دردشة موسيقية

**unicorn** · #1 09/07/2007, 21h28

حمدا لله على السلامة يا هانى فينك يا باشا ؟
و مرحبا و الف مرحب ابلة سامية
بعد اذن الاستاذ ابو حسام عايزين نزنق عم غازى يقولنا المدام المايسترو دى كانت عايزاه يغنى ايه ؟
و انا بتكلم بجد يا غازى انت صوتك حلو فعلا؟؟؟؟؟؟؟
و الله نفسى واحد من سماعى يطلع بيغنى كويس و يعمل حاجة بدلا من اسطبل الغناء اللى بره ده.....
ا/ ابو حسام تسمح لى اختار بين الاثنين ؟؟؟
بالنسبة لعبد الوهاب و السنباطى انا رأيى انها طبعا اذواق و برغم جمال الحان السنباطى و كم التطريب فى جمله الا انى افضل عبد الوهاب ذو الجمل التى تخطف الاذن و التى تكون اول مرة تسمعها و تظن انك سمعتها من قبل او انها ليست غريبة على اذنك مين يعرف يعمل مقدمة موسيقية مثل انت عمرى و فكرونى و نبتدى منين الحكاية كما قدمها عبد الوهاب ؟؟؟
و ايه كم الثراء و التنوع فى الالحان ده.
بلاش مين يعمل مقطوعة زى عزيزة مثلا و يسيبها كده دون ان تغنى او تكون مقدمة موسيقية لاحدى الاغنيات الا ملحن ثرى الاحان و ليس عنده مشكلة فى عمل الحان فى اى وقت و على مزاجه.
عبد الوهاب عبقرى و فذ و متميز , الله يرحم الجميع.
بالمناسبة حد عنده مقطوعة عزيزة بس جيدة الصوت غير الموجودة فى صفحة عبد الوهاب , انا سمعتها فى احد الفضائيات عاملينها حلو اوى بس على كليب راقص كده .
و لى مع هذه المقطوعة ذكرى اننى كنت فى فرح فى المحروسة فى اسكندرية سنة 1991 و كان الباند كبير جدا بل اجمل باند افراح اراه و الباند ده كان بتاع متعهد حفلات نادى سبورتنج و اسمه نديم سماقية. ,كان فيه كى بورد و درامز و الات نفخ نحاس و كمان و عود و رق و طبلة و كانت اللى بتضرب الطبلة واحدة اسمها صباح ,المهم اول حاجة يعزفوها فى الفرح كانت عزيزة و لا تتخيلوا مدى الجمال و الروعة التى سرت فى القاعة و مدى تفاعل الناس مع المزيكا علما بأنه حتى هذه الفترة لم يكن شائعا ابدا تفاعل الناس مع الباند فى الافراح , و طبعا دلوقت التفاعل اصبح على ودنه على نغمات العنب العنب و النهاردة فرحى يا جدعان

**الألآتى** · #2 10/07/2007, 02h16

مع إحترامى طبعاً لكل الأراء .. وباحب مين وماحبش مين .. دى أذواق .. وتعدد الأذواق .. شئ مطلوب ويؤدى لتعدد المدارس الموسيقية ..

ولكننا ياجماعة لسنا فى صدد المفاضلة بين ملحن وأخر .. نحن نبين أساليب كل ملحن ومميزاته ..

أنا شخصياً يعجبنى فى عبد الوهاب أشياء .. ويعجبنى فى السنباطى أشياء .. المسألة ليس لها علاقة بالشعبية والإنتشار ..

وبالمناسبة .. أين فطاحل المنتدى .. بيتفرجوا من بعيد ولا إيه ؟؟

فين المتخصصين .. فين السميعة والذواقة .. يادى النيلة ..

**غازي الضبع** · #3 10/07/2007, 06h14

السلام عليكم ورحمة الله وبركاته
حبيبي الأستاذ أبو مندور
تعرف إن موسيقى عزيزة هي السبب في تعرفي على منتدى سماعي ، حيث كنت أبحث عنها في كل حتة في مصر ، وسألت الشركات الكبيرة زي صوت القاهرة وصوت الحب وراندا فون .. ومالقيتهاش خالص غير في موقع لعبد الوهاب بس تسمع فيه الأغنية بس ، يعني ماينفعش تحملها .. وفين وفين على بال ما لقيت نتيجة البحث جابتني هنا في سماعي ، ومابقتش مصدق نفسي ، لدرجة إني كنت باحلم بسماعي ، وعلى طول في اشتياق لأعرف جواه إيه تاني ..
طبعا موسيقى عزيزة دي أنا لو بإيدي أدي لعبد الوهاب أوسكار عليها لوحدها .. موسيقى في منتهى الجمال .. ومش عايز أقوللك إن من ساعتها ( من سنة ) وأنا كل يوم أسمعها .. لدرجة إن عندي في البيت لو ماشغلتهاش في يوم .. بييجوا يطمنوا عليا ..

