فؤاد حداد شاعر شعراء العاميه

**MOHAMED ALY** · #1 18/10/2006, 01h56

راجل عجوز

اصحى يا نايم
وحد الـــــدايم
و قول نــويت
بكره ان حييت
الشهر صــايم
و الفجر قــايم
اصحى يا نايم
وحد الــرزاق
رمضان كريم

مسحراتى تحت السمـــــا
منقراتى و لـــــــــــــربما
ضحكت سنانى المطرمه
يمكن يجــوز
راجل عجوز

لكن جوانحى بـــــيرفرفوا
فى صدرى بلبل انا اعرفه
من قبل نسمه ما تحـــــدفه
يلاقى نسمه بتــــــــــــلقفه
يمكن يجــوز
راجل عجوز

لكن مؤكد يا ســـــــــــيدى
الفن زهر على يــــــــــدى
ليالى سمحه و صباح ندى
اصيل و شارب من دا و دى
يمكن يجــوز
راجل عجوز

لكن فى رجلى عجل عجل
ماضى بماضى من العمل
ما حلو الا طعم الأمـــــل
بكره لعل و عسى عسل

المشى طـــاب لى
و الدق على طبلى
ناس كانوا قبـــلى
قالوا فى الامثال :
الرجل تـــــدب
مطرح ما تحب

و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

بالله عليكم يوم العيد تـــــــــــــرقوا له
دلوقتى لما تشوفوه مع طبلته قـــــولوا
راجل عجوز ماشى ويا شويه من قلبه
الفجر فوق الطريق هما اللى شقــوا له

اصحى يا نــايم وحد الـــــدايم
السعى للصــوم خير من النـوم
دى ليالى سمحه نجومها سبحه
اصحى يا نــايم يا نايم اصحى
وحد الرزاق

**MOHAMED ALY** · #2 18/10/2006, 02h02

(20 )
اتشجعوا

اصحى يا نـايم
وحد الـــــــدايم
و قول نويـــت
بكره ان حيـيت
الشهر صــــايم
و الفجر قــــايم
اصحى يا نـايم
وحـــد الرزاق
رمضان كريم

مسحراتى
منقراتــى
رمضان يا ولدى بأودعــه
ليلى و عينى الأثنين سعوا
بلال و بلبل اتجمــــــــعوا
علشان ينـــوحوا و يدمعوا
سمعنا هاتف اتشـــــــجعوا
الهى قادر يــــــــــــــرجعه
قوم انت اسقى اللى يزرعوا
انشد مديح اللى يصنعـــــوا
غنى الحديد و اللى طــوعه
و الأمهات لما يرفعـــــــوا
ايدين بتشقى اذا دعــــــــوا
حطوا الجبل للى يطلـــــعه
و فى طاقة القدر و سعـــوا
قوم انت نقر
الليل ينـــور
قلبك دا ملك اللى يسمــــعه

المشى طاب لـــى
و الدق على طبلى
ناس كانوا قبلــــى
قالوا فى الأمثال :
الرجل تـــــدب
مطرح ما تحب

و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

كنا تلاته اربعه و لا اربعه خمســـــــــــــــه
فى حى الأزهر بنسهر من قديم الدهــــــــــر
نقول فى كان ياما كان و فى أصبح و أمسى
و يدور علينا نبات الشاى بلون الزهـــــــــر
فكرك يا شهر الزمان يحفظ لنا همســــــــــه
يا شهر و الا جميع كل الزمان ينســـــــــــى
لا أوحش الله منك المسلمين يا شهـــــــــــــر

اصحى يا نايــم وحد الدايــــــم
السعى للصــوم خير من النــوم
دى ليالى سمحه نجومها سبحـه
اصحى يا نايــم يا نايم اصـــى
وحد الرزاق

**MOHAMED ALY** · #3 18/10/2006, 02h06

(21)
يوم العمل يوم عيد

اصحى يا نايـم
وحد الدايـــــــم
و قول نويــــت
بكره ان حيـيت
الشهر صايـــم
و الفجر قايـــم
اصحى يا نايـم
وحد الـــرزاق
رمضان كـريم

مسحراتى من هنا لبعــــــــــــــــــيد
منقراتى من قنا لرشــــــــــــــــــــيد
يا كل سطح طلعته بالأناشــــــــــــيد
و كل بيت قايم على العوامـــــــــــيد
ودارى بحرى و دارى جوه الصعيد
اللى بناك و اللى ضرب طوبـــــــك
و اللى هداك السعد عمى السعــــــيد
قول يا ديوك ادنوا
و يا أمهات هنـنوا
و يا بنايين عنـــوا
يوم العمل يوم عيد

كان يوزن القالب براحة أيـــــــــــــد
ع المسطره بالسنتى يا ابو الســـــــيد
و يتم ألف و لو قالوا له يعــــــــــــيد
ظهره انحنى ساعتين بلا تنهـــــــــيد
للمغربيه و هو صايم اكــــــــــــــــيد
قول يا ديوك ادنوا
و يا أمهات هنــنوا
و يا بنايين غــــنوا
يوم العمل يوم عيد

