لا أنا سياسى ...
و لا غَاوِى وَجَع رَاسى
لَكِن وَاعِى وِ مِشْ نَاسِى
وَجَعْ أهلى وْ هَوَان نَّاسى
و قٌْول الحق غرَّقنى
و غَرَّبنى و شّرَّقنى
و دّوَّقنى مَرَارْ كَاسى
و على كُلْ المِحَنْ عَدَّيت
و لا بَامْلُك قِيرَاط وَلا بَيْت
و كِتْفِى أسِير وَجَع فَاسى
وراح باشَا و جَهْ باشَا
و أنا بَابْعِد و باتْحَّاشى
لِحَدْ ماهُنت ع الجَّاهل
و ع الخَاين و ع القَاسى
و مِش نادمان
و قاعد بابكى ع الذِّكرى
و أملى شُعاع
فى نور شمس الأمل بٌكرة
يِطُلْ فى ضِحْكِة الأطفال
و فِى الأحلام ... و فى الفِكْرة
يِدَفِّينى و يملا دُنْيِتى إحساس
يِقَرَّبْنى لحضن الناس
و إيده تضُم وِ تْوَاسى
تِأكِدْلِى إنْ أنا وَاعِى
وِ مِشْ نَاسِى
وَجَعْ أهلى وْ هَوَان نَّاسى
يزيد أملى فى بُكرة قريب
بيتفصل على مقاسى
__________________
دى فضفضة من قلم رغم الألم ... حسَّاس
مهموم بِهَمْ الناس
يمكن تضيئ كلمته ... العقل جوة الراس
لا أنا سياسى ... و لا غَاوِى وَجَع رَاسى
العرض الشجري