اقتباس:
المشاركة الأصلية كتبت بواسطة ناصر دويدار
(ولــــــــــــــــــــد)
ما بتباتشى ف قلبه
حاجة وحشة لحد
ولو جات الليالى عليه
بيزرع سقف روحه ورد
ويصحى الصبح وكأنه
بيملك وحده كل الأرض
(ولــــــد تـــــانى)
ما تعاتبونيش ع اللى ما قدرتش أصونه
ماهو كلكم بتخونوا
(ولــــد تــــــالت)
من كتر قلبه ما أتعبى كلام
وشه أتحول لعلامة أستفهام
(ولـــــد رابــــع)
أنا أكبر قصيدة شعر فى بلادى
يسبقنى تروماى تسبقنى عربية كارو
يسبقنى طبال
عـــــــــــــــــــــــــادى
أنا أكبر قصــيــــدة شعر فى بلادى
(بلكونـــــــــــــة)
زارع ف بلكونة عيونى ورد
عشان ما أشوفش هجوم طيور البرد
عشان ما أشوفش الليل للنهار بيشد
عشان ما أشوفش الدنيا بتذل حـــد
زارع ف بلكونة عيونى ورد
مع أنى جرح كبير ماشى على الأرض
(نعنــــــــــــــاع)
ف القلب لسه مــســـاع
يدخله عود نعناع
أخضر يطرى القلب
ويقسمه أرباع
وكل ربع يشيل
شوية م الأوجــــــــاع
(حــــــــــــصـان)
لما الزمن بيدور
على حصان مغرور
تلقاه خرج م السبق
وعلقوه ف حنطور
(حــــــــــــــمـار)
حرك ودانك
يمينك شمالك
وأرفص ونهق
ماهو ده زمانـــــك
(حـــــــزيـــــــــن)
حزين جـــداً
حزين خــالص
حزين فعلاً
سبب تافه لأحزانى
وقفت أشب يم البحر
أشوف ضلى
ولما رجعت ما لاقيتنيش
لاقتنى بس واحد تانى
كان قاعد وبيعيط
على واحد وقف مرة يشوف ضله
ماجاش تـــــــــــــانــى
(كــــــــــــــــدب)
مع أنها كدابة
وعارف أنها كدابة
ومتأكد أنها كدابة
لكن ساعات وأنا المايسترو الكبير
عازف جميع الآلات
بحب أسمع صوت الربابة
|
الأستاذ ناصر دويدار
مرحباً بك فارساً على صهوة الشِعر * * * * *
أحد السمّيعة أخذه الوجد عند استهلال التلاوة من سيدنا الشيخ عبد العزيز على فرج ، فصرخ قائلا:
حسبي الله و نعم الوكيل فيك من أول الليلة !
مش عارف إيه اللي فكرني بالراجل ده ، لما قرأت عُقد الدواهي اللي فوق ده ، مع إن الحكاية مالهاش علاقة ، لا بدمنهور و لا بالشِعر ؟
* * * *
إوعى - يا عم انت - تصدّق كيمَك في موضوع : شاعِر على درجة صاحب مدرسة
ده هوّ عمّال يروّج للإشاعة دي علشان يخلع من إلتزاماته تجاه تعليمي .
* * * *
كمان فيه هنا قنديل شِعر عاميّة ، إسمه : الأستاذ رائد عبد السلام ، بس زي ما تقول - كده - هوّ زهقان مننا بقاله كام يوم ، لكن هوّ عودنا على كده ، يكِن له شوّية ثم يخرج علينا زي مارد الحكايات ، بحاجة تِشغلنا كام دهر ..
* * * *
أنا فرحان بيك يا أستاذ ناصر دويدار
ربنا يفرح قلب دمنهور
***
شكراً يا عمّنا الأستاذ علاء قدري ، على هداياك المُبهِجة
__________________
أستغفِرُ الله العظيم وهو التوّاب الرحيم
رد: قصائد قصيرة
رد: قصائد قصيرة
العرض المتطور
