اقدم لكم اليوم هذا العمل ل سيد درويش من توزيعي
دا وقتك دا يومك يا بنت اليوم
الاغنية ذات نفسها كانت بتناقش وضع المرأة المصرية في المجتمع و اكتسابها للحقوق المشروعة زي حق الانتخاب و العمل و خلافه
و لكن الكلمات انا شايف ان لها معني سياسي تاني موجه لمصر مش للمرأة المصرية ( اعتقاد شخصي ان دا اسقاط للمطالبة بالاستقلال في الوقت دا )
يعني مثلا من الكلمات :
قومي اصحي من نومك ب كفاياكي نوم
ليه ما نكونشي زي الغربية .. و نجاهد ب حياتنا ب حرية
و اشمعني في اوروبا الستات
لهم صوت في الانتخابات
بالنسبة للعمل نفسه
هو من رواية الانتخابات من تأليف امين صدقي
و الاغنية برضه من كلمات امين صدقي
و تقديم فرقة علي الكسار
و الحان سيد درويش طبعا
سنة 1923
المحزن ان سيد درويش توفي قبل عرض العمل ب 17 يوم لأن تم عرضها يوم 27 – 9 – 1923
يعني ما لحقش يشوف نتاج عمله للأسف
و قام ب اكمال الرواية الملحن ابراهيم فوزي ..
من 89 سنة تم تقديم العمل و ما زال مصدر الهام للكثير من الموسيقيين
سيد درويش دايما كدة
كلمات الاغنية :
ده وقتك ده يومك يابنت اليوم
قومي اصحي من نومك بزياداكي نوم
وطالبي بحقوقك واخلصي من اللوم
ليه مانكونشي زي الغربية
ونجاهد في حياتنا بحرية
شطارة شاطرين قدارة قادرين
مين في خفتنا ودردحتنا مين
معانا شهادات ودبلومات
ونعرف بولوتيكا بالسبع لغات
ليه مانكونشي بقى ليه
زي الراجل ليه
قولولنا هو زايد عننا ايه
ليه مانكونشي زي الغربيه
ونجاهد في حياتنا بحريه
شطارة شاطرين قدارة قادرين
مين في خفتنا ودردحتنا مين
ليه جوزي اللي يتعب تملي
ليه يشقى وانا قاعدة في محلي
أتعاون في حياته وحياتي
وتروق له العيشة وتروق لي
إشمعنى في أوروبا الستات
لهم صوت في الانتخابات
إحنا كمان لازم نفوقهم
هنا في بلادنا ونبقى فوقهم
دي المصرية من نشأتها
مفيش زيها ست في بيتها
إن كان في محبة بلادها
واللا في تربية أولادها
اللحن موزع بشكل للوتريات دخول وتريات بيزكاتو ثم للنهاية وتريات مع ظهور للهارب علي استحياء
احب اقول برضه ان اللحن الاصلي في الكوبليه التاني ( معانا شهادات .. و دبلومات ) بيتحول للبياتي
اللحن الاصلي هو اللحن التاني
http://www.sama3y.net/forum/showthread.php?t=96383
و لكن لما حاولت اشرق النوتات علي البرنامج .. الصوت الصادر كان غير مرضي .. و دا يثبت ليا ان فعلا الربع تون حتي الأن مهما برامج حاولت تنفيذه .. لا يمكن هتكون زي العفق الحقيقي .. عشان كدة استغنيت عن ارباع التون .. و اللي شجعني ان العمل كله فيه هارمونيات و دا يشجع علي التخلص من الربع تون بتقريبه لاقرب نص تون و خلصت القضية
و لكن لو قدامي فرصة ب عازفين حقيقيين .. اكيد هاعيد الصياغة ب شكل يحترم الارباع و البياتي لأني شخصيا بحب البياتي و لكن تنفيذ الربع تون بالبرامج او حتي بالاورج مع تغيير ال pitch مش قد كدة .. اقتناعي انه لازم واحد يلعبها ب نفسه
و في النهاية احب اهدي العمل لأستاذي العظيم / احمد الجوادي علي نصايحه الدائمة و توجيهاته الموسيقية
و كلمات الشكر و التقدير لا تكفي للتعبير عن تقديري و احتراماتي لشخصه الكريم
ارجو من حضرتك استاذ احمد النقد و بكل قسوة عليا ان امكن .. عشان اعرف مدي استفادتي من توجيهات و نصائح حضرتك
اتمني العمل يعجبكم و تستمعوا بيه
بالنسبة لي كان تجربة موسيقية وعدت من ضمن تجاربي
استمتعت بيها و اتعلمت منها الكثير
شكرا
سيد درويش - دا وقتك دا يومك يا بنت اليوم
العرض الشجري