نفحات من (( سـت الـدنيـا ))

**سيادة الرئيس** · #1 28/02/2010, 20h12

بيروت

و بدعوة كريمة من السيد : كمال قصار

للمشاركة في فعاليات إفتتاح (( مؤسسة التوثيق و البحث في الموسيقى العربية ))

و كان أخي الدكتور هلال أشار لهذا في موضوعه هنا و هنا

و صباح 19 - 2 - 2010 بدأ الحلم الجميل بلقائي بهلال في مطار الشارقة و كانت بصحبته السيدة المبجلة والدته و مرت ساعات السفر في لحظات حديث ممتعه معه و مع والدته حتى وصلنا إلى مطار بيروت .
سابني هلال و راح على طرابلس على أن نلتقى بالليل في السهرة و بصراحة بدأ كرم كمال قصار من لحظة وصولي مطار بيروت فكان في إنتظاري مندوب عنه كان معايا لغاية العربية إللي خادتني من مطار بيروت لفوق في الجبل في واحدة من جنات ربنا على أرضه ( قرنة الحمرا ) مقر المؤسسة و بيت كمال العامر

في مطار بيروت ( رفيق الحريري )

جبل لبنان

قرنة الحمرا

مقر المؤسسة

_________________

و طبعا لو حد مستني مواد سمعية يصبر على رزقة التقيل جاى ورا

**سيادة الرئيس** · #2 28/02/2010, 20h45

كان السيد كمال في إنتظاري و حرمه المصون

و بعد فنجانين قهوة و كلمتين قوم بقى يا سيدنا بص بصه على المؤسسة و إللي فيها و يا جمال إللي شفته
كنوز من تراثنا الموسيقى و أفراد و آلات في خدمتها

آلاف من الأسطوانات الحجرية لأشهر أسماء عصر النهضة يرجع إنتاجها إلى أكتر من 100 سنه بشوية حلوين
و آلاف من ساعات التسجيل على البكر

أرشفة على أعلى مستوى و نقل رقمي إتجبله أحدث الأجهزة حتى أغلفة الأسطوانات تم تغيرها بنوع خاص من الورق لا يتفاعل بشكل يؤثر على سلامتها و أبر خاصة بالنقل الرقمي لا تضعف مساراتها

يعني كل شئ مدروس بشكل يفرح و يسر القلب و بلا تطويل في الكلام

المدخل المؤدي لغرفة الأستماع

مدخل غرفة الإستماع من الحديقة

الناظر من غرفة الأرشفة

جزأ من غرفة الإستماع

**سيادة الرئيس** · #3 28/02/2010, 21h01

جانب من مجموعة الأستاذ عبد العزيز العناني

ركن من غرفة التحويل الرقمي تحتوي على أحدث الأجهزة في مجال التحويل الرقمي

جزأ من الأغلفة التي تم إستبدالها بأخرى مصنوعة من ورق خاص لا يؤثر سلبا على سلامة الأسطوانات

سامعين ؟؟

**سيادة الرئيس** · #4 28/02/2010, 21h12

يا محمد

و النبي آه

واحده من الأسطوانات الهامة ( سمع الملوك ) ترى فيها حفر بيد صاحبها

يوسف خفاجه المنيلاوي

____________

و قال لي كمال إن فيه كمان أسطوانه حاوريهالك تخص عبده الحمولي
طيب أشوفها
طبعا بس دي مش هنا أنا حاططها في غرفتي الخاصة
و خدنا الوقت و للأسف لم أتشرف بلمسها

**سيادة الرئيس** · #5 28/02/2010, 21h47

و على سفرة عامرة بفنون الطبخ البيروتي كانت لبطني لحظات ممتعة و زيها لودني من حديث يقطر ذوق و كرم من السيدة قصار لم يمنعني من إلتهام ما تيسر لي و زيادة

لتظهر أولى بشائر الطرب على المائدة و يخرج علينا فؤاد زبادي بحديثه الشيق عشان نحلي بيه و طبعا كله على الطرب و أهله

و نمت لي ساعتين عشان أعرف أصمد

يا مساء الأنوار

في الوسط السيد كمال ثم المطرب فؤاد زبادي

مع زبادي

مع الرائع هلال كبارة و في الطرف الآخر الأروع مصطفى كبارة الأخ الأكبر له

و كان مصطفى كبارة من أروع الأشياء التي حدثت لي في زيارتي هذه
ثقافة موسيقية عالية و ذوق و خفة ظل ليس لهما حدود

