مِحْنـَـــــــة
إحنا ف محنـَـة !!
مش عارفين أيه اللي جـــرى لْنا وغيَّر حالنا في غضمة عـين
ولا شايفين سكّة لخطاوينا ولا عــارفين على فين رايحـــين
مجانين؟ والاَّ الوهم سرقنا ونام ف عنينا ومش حاسّــــيـن
مُولد رغي وكدب وفوضى، سكاكين نازلة على المســاكين
واقف شايف حاجة غريبة.. أصرخ أصرخ مش سامعـــين
واقف شايل هَــــمّ متلتل.. إيدي قصيرة وقلبي حزيــــن
النار شابطة في روحــــي وبانزف
أشكي لمين؟ أعتب على ميـــــــن؟
القاتـل واقف قُــــــدَّامي .. يتغابى .. يـــدوس القوانين
والمقتـول بيشيل التُّهــــمة .. والجـــــاني بياخُد نياشــين
واللي لجأنـــــا إليه يحمـــــــــينا بيتعلّم فينا التنشـــــين
كُلّ آلام الدنيا بحالهـــــــا.. في الضلمة بتعرف مطارحـنا
إحنا في محـنـة
ياما سْكِــتنا وقُلنا: تْعَــــدّي ، واتحمّلنا عــــــذاب وآلام
ودارينا وكتمـــنا الشكــــوى ، يمكــن تـصالحنا الأيّــام
أو ينصفنا الحـــظّ في مرَّة ونحقَّــــق شـــيء م الأحــلام
أتارينا في الوهــــــم غرقنا.. صدّقنا خداع الأوهـــــــام
نتصبّح بوعود كدّابــــــــة .. نتمسَّى بكـــلام في كــلام
نتخدَّر بالضحكة الصفرا.. ونْمَصْمَصْ ونقول: يا ســلام
والنَّار تحت هدومنا بتنحَـــــر .. ونغَمَّضْ ع النّار وننـــام
واما نفوق على كارثة يوماتي... لا نحاسب ولا حتى مـلام
إللي لجأنا إليه يحمينــــا.. غَدَّار بيعيــش ع الإجـــــــرام
بياخُدنا في أحضانُه يطبطبْ !!
ونآمِـنْ .. في الحــــــال يجرحنــا
إحنا ف محنـة
***
إحنا في محنة كبيرة وحالنا..
يصعب ع الكافر والجاحــد
حتّى الأعداء قالوا: يا عيني.. وبَكَانا من قلبُه الحاســــــد
الفرحــة بتجمعنا ثــــواني.. وبعد ثــــواني نقوم ونعانـد
ونولَّعها نيــــران ومعـــــارك ونشارك في الشّـرَ نساعــد
بإيدينا نُحفُر في قبورنــا وع الأحــــــزان نرجـــع نتعاهد
نعمي قلوبنا ونلغي ضميرنا وننسى مصيرنا وضده نجاهـد
آدي مصايـــبنا، وآدي تخريبنا على عمايلنا ح يفضل شاهـد
المستقــــبل راح يرفضنا ويرمينا ف ْنســــيانُه البــــــارد
والأجيال الجــايّه تلومنـــا
تُشطبنـــا ، وتنكـــر، وتباعــــــد
بِطَمعْنَا بنحــــرق في وطننا. ونسينا ان المركب واحــــــد
على أطلالنا شَنَقْنــا أملنا
وفي حبل الوهــــم اتـمرجـحنــــا
إحنا ف محنـة
***
(( من ديوان : " إذا الشّعب قال...... " ، من أزجالي ، يصدرُ يومَ الثلاثاءِ المقبلِ بإذنِ الله ..))
رد: بشير عياد مصري حتي النخاع
العرض الشجري