رد: جوز المرتين
أبدأ كلامى منين
لاخوانا والسامعين
بتوع ياليلى ياعين
ومزاج عنب مع تين
أبدأ كلامى بسلام
وإيدى أهى قدام
أمدها بالسلام
للى هنا قاعدين
أعرفكو يا اخوانى
أنا أخوكم هانى
من كل وجدانى
ليكو م المحبة خزين
دى أول مشاركاتى
معاكو يا اخواتى
وابقو اسألو حماتى
منيشى جوز الاتنين
أنا شدنى العنوان
وشفت نور المكان
قلت أدخل وبقى هيبان
أيه هوه جوز الاتنين
بصيت فى أول صفحه
أقرا معايا الفرحه
وأم مدحت طايحه
تطرقع لجوز الاتنين
يا ام مدحت ليه
الحلو تقسى عليه
هوه عمللك أيه
أخونا جوز الاتنين
أولى تشوفى الأسباب
وتحسيبلها حساب
وما تفكريشى انه خاب
راجل معاه اتنين
أكيد دا عنده ظروف
م الفتنه عنده خوف
ومنع لسانه الكسوف
أخونا جوز الاتنين
ومراته عيانه
تايهه وبهتانه
م الشغل تعبانه
الحل يبقو اتنين
وللا عليه قاسيه
والكلمة من راسها
وهوه الراجل ناسيه
وعليه بتحلف يمين
أو للنكد بتحب
دايما فى وشه تهب
وهيه ماشيه تدب
برجليها الاتنين
أو مهمله فى بيتها
تليفونها شغلتها
ما قادت نيران بيتها
لطبيخ ليوم واتنين
أو مشغوله بالعيال
عمال مع بطال
شاف الراجل اهمال
فكر يكونو اتنين
أو عندها اسباب
تمنعها م الانجاب
فكر أخونا وجاب
التانيه وبقو اتنين
أو عندها تبذير
تفنى قليل وكتير
وتبص بقى للغير
م الحاجة عايزه اتنين
أو أمها زقاها
لقرفه ومسانداها
لأنه خالف هواها
وليه ماقالشى آمين
كتير ياما الأسباب
عايزالها ألف كتاب
علشان يكون الحساب
عادل لجوز الاتنين
قومى يا أم مدحت ياختى
راجعى بقى ما كتبتى
لأنك انتى ظلمتى
أخونا جوز الاتنين
يا أختنا فى الله
شعرك جميل ما احلاه
يديم عليكى الإله
نعمه ليوم الدين
وفى النهايه التحيه
ودعوه معاها أمنيه
يارب إفتح عليه
واجعلنى م الشاكرين
|
العرض الشجري