يعني بالبلدي ما يتخيرش عن اخوه

____________________

قاعة الإستماع بدأت تتزحم بفنانين و مريدين همه زتونة الموضوع

يا مُسهل

**سيادة الرئيس** · #6 28/02/2010, 22h31

كان النجم الأول في السهرة دي ( الحضور ) آه و الله كله بيعرف يغني صح كله بيعرف يسمع صح يعني يا ويل إللي حا يقول حاجه و لازم تكون في مستوى الحضور

طبعا غنينا سوا و كله حاتسمعوه عشان تعرفوا قدرات هلال كويس

لكن أنا مش حارفع بالترتيب و حبيت تكون البداية سخنة ( رغم إن كلهم سخنين ) و بصراحة يا جماعة كان فيه 3 أسماء في السهرة تبادلوا مع بعض هذا النزال الطربي بمعاونة فيلق من عازفين ماهرين

عشان أكون ( جنتلمان ) حا ابتدي بجنس حوا

صوت .. يا لهوي يامه

أقول لكم .. إحكموا إنتم

قالت في الأول ( أراك عصي الدمع ) القديمة و على إللي عملته فينا
نطيت من مكاني و همست في ودن السيد كمال ( أبوس إيدك نسمع منها الأوله في الغرام )

و لقيت تأييد من الجميع

بس لازم أديها حقها في موضوع يبين قدرتها على مسك زمام النغم

هى قالت ( الأوله في الغرام )

كتير فاكرين إن العمل ده أغلبه قواله حره من الست لكن عمنا زكريا عمل عملة ( بيتهوفن ) في ( كادنزاته ) و الكادنزة هى إنفراد العازف قبل نهاية الكونشيرتو و إظهار مهارته التكنيكية لغاية ما جه عم ( بيتهوفن ) وقال لهم بس و راح و لأول مرة يكتب كادانزات أعماله

بس عم زكريا ( كادنـِّز ) اللحن من أوله لآخره
و واضح إن الفرقة ( رغم قدراتها الكبيرة ) ما داسوش اللحن ده قبل كده .. لكن هى بنت الإيه مسكت الدنيا رغم إحتياجها للزمه تسهل الدخول من مقطع للتاني و طبعا لا أضيع حق السادة السميعة في تذكير أو تلقين الفرقة اللزم الهامة

كما أن الطبفة كانت عالية بعض الشئ فراحت تستخدم ( صوت مستعار ) في بعض المواطن بإقتدار عالي

يسبق أدائها تقاسيم عود من البلوة التانية في السهرة و الكلام عنه حيكون لوحده عشان ما ينفعش نمر مرور سريع على هذا المطرب والعازف الشاب العجوز أوي الرائع ( مصطفى سعيد )

المهم يا سادة

إليكم

فدوى المالكي

أو بلوى المالكي

مصاحبة آلية

عود : مصطفى سعيد
قانون : غسان سحاب
كمان : أحمد شبّو
بزق : عمر عرابي
إيقاع هنا بس : صلاح علام

**أبوكارم** · #7 28/02/2010, 23h16

عظمه على عظمه على عظمه
يابوعلى .. يافنان

بس ليه ملفين .. مش ملف واحد
دلوقتى سماعى يقبل ملف mp3 حتى 40 ميجا

**abuzahda** · #8 01/03/2010, 02h10

أحلى حاجة في الليلة

(بغض النظر عن توريقاتك و شخاليلك و كوفياتك الحرير)

إن الست فدوى ، قالت:

سافِر حبيبي

(هوّ مين قال لها ؟)

خليك انت كده:
من أم الدنيا لـ ست الدنيا

و انا هنا في بنت الـ ...
دنيا

**د أنس البن** · #9 01/03/2010, 04h20

الله الله الله

بسم الله ما شاء الله
ياعينى عا الصبر والجمال والكمال والهلال الكباره

آآآآآآآآآآه يا قلبى آآآآآآآآآآه
الله يرحمك يا ست ام هانئ (أمى)
علمتنى أسمع الأوله فى الغرام وهيه بتسمعها على الكنبه الأستنبولى بعد العصر من اذاعة ام كلثوم (زمااااااااااااان) وعينيها تسح .. كانت بتسمع بطريقه عجيبه
الله يرحمها ويرحم أمواتنا جميعا
ويبارك فى الست فدوى المالكى وكل من كان معها فى هذه التحفه
وكل الغبطة لك يا ابن العلام الحبيب الشريف النسيب
بتلك الصحبة المحترمة الراقيه
ليتنى كنت أستطيع الحضور ليتنى

**kabh01** · #10 01/03/2010, 04h24

اقتباس:

المشاركة الأصلية كتبت بواسطة د أنس البن

ليتنى كنت أستطيع الحضور ليتنى

خيرها بغيرها يا دكتور أنس والجايات أكثر من الرايحات.