني رماني ..
أو زماني اندار
تتوه في ليل الأماني..
في موج عفي و غدار
تقول زماني عماني..
ودربي طال بي و دار
تضيع في بحر الزمن
و تعيش غريب الدار

تلقى الحياة راحت !!

و ان كان زمان الزمان..
ملا جدودك نور
و اتعصبوا بتاج دهب..
في قصور من البنـُّور
ماهُم كمان إدوا ياما..
و كل شيء بالدور
و هما برضو اللي خللوا..
بيننا الزمان دا يدور

و العالم ارتاحت !!

و ينفلت من بين إيدينا الزمان
كأنه سحبة قوس في أوتار كمان
و تنفرط لِيَّام .. عود كهرمان
يتفرفط النور و الحنان و الأمان

الشر شرق و غرب
داخل في حوشنا
حوشوه لا ريح شاردة
تقشقش عشوشنا
حوشوا شرارة تطيش
تشقق عروشنا
و تغشنا المرايات
تشوش وشوشنا
و تهيل تراب
ع الهالة و الهيلمان

الغش طرطش ..
رش ع الوش بوية
ما درتشي مين بلياتشو
أو مين رزين
شاب الزمان و شقِيت
مش شكل ابويا
شاهت وشوشنا
تـُهنا بين زين و شين
و لسة ياما و ياما
حانشوف كمان

ليه كدا يا عم السيد ..
ليه ؟!
ما انا كنت غفلان ! ..
رووح .. .الله يسامحك