للمغربيه و هو صايم اكيــــــــــــــد
يضوى العرق فى جبينه زى الشهيد
نور الأيمان يا أمة التوحـــــــــــــيد
نور السما فوق راسه بالزغـــــاريد
ينهض و يتشطف شبابه جـــــــــديد
قول يا ديوك ادنوا
و يا أمهات هننـوا
و يا بنايين غـــنوا
يوم العمل يوم عيد

المشى طاب لـــى
و الدق على طبلى
ناس كانوا قبــــلى
قالوا فى الأمثــال :
الرجل تـــــدب
مطرح ما تحب

و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

ما احلى العرق لما يضوى من جبين لجبين
من الغيطان و المصانع يفتح الميــــــــادين
و الديك بيدن ورافع راسه ع الانــــــــــتاج
ما أحلى البنا بالغنا ما أحلى العمل بمـــزاج
و ضحكة المصرى ترفع للسما ابـــــــراج

اصحى يا نايم وحد الدايم
السعى للصوم خير من النوم
دى ليالى سمحه نجومها سبحه
اصحى يا نايم يا نايم اصحى
وحد الرزاق

**MOHAMED ALY** · #4 18/10/2006, 02h12

( 22 )

حاج راضى

اصحى يا نايم
وحد الدايـــــم
و قول نويـــت
بكره ان حييت
الشهر صايـــم
و الفجر قايـــم
اصحى يا نايـم
وحد الـــرزاق
رمضان كريم

مسحراتـــــــــى
منقراتــــــــــــى
يا حاج راضـــى
شيخ مصطفــــى
نورك جايبنــــى
نطرح و نبنــــى
رمضان واهبنى
سهل و دفا

ندى و سماحه
سمر جماعــه
ياألف قاعــــه
و مضيفه

يا ميت سرادق
تحت البيـــادق
على نمــــارق
مزخرفه

و الشمس مركب
مشوارها معجب
و كل معـــــرب
دمعه انطفا

ابسط يا صايم
هلت نســـــايم
و قلنا دايــــــم
و بالشفا

و ناس احبـــــه
زادونى ليــــــه
كل السعــــــاده
فى دى الزياره
و ان أراهــــــم
مبدأ تراحــــــم
و اقول كفى

اقول كفانــــــى
رمضان وافانى
و ايدين تفانـــى
و قلوب وفـــــا
مسهله لـــــــــه
دار الصفـــــــا
مسا هلالـــــــه
ما الطفـــــــــه

و المشى طاب لى
و الدق على طبلى
ناس كانوا قبــــلى
قالوا فى الأمثــال :
الرجل تدب
مطرح ما تحب

و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

هات يا زمان هات تلات بلاحات و بق حليب
أبدأ فطارى على سنة رســـــــــــول و حبيب
اشم ريح الحجاز أسمع تهامــــــــــــــه و نجد
أشهد أعـــــــــــالى الشرف أحمل أحن الوجد
أقف بمجد العرب فى كل جمعه خطـــــــــيب

اصحى يا نايـــم وحدى الدايــم
السعى للصـــوم خير من النوم
دى ليالى سمحه نجومها سبحـه
اصحى يا نايــم يا نايم اصحـى
وحد الرزاق

**MOHAMED ALY** · #5 18/10/2006, 02h18

( 23 )

كتب و ناس

اصحى يا نايـم
وحد الدايــــــم
و قول نويـــت
بكره ان حييت
الشهر صايـــم
و الفجر قايـــم
اصحى يا نايـم
وحد الـــرزاق
رمضان كريم

مسحراتى قديم جــــــــــديد
منقراتى خفيف شـــــــــديد
فاتح مدارس ساعة السحور
و طبلتى طبلة الحضــــــور
خدت الثقافه على اســـــاس
ان الثقافه كتب و نــــــــاس
قريت لطه و الحكـــــــــــيم
و لعم بيرم و النــــــــــــديم
و من المعره على بــــولاق
ابو العلا من ابو العــــــلاء
شفت الجميل يشكر الجميل
فى كل حته و فى كل جيل
من فننا جاءت الفــــــــنون
من شاعر جاء شاعــــرون
و من تراث لنا عريــــــــق
شيوخ اوروبا على الطريق
و مشيت فى شارع نور الظلام
و شفت لك يا عبد الســـلام
اكمنى راجل زيك أمـــــــير
الفجر أبيض زى الضـــمير

المشى طاب لـــى
و الدق على طبلى
ناس كانوا قبلــــى
قالوا فى الأمثـــال :
الرجل تدب
مطرح ما تحب