أما بالنسبة للزنقة اللي عايز تزنقهالي بتاعة حكايتي مع الغناء .. فهي يا سيدي ...
ما بلاش ..........
بلاش بلاش .. خلينا كده حلوين وزي الفل

سلام

**unicorn** · #4 10/07/2007, 13h01

اقتباس:

المشاركة الأصلية كتبت بواسطة الألآتى

ولكننا ياجماعة لسنا فى صدد المفاضلة بين ملحن وأخر .. نحن نبين أساليب كل ملحن ومميزاته ..

أنا شخصياً يعجبنى فى عبد الوهاب أشياء .. ويعجبنى فى السنباطى أشياء .. المسألة ليس لها علاقة بالشعبية والإنتشار ..

عندك حق يا استاذ محمد

احنا خرجنا عن الموضوع الاساسى و دخلنا فى المفاضلة بين الناس الكبيرة دول , معذرة يا باشا .
بس انا حبيت اسألك سؤال هل تستطيع تمييز الحان السنباطى ؟؟؟؟ يعنى اذا كان مثلا لعبد الوهاب طابعا موسيقيا مميزا فهل لسنباطى ايضا طابع مميز يمكن عن طريقه معرفة ان صاحب اللحن هو السنباطى؟؟؟؟
اصل انا كان نفسى اعرف ملحن انا قلبى دليلى لليلى مراد و ان كنت ناسى افكرك لهدى سلطان لاعجابى الشديد بجمال اللحن و عرفت انه السنباطى و لكنى لم اقدر على معرفة ذلك بنفسى .
فهل موسيقى ممارس للموسيقى مثل حضرتك يستطيع هذا التمييز؟؟؟؟
نيجى للاستاذ غازى المتعب
انت مش عايز تقول ايه اللى حصل؟؟؟؟؟
الانكار مش حايفيدك.....
حاتقول و لا تيجى قدام البيه المأمور و تقول.....
لأ بجد يا باشا شوقتنا فعلا نعرف الست المايسترو دى قالتلك ايه؟؟؟؟؟؟

**الألآتى** · #5 10/07/2007, 19h33

طيب .. نكمل ..

نرد عليكم فى الأول وبعدين نمسك فى إثنان آخران من الملحنين ..

بالنسبة لمقطوعة ( عزيزة ) عشق الأستاذ أبو مندور ..

نتكلم عنها شوية .. وأهو كله كلام فى المزيكا ..

هذه المقطوعة برغم جمالها وحيويتها وإعتبارها من أعمال عبد الوهاب الموسيقية المميزة .. لكنها ليست أحسن مقطوعاته ..

ولا نعتبرها من عبقريات عبد الوهاب لبساطة تنفيذها .. وربما هذا هو سر جمالها ..

تعتبر ( عزيزة ) من قوالب التحميلة .. برغم إيقاعها الراقص .. والتحميلة ياإخوانى عبارة عن جملة رئيسية يتم عزفها بجميع الألآت .. وتتكرر هذه الجملة على مدار التحميلة .. ويتخللها جمل موسيقية للألات المنفردة ..

والألات المستخدمة هنا هى ( الأكورديون ، الناى ) مع ملاحظة وجود الكمان والقانون فى جمل قصيرة جداً ..

وواضح طبعاً أن الألآت المستخدمة شرقية .. ولا وجود للنحاسيات والخشبيات فى المقطوعة ..

يستعمل عبد الوهاب فى مقطوعته .. مقام ( الكرد ) وهو المقام السائد طوال المقطوعة .. فيما عدا تحويلات قصيرة لمقام النهاوند المجاور للكرد .. والجزء الأخير من المقطوعة يستعمل مقام العجم ( الميجور ) ثم يعود للكرد لينهى مقطوعته ..

وقد إستعمل عبد الوهاب طريقة السلم الملون ( كروماتيك ) بين أجزاء المقطوعة .. ليستقر على سلم مقام النهاوند ليبدأ الجزء التالى ..

ولايمكن أن ننهى تحليلنا البسيط هذا قبل أن ننوه لطريقة عبد الوهاب فى إنهاء المقطوعة .. فقد أنهى المقطوعة بنغمة معلقة .. كيف ؟

المفروض أن ينهى الأستاذ عبد الوهاب مقطوعته على درجة ركوز مقام الكرد ( الرى ) .. أو حتى النهاوند ( الصول ) .. لا مانع .. ولكنه أبى أن ينهى المقطوعة كأى موسيقى .. فأنهاها على نغمة المى بيمول .. وليس على نغمة الرى أو الصول .. والموسيقيون يسمون هذه القفلة .. قفلة معلقة .. وهذا هو عبد الوهاب ..

