أغــــرب المخلـوقـــات !!

[M O H A M E D]

المشاركة الأصلية كتبت بواسطة ريما

يااااااااااااااااااااه يا محمد افندى وربنا اصبت كبد الواقع

وطبعا من غير ما اقول تسلم اناملك هى فعلا جميلة وواقعية

واحلى حاجه فيها انك فعلا تحسها متلحنة ومتغنية كمان

منتظره المزيد والمزيد ومتكسلش كالعاده

صحيح يا محمد افندى مش ناوى تكمل حكاية محمد والطيارة

ريما هانم

يااااااااااااااااااه انتي لسه فاكرة حكاية محمد ؟؟

دا زمانه زهق مني و قطع طيارته ..
و يمكن اتخرج من الجامعة و اتجوز و جاب تلت اربع عيال

أشكرك يا صديقتي العزيزة ... أسعدتني طلتك على الموضوع

سلام

[Tarek Elemary]

الفنان المعبر محمد السلامونى
أنا مستغرب إنك مستغرب قول زوارك إن دى مقومات رجال هذا العصر
يا سيدى كله بقى هلس فى هلس
و الحكام أقزام .... مش طايقين لوام
وأصحاب الملايين .... من جوه فاضيين
عايزين بهلوانات .... يقضوها حكايات
قلنا و قالوا ..... و كله بماله .... ياكل بلح أمهات
ربنا يعفوعنا وعنك

[M O H A M E D]

الأستاذ طارق العمري
انا مش مستغرب لكني حزين أن نقبل بهذه التغيرات
و نسلم بوجودها ، إلى أن تصبح هي القاعدة !

أشكرك يا أستاذ طارق
و أرحب بك في منتدى سماعي ،
فكتاباتك و آراءك تدل على أنك مكسب كبير للمنتدى
نتمنى أن تسعد بالمنتدى كما نسعد بك
تحياتي يا فنان

[Tarek Elemary]

الكرم من أهله (منك) ورد نادى
و الذوق من أهل الذوق .. عادى
منتداكم يا حبايبى حضن دافى
يجمع العطر المعتق من بلادى

[عادل فؤاد رفاعى]

معلهش الموضوع قديم جدا.لكنى معجب جدا بهذا العمل الرائع .فما أكثر الإنتهازيين والوصوليين والآكلين على كل الموائد

[عفاف سليمان]

المشاركة الأصلية كتبت بواسطة محمد السلاموني

أغرب المخلوقات

__

الـــدلـــدول لـــو مـــرة يقــــول بيبقــى كـــــلام متعـــــاد
فــي الأفـــــراح أجدع رقـَّاص ، و ينـُوح في الجنــازات
مُـــفلس لكـــن غـــاوي ظــهور .. قـــوم يعمـل حـركات
طبلــة تـرن و صوتهـــا العـالــي طـــالع م الفـــــراغـات
علــــى مصلحتــــه بــس يدوّر .. يعشـــق كلمـــة هــات
تــاكــل ؟ أيــوة يــا ريــت تدينــي و زوّد في السلــطـات
تــدفــع ؟ إيــه ؟ مـش سـامع صوتك .. انده ع الأمـوات
ينقـــل كلمـــة و هو بيصــــرخ : أنـــا بعـــرف بشــوات
وقـــت الجد تملــِّي بيهـــرب .. يظهـــــر فــي التفــاهات
وشـــه جميــــل تــــلاقيه متبســِّم و بيــــــرسم ســـلامـات
أحلــى كـــلام و حبيبــي و بــاشـا و غيـرها من النفـَخَات
و مـــن ورا ضهــــرك عينـــه تبـــرّق و يصـــب اللعنات
أمــــا صحيــــح الدنيـــــا دي فيهــــا يــامــا من الحشرات
حــاجـــة عجيبـــة غريبــــة مصيبـــة زادت م الأزمــــات
لمـــا النــــوع ده تشـــــــوفه بيكبـــــر و يســود الأسياد !!

