قصة الامس لام كلثوم

**حسن كشك** · #1 29/07/2007, 22h03

والله الكلام ده ما طلع لحد فى حياتى الا ليكو انتو
احساس بالالفه رائع حصل بيننا
والانسان تمللى بيبحث عن من يسمعه
عشان يفضفض همومه وينعش مشاعره
ويرمى من ورا ضهره
لكن انا مش حزين ذى ما يخطر فى بالكم
لكن هى لحظات شجن
وتصدقوا ان كل اللى حصل معاهم ده
كلهم يستاهلوا لكن انا صعب اوى فى حبى
ويمكن هما ماقدروش على هذا الحب
فكان فراق وباحترام شديد ولم اجرب ابدا الخيانه من احد
والحمدلله
كفايه بقى خلتونى اطلع كل اسرارى
ومتقولوش لحد غريب

**حسن كشك** · #2 29/07/2007, 22h22

نستكمل الجزء الاخير
قصة الأمس أناجيها وأحلام غدى
وأمانى حسان رقصت فى معبدى
وجراح مشعلات نارها فى مرقدى
وسحابات خيال دائم كالأبد
هنا يصف الشاعر حاله وما يفعله فى حياته بعد الفراق
يناجى حكاية عمره التى صارت ماضى واصبحت قصة حدثت بالامس ويحلم بغد ذلك مستقبلا وهل قصة الامس هى مايحلم به مستقبلا بعد تصحيح الاوضاع لا ادرى لكن هناك امل فى مستقبل شبه فيه امنياته براقصات حسان يرقصن امامه فى معبد حبه او حياته لحظات الغد والامانى جميله لكن بجانب ذلك يذكر لنا انه ملئ بالجروح من تللك القصة التى صارت ماضيا وتلك الجروح حرمت عليه النوم واشعلت النار فى فراشه امل وعذاب حاله هو
واصبح الخيال اى تذكر ماحدث وذكرى الحبيب محيطة به كالسحاب الذى لا ينقشع ولن ينقشع ابدا ابدا يعيش فى كل ذلك كانه حرم من نور الشمس وحرم من ان يحيا مثله مثل باقى الناس فهو اسير قصة الامس والاحلام والامانى والجراح والخيال
رحم الله شاعرنا المسكين وغفر له ورحمنا ايضا
دورك يا عم الالاتى
لكن هانقل لك شعورى عند بدء الاغنية طبقا لشعورى واحساسى
تبدء الاغنية بعزف ثقيل منخفض قرار يعنى لاله التشيللو
مما يعطيك شعور بانك فى الليل وان هناك امامك كون خالى وعين تبحث فيه عن احد حى
وفجاة تعثر تلك العين عن ذلك الحى فى وسط كل هذا الخلاء فترتفع الموسيفى كانها وجدت ضالتها وتبداء الات الكمان فى العزف بصوت اكثر حده كانها وجدت من يشاطرها ذلك الليل الخالى وتدعوه لتساله ما الذى جعله مستيقظ ووحيد فى هذا الفراغ اليلى الخالى ويبدء يقص عليهم القصة
وقلت لك قبل كدا عن القطعة بتاعت
يسهر المصباح والاقداح
انا باسمعها كان ام كلثوم بتجود قران
والا ايه رايك
اتفضل ياعمنا الالاتى
وكلنا استماع
معلش العزومه طلعت تقيله اوى اوى
وساميه حضرت السفن اب والاسبرايت والفوار
بس باقولها اسمعى الاغنية بالليل ولوحدك عشان العفريت يطلعلك

**حسن كشك** · #3 29/07/2007, 22h30

ياساتر كل كلامكو واحد
برواز الزفاف
يا ستى الزفاف ده حاجه واللى حصل حاجه تانية
بصى يااختى فى برواز الزفاف وقولى لنفسك
والله كنت حلوه وجميله وكنت اموره
لكن نصيبى كدا وانا راضيه بيه
وقولى للى واقف جنبك فى البرواز ( مع احترامنا الشديد له )
دانا كنت احلى منك وخطاب كتير اوى حفيوا ورايا
انا بهذر معاك طبعا
ربنا يهنيكى ويسعدك وتفضل صورتك وصورته فى البرواز منوره الدنيا ليكو
لكن لكل منا قدره ونصيبه
شكرا لمشاطرتى مشاعرى
مع انى حاسس انك فتوه ولمضه اوى
لكن اعتز بيكى وبصدقتك
واعتبريها ياستى فضفضه وليك الاجر والثواب عند الله