و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

قلت المحبه و قلت المعرفه قسمـــــــــــه
و خدت عودى و كان عودى ربيع نسمه
أصبحه بالليالى و يجرى فى النجـــــــمه
انا قريت البلد و الفجر و الانســـــــــــان
و انا أتبعت الضحى و حدثت بالنعــــــمه

اصحى يا نايــم وحد الدايــــــم
السعى للصــوم خير من النــوم
دى ليالى سمحه نجومها سبحه
اصحى يا نـــايم يا نايم اصحى
وحد الــــــرزاق

**MOHAMED ALY** · #6 18/10/2006, 02h27

( 24 )

دمشقيه

اصحى يا نايـم
وحد الدايــــــم
و قول نويـــت
بكره ان حييت
الشهر صايـــم
و الفجر قايـــم
اصحى يا نايـم
وحد الــــرزاق
رمضان كــريم

مسحراتى
منقــراتى
بادق بابك يا دمشق الشـــــــــــام

ضاحك و باكى
من شوك لماك
أطيب فطار عندك و أغلى صيام

فى عينى رقرق
صدق مــــورق
شغل الحميدى بالألف و الـــــلام

بهجة فــنونك
و نار كانونك
ريحانة الممسى و شذى الألهــام

سبحانه خالق
نور المشارق
قال كونى معصم للجبل و عصام
عين العروبه و مهجة الأســــلام
قهر الصليبيين أسد ضـــــــرغام
على نهج عالى و فى يمينه حسام
لما أن يهزه يروج الانســـــــــان
يأخذ بيد الأم و الأيتــــــــــــــــام
يوضع لنا كلمه و قدم و مقــــــام
و يدمر الباطل و لا ينضـــــــــام

أبو زيد هلالك
مهر المهــالك
و مهرها سالم و الفتى الهمــــــام

و فى كل عصــر
و ضحى لعصـر
و مغرب لمصر تحننى الارحــام

هاج الاعنه
خيالهـــــنه
طاب وصالك قبل جنح الظــــلام

يا ضى أحسن
كأنه لحـــــــن
الماضى من مستقبل الأيــــــــــام

المشى طاب لــــى
و الدق على طبلى
ناس كانوا قبــــلى
قالوا فى الأأمثــال :
الرجل تـــــدب
مطرح ما تحب

و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

الليل دمشقى و نار الليل دمشقيـــــــــــه
كما ألات الطرب و الخيل دمشقيـــــــــه
و المكرمات و الأدب و الناس دمشقيــه
و احلف بنجم المسار ان ما خدتش التار
و ما طهرتش الديار تبقى دى مش هيه

اصحى يا نايــم وحد الدايــــــم
السعى للصــوم خير من النـوم
دى ليالى سمحه نجومها سبحه
اصحى يا نايــم يا نايم اصـحى
وحد الرزاق

**MOHAMED ALY** · #7 18/10/2006, 02h33

( 25 )

تونس الخضرا

اصحى يا نايـم
وحد الدايــــــم
و قول نويـــت
بكره ان حييت
الشهر صايــم
و الفجر قايــم
اصحى يا نايم
وحد الــرزاق
رمضان كريم

سحر يا مسحراتـــــــــــى
نقر يا منقراتـــــــــــــــــى
تونس خضـــــرا لليله دى
جاى بربابه خضـــــــــرا
خيال و مغنــــــــــــــواتى
طبـــال والا نـايــاتـــــــى
تحت البرق الزناتـــــــــى
و فى قلبى قطره قطــــره
دموع فى الضحك اطرى
من العنب البناتــــــــــــى
على اسنان العــــــــزيزه
زى الخفاجه عامــــــــــر
غنى و خفق و غامـــــــر
قلبى فى ألف سامـــــــــر
و ألف غيط و جـــــــيزه
و ألف نيــــــــــــل و دلتا
و أنا ماشــى بدراعـــاتى
شفت الجنه فى حيــــــاتى
خدت فى حضنى الوطــن
المغـــــــــــــرب و اليمن
يا تــــــــــــونس ونسينى
كان الــــــــــزمن نسينى
و نسيت كل الـــــــــزمن
الا أنس الليـــــــــــله دى

و المشى طاب لى
و الدق على طبلى
ناس كانوا قبــــلى
قالوا فى الأمثال :
الرجل تــــــدب
مطرح ما تحب

و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

ما نختلفشى فى نسبه أحمد بن عـــــروس
كان من صعيد مصر والا تونس الخضرا
هناك بنوا له مقام فوق الجبل محـــــروس
هنا بنوا له فى اوطان القلوب حضــــــره
على لسان كل مصرى كلمته حاضــــــره

عرب نغرب نشرق
يجمعنا شــعر و آه
لو حد بيننا يـــفرق
ما نستــاهلش حياه

اصحى يا نايـــم وحد الدايـــــم
السعى للصـــوم خير من النوم
دى ليالى سمحه نجومها سبحه
اصحى يا نايــم يا نايم اصحى
وحد الرزاق