بالنسبة لسؤالك ياأبو مندور .. عن مدى معرفة أسلوب السنباطى .. ذكرنا من قبل .. أن السنباطى يتميز بضخامة موسيقاه ويحب أن يستعمل الأوركسترا بكامله .. وككل ملحن .. يفضل السنباطى إستعمال بعض الجمل الموسيقية المميزة .. حين تسمعها تعرف أنه السنباطى .. إسمع مثلاً مقدمة أغنية ( عايز جواباتك ) ومقدمة أغنية ( على عينى بكت عينى ) وقارن بينهما .. ستجد تشابهاً كبيراً فى الجمل الموسيقية .. كما يحب السنباطى إستعمال أسلوب ( الأدليب ) فى موسيقاه )

والأدليب ياسادة .. هو بداية اللحن ويكون العزف بدون إيقاع .. أى عزف يعتمد على إشارة المايسترو .. ومعظم أعمال الستباطى الكبيرة هكذا .. أدليب ضخم بعرض الوتريات .. يمكنكم الأن معرفة أسلوب السنباطى بمجرد سماع أحد ألحانه ..

أما الأخت العزيزة ( سامية ) ..

فأنا مش زعلان .. أنا مبسوط بيكم جداً .. ولكنى كنت أحب تواجد موسيقيين غيرى حتى نثرى الموضوع أكثر .. وعموماً البركة فيكم .. وسنستمر بإذن الله .. لأننا نتحدث فى شئ نحبه جميعاً ..

وسأعمل بإقتراح أخانا أبو مندور وأتحدث عن على إسماعيل وأندريا رايدر وفؤاد الظاهرى بصفتهم من أشهر الموزعين وواضعى الموسيقى التصويرية للأفلام .. فإلى الرد القادم ..

**غازي الضبع** · #6 11/07/2007, 13h13

بعد كل هذه المناجاة
وكل هذا الاستفزاز الفني
وكل هذه المحبة ..
بس خلليكوا فاكرين إن إنتوا اللي عايزين
وأنا نبهت قبل كده ، وقد أعذر من أنذر ..

مضطر أكمل لكم الحكاية ..
بعد أن تقابلت مع مدام عصمت ( الله يمسيها بالخير إذا كانت لسه موجودة ) .. وهي بعد أن سمعتني - يا سامية - بدندن كده أغنية يا تمر حنة لفايزة أحمد مع صاحبي اللي حكيتلكم عليه بتاع الأكورديون بصحبة كام واحد من زملاؤه في الفرقة .. جات واتعرفت عليا وقالتلي : صوتك حلو بس عايز يعلا شوية عن كده ..
قولتلها : ربنا يخليكي دا انا كنت باهزر يعني مش باغني بجد ..
قالتلي : لا والله صوتك فعلا حلو ..
وراحت فاتحة الأورج اللي أمامها .. وقالتلي طب إنت حافظ إيه تاني ..
قلت لها : حافظ كل أغاني عبد الحليم وشوية لطلب وشوية لعبد الوهاب ..
قالتلي : مش حافظ حاجة لمحمد فوزي ..
ضحكت وقولتلها : يعني مش كفاية اللي قولتلك عليهم دول ..
قالتلي : حافظ مال القمر ماله..
قولتلها : آه
راحت عاملة المقدمة بتاعتها على الأورج وقالتلي : سمعني
طبعا قعدت اتنحنح ، واعمل نفسي باسلك في صوتي ، وابتديت .. مال القمر ماله .. ماجيناش على باله ..
وبعد ما خلصت حسيت إنها هاتقولي ماشفش وشك هنا تاني ..
واحتمال تطرد صاحبي دا من الفرقة كمان ..
لكن الحقيقة حصل العكس تماما ..
لقيتها معجبة قوي بصوتي ، وقالتلي طيب تستناني بعد البروفة .. نكمل .. ولا إيه رأيك تخش معانا في البروفة ..
كانوا بيعملوا أغنية قمر له ليالي للأستاذ داوود حسني
قولتلها مش حافظها .. قالتلي أقعد اسمعنا وشوف احنا بنعمل إيه ..
لكني مش عارف ليه حسيت إني مكسوووف فاعتذرت وقولتلها طيب هو أنا أصلي عندي مشوار مهم دلوقتي ، ينفع آجي لحضرتك يوم تاني .. قالتلي مافيش مشكلة .. خلليها بعد يومين .. مستنياك .. إوعى ماتجيش ..
ومشيت وأنا حاسس إني خلاص وصلت ، وباقول في عقل بالي ..
الظاهر إن العندليب هايرجع تاني ..
ورحت قعدت أسمع في أغاني محمد فوزي كلها ..
آه .. نسيت أقوللكم إني سألتها إشمعنى محمد فوزي ..
قالتلي : عايز تتعلم الغنا إسمع محمد فوزي ، وشوف مخارج الكلام منه إزاي ..
قعدت أسمع أغاني فوزي كلها اللي طبعا أنا عارفها وحاببها ، بس المرة دي كان لها طعم تاني خالص ، وحسيت فعلا إن كل الحروف خاجة منه واضحة جدا ، وكل النغمات متقسمة وباينة وواضحة على الآخر ..
وحفظت أغلب أغانيه اللي سمعتها ..
وانتظرت اليومين يعدّوا..
إلى أن جاء اليوم المعهود .. ولبست واتشيكت وشربت يانسون طبعا قبل ماروح .. ومارضيتش أشرب ولا سيجارة ( أيام ما كنت بادخن ) ..
وتوكلت على الله ورحت لمدام عصمت ..

