الورد .. وأعمال أخرى

تعبت قلبي والله كتير كتير معاك
واقول ابعد وانسى انسى هواك
قولي ابعد عنك واهرب منك ازاي
وقلبي اللى واجعني تملي معاك

مشاركة كدة على الماشي

[ممدوح محفوظ]

مَ احْلاك يا ليل بَلا قلبى وِاوجاعُه
انسَامَك الحِلوه واحلى كلام واسْجاعه
وبالى لمّا يروق يِبقى المَزاج عالى
والى راحْ راحْ مِش حَ اسْمح بإرجاعُه...ء

[ممدوح محفوظ]

يالى الفؤاد عَذِبك سِيبه يِموت وارتاح
احسن ما تِقضِى حياتك بين سُهاد ونُواح
وارضى بِأيامَك والمَولى يِعَدِلها
يمْكِن تِلاقى فى طَعْم الخِيار تُفاح...ء

[ممدوح محفوظ]

ولما رُحْت أزورُه قُلتْ القُبور مَالها
انا قلبى قَبرُه اتنَبَشْ والبَاقى على حالها
قالو دِ واحده جَتْ حَفرتْ خدِتْ قلبك
وجِرينا وَراها مإدرناش نِحَصَلها ...ء

[ممدوح محفوظ]

يعنى الحِكايَه كِده , دَه اخرِة اسَايا فيك
عامِلّى مَيتْ وجامِد , وانتَ الحُب دَ مدَفيك
خُديه خَليه يِنفَعِك انا حِلو مِن غيرُه
وانتَ يا قَلبى ادعِيلك رَبِنا يِشفِيك ...ء

[ممدوح محفوظ]

و ادِى الحِكايه بين ادَم وبين حَوّه
هوّ على قَلبه قادر عَندو الحَزْم والقِوّه
و هِى معَ حُبها لو كان فِ بحر غَريق
مَ يِحوشها عَنُه لا مُوجَه ولا نَوّه ....ء

[ممدوح محفوظ]

عُمرِى معاك يا زَمَن صَابر ومِستَنى
احْمال على احْمال شايِلها وبَغنى
والدُنيا دَيما كِده زَى الرْحا دَايرَه
مرّه تِبات شَقيان ومرّه مِتهنى ..ء

مهندس -ممدوح محفوظ