**

المشاركة الأصلية كتبت بواسطة محمد السلاموني

الكــــــداب مــــن كدبــــــــه بيـزهــــق لـــو عـــد العـــــداد

يفشــــر ، ينصــب ، ينــزل ، يطلــع ، يلمــع في القعـَــدات
يكسب يكسب يكسب يكسب كــل مـــا بـــاس مــــــداســــات
اللبــــــلاب علـى خيـــطه بيمشــــــي و بيوصـــل سمــــوات
مــن غيـــــر صــوت و دا فجـــأة بيلدع و لا أخطـــر حيَّات
لمــــا تشـــوف الدنيــــــا جميـــلة و لا فيهـــــــا غيــــامــات
تعـــــــرف إن صــاحبنــــا مفــــــارق و بعيــــد بالمســافات
و امـــا تـــلاقـــي الدنيــــــا تمطـَّـر و بتبعـــت رَخـــامــــات
تعــــــــرف إن معـــــــــاه سنـــــارة بيصطـاد في العكـارات
عــامــل فيهـا جميـــــل و مــــــؤدب و يصــــون المقـــامات
و هُـوَّ لـــه في جبـــــــال الخِســَّة يــــامـــا مـن العـــلامــات
طعـــــم الحلـــــو فـ بؤه بيحلــــى لو غيـــــــره قـــال هـــات
ويـَّـا حــــــرارة شــــــوقـــــه لكلمـــــة تبــــرَّد نــار الـــذات
قـــام م الفــــرحة يغنـــي و يـــرقــص إنـــــه بتـــاع حسنات
داهيـــة تشيـلك ، آه يــــا منـــــافـــق .. شــرَّك هو الزاد ؟؟

**

اخى الكريم
صاحب اجمل كلمات
ثوريه رائعه
(((د محمد السلامونى)))
كلماتك لها ابعاد كثيره
من زماااااااااان
واحنا بنقول
من زمااااااااان
واحنا بنتكلم
ومكنش حد عايز يسمع صوتنا
ومن الحسره كنا بنتألم
خلاص عدى الزمن وولى
والطغيان راح وخد معاه
ما خلااااااااااا
خد الفاسد والعاصى
واليوم راح ترتاح راسى
من الم الظلم والمعاصى
وبكره بأمل جاى ينور
عقلى وراسى
تحياتى لك اخى الكريم
وتحياتى لكل
شعب مصر الاصيل
دمت لى وللجميع بخير
اختك عفاف

[هدى دولت]

أستاذي محمد السلاموني
جسدت واقع حي ...
جاءت سطورك نابضة بالحياة
وعقدت بيننا وبين حروفك صداقة مألوفة
لشدة البساطة المغلفة برقة الإحساس
ورقى اللفظ ...
مع التحفظ الشديد للفظ " داهيه تشيلك "
فقد أحسست أنك إستخدمته بإستحياء شديد
إستخدام المتردد ولكن الواقع فرض نفسه
فقد كان مخرجاً فهو معبر بصدق عن إحساسك الرافض
لهذه التركيبة الإنسانية المنفره
فجميعنا نعرف حكم المنافق في الإسلام ..نفور فطري ...

ننحنى لهذا الصدق الناطق بسلاسه ويسر دون تصنع
بطبيعية شديدة عبرت يا مُبدع ..
يا مالك لزمام المعاني
وننحنى لهذا الحب الرقيق لهذا الفنان
أرق صوت عرفته مصر
بإبن مصر الآتي من نبض الشعب الحساس العالي
قمة الإحساس والجمال ...نحنى لحبك له
" ..محمد قنديل "
نبراس متوهج بجمال آخاذ
في شارع الفن المتلألأ بنجمه الباهي

سيدى ...
تتوه منى العبارات ... وأقف مشدودة
على باب شعرك الصادق
دام حضورك ... ودام مداد قلمك النابع من وجدان

الفلاح المصري الفصيح

سيدى أنحنى لهذا الوجود الراقي

دولت
بنت وادي النيل

[M O H A M E D]

الصديق العزيز / عادل فؤاد
يااااه ..أشكرك جداً إنك فكرتني بهذا الموضوع ، و بالتعليقات التى كم استفدت و تعلمت منها
و ربنا يقينا شر المتلونين و اللاعبين على كل الحبال

الأخت الكريمة / عفاف سليمان
ربنا يتمم نصرنا بتخلصنا من عيوبنا ،
و استعادة أجمل ما فينا ،و بعودة الشخصية المصرية على ما كانت عليه من أخلاق و قيم
بدّلتها و بهدلتها -- أنظمة تجبر أي شخص على الفساد !

الأخت الكريمة / هدى دولت
أشكرك على قراءتك .. و تعليقك السخي الكريم
و انا أبسط من كده بكتير
تحياتي