وإلى لقاء آخر إن شاء الله
غازي

**unicorn** · #7 12/07/2007, 03h01

استاذنا / ابو حسام

الله على شرحك البسيط و تحليلك الموسيقى السهل فعلا فى منتهى الجمال يا استاذ محمد
انا كنت بشوف فى الموسيقى الالية قوالب السماعى و اللونجا و البشرف و التحميلة و لا افهم ماذا تعنى هذه المسميات و الان قد عرفنا واحدة و هى التحميلة .
و بالنسبة لمزيكا عزيزة يا استاذ ابو حسام تحليل حضرتك لها هايل و بالذات كلمة (ولا نعتبرها من عبقريات عبد الوهاب لبساطة تنفيذها .. وربما هذا هو سر جمالها ..)
عجبنى اوى تلخيص حضرتك لها فعلا لحنها بسيط جدا و سلس جدا و تألفه الاذن التى تسمعه لاول مرة بسهولة و هذا شأن عبد الوهاب فى معظم الحانه..... السهل الممتنع الذى لا يأتى به سواه.
و اكيد طبعا دى مش احسن الحانه و انما كانت احد الامثلة التى ارويها على عبقرية عبد الوهاب التى هى فى رأيى البساطة الشديدة فى اللحن و صعوبة التنفيذ .
و زى ما قلت لحضرتك على اسماعيل (الذى و عدتنا تكلمنا عنه ) استطيع ان اميز الحانه بسهولة و لا استطيع ان اقول كيف فلا املك قدرة التعبير الموسيقى الرائع الذى تملكه حضرتك لاحترافك بالموسيقى.
اما عن انتظار حضرتك لاحد الاعضاء الموسيقيين ليحمل عنك قليلا كثرة اسئلتنا فأكيد ا/ احمد الديب بيتابع من بعيد و منتظر لحظة ما ليدخل مع حضرتك.
شكرا على سرعة ردك يا استاذ محمد و منتظرين نفاذ وعدك .
نيجى لابلة سامية التى لا تريد ان تشاركنا برأيها برغم تأكدى من حسن ذوقها و سلامة حسها الموسيقى و التى تقول انها ليست متخصصة فى الموسيقى طيب ايه رأيك نقفل الصفحة دى خالص و نقفل المنتدى كمان لان المتخصصين فى الموسيقى امثال ا/ محمد الالاتى وا/ احمد الديب قليلون جدا
ده احنا لسة كنا بنقول حانفتح معهد موسيقى على ما تفرج ....ياعنى شايفانى انا و غازى متخصصين اوى؟؟؟؟ ما احنا عمالين نسأل ا/ محمد و بنحاول نعرف ؟؟؟
هو يمكن يكون الاستاذ غازى اكثر تخصصا و ده حايظهر بعد ما يخلص حكاية المايسترو عصمت....
والله خلتنى اضحك ضحك يا غازى على اسلوبك و طريقة سرد الحكاية و بالذات لما ابتديت تسلك زورك و تتنحنح و تشرب ينسون و عملت الواد المطرب اللى ماحاصلش
و مش عارف ليه جاه على بالى ان المايسترو عصمت دى شبه المطربة اللى فى فيلم دليلة (بتاعت الحلو فى الفراندة شاورلى و بص لى و القلب فى الزمان ده بسرعة بيتملى)
كمل يا غازى الموضوع يزداد سخونة و شديتنا اكتر.......

**unicorn** · #8 12/07/2007, 03h19

نسيت اسأل استاذ محمد الالاتى
اغنية حبيب الروح لليلى مراد الحان السنباطى؟؟؟
هى ينطبق عليها المواصفات التى قلتها حضرتك من حيث ضخامة البداية بكامل طاقة الاوركسترا بس بالنسبة للادليب ما اظنش لان الايقاع فيها شديد و قوى.