وأه يامه

**محمودسعد** · #1 22/11/2009, 08h53

ايه ؟
الحلاوه
دي
الكلام جميل ومعبر ويتقال ويتلحن ويتغني والمفروض يااخي ياملحن يامصري انك تعرف ان الكلام لما يقراه مطرب وبيحس بيه بيتغني لوحده من غير لحن كمان وانا اعرف كمان ان فيه ناس ممكن تلحن الجرنال والكلام المكتوب فيه
والراجل علي عبد اللا شاعر جميل وكلامه حلو ومعبر وان كنت ستستطيع تلحينه انا جاهز لغنائه

**على عبداللاه** · #2 22/11/2009, 19h33

اقتباس:

المشاركة الأصلية كتبت بواسطة محمودسعد

ايه ؟

الحلاوه
دي
الكلام جميل ومعبر ويتقال ويتلحن ويتغني والمفروض يااخي ياملحن يامصري انك تعرف ان الكلام لما يقراه مطرب وبيحس بيه بيتغني لوحده من غير لحن كمان وانا اعرف كمان ان فيه ناس ممكن تلحن الجرنال والكلام المكتوب فيه
والراجل علي عبد اللا شاعر جميل وكلامه حلو ومعبر وان كنت ستستطيع تلحينه انا جاهز لغنائه

الغالى جدا / الفنان محمود سعد
نورتنى فى صفحتى وده ليا منتهى الشرف .. ويزيدنى الشرف ان حضرتك تغنيلى اى أغنيه تحبها
انا كتبت أغنيه فى موضوع جديد أتمنى انك تشوفها .. هى ملحنه نفسها على قولك
يا رافع من روحنا المعنويه
تحياتى وإحترامى وتقديرى

**ملحن مصري** · #3 22/11/2009, 21h25

يا أستاذ محمود حضرتك راجل فنان معتق مش بتوع اليومين دول
وأكيد حضرتك عارف إن كل ماكان الكلام واصل لقلب الملحن بيلحنه من غير كلام وطبعا دي بتختلف من فنان للتاني
ومش معني إنى ما أخدتش الكلام ولحنته إنه يبقي وحش
وأنا بحب
أضيف للكلام مش مجرد ألحن كلام وخلاص وممكن ملحن تانى يقدر يضيف للكلام
ولو علي كلام الجرايد إختار أي كلام وأنا ألحنه وممكن ألحنلك الكلام اللي حضرتك بتقوله لو إحنا قاعدين مع بعض نتناقش علي قهوه مثلا يعني كلامك العادي مش الجرايد بس وبالنسبه لي الحمد لله مش صعبه
لكن فيه فرق بين الإبداع والتلحين وأكيد حضرتك فاهم كلام لأنك زي ماقلتلك إنت معتق مش فنان عادي
بس لي ملحوظه علي تعليق حضرتك لأن طبعا أى كلمه حضرتك بتقولها بتكون عارف معناها كويس أووى يعني إيه جملة وان كنت ستستطيع تلحينه
وتحتها مليون خط ومش هاشرحها وأكيد وصلتك وجهة نظري كويس أوى
وفيه ملحوظه تانيه أنا كتبتها قبل كده
أنا بقدم فكر مش ألحان وبس وأنا بقدم بس الي مؤمن بيه ومش بحب أسلوب الكلام اللي فيه ندب أو الترحم علي أطلال بشكل عام
أنا عاوز تفاءل لأان دي رسالتي كفنان ومش أعيّش الناس في هم وأفكرهم بهمومهم بالعكس أنا لازم أكون سبب أو وسيله إنهم ينسوا همومهم وإزي أخليهم يفكروا ف المستقبل بشكل فيه تفاؤل مهما كان الواقع أليم
وعلي فكره ده مش كلامى دي خبره أخدتها من أستاذه برضه
وبالأخص من أ / أشرف السركي الملحن والإنسان الأجمل وأكيد تعرفه كويس
ملحوظه ثالثه أنا لاحظت إن حضرتك مش بتدخل علي مشاركاتي اللحنيه بأي تعليق وتفسيري الأوحد إنه مش بيعجبك واللي بيأكد كلامي تعليقاتك السابقه اللي قريتها في بعض الردود فقط علي مشاركه لعضو آخر
أخر ملاحظه أنا حاليا بعيش ظروف قاسيه جداا
عاطفيا نفسيا ومع ذلك بحاول أنسي وأنا بالحن كهم شخصي عشان أخرّج الناس من اللي هي فيه

يارب أكون قدرت أوصّل وجهة نظري لحضرتك

وأسف علي التطويل

**على عبداللاه** · #4 28/11/2009, 20h24

الغالى ملحن مصرى
ما كان يقصد أبدا الأستاذ الفنان / محمود سعد إلا جمله واحده

ماتحبطش شاعر

لو قدرت تساعده توصل كلامه للوجود متلحن يبقى كتر خيرك
ولو مش هو ده اللى انت تحب تلحنه يبقى مش لازم تكسر جناحاته

ده اللى هو أنا

وأنا لولا كلمتك وعرفتك كانت جناحاتى إتكسرت فعلا
الشعر بيقول حاله جواه
ومش شرط تبقى سعاده بقه
وأنا أوعدك إن شاء الله لما تيجى حالة الفرفشه مش هنساك
هههههههههههههههههههههههههههههههههههههههههههههه

يا عم المحبط

تقبل منى تحياتى

وكل عام وأنتم جميعا فى كل الخير

**محمودسعد** · #5 02/12/2009, 06h43

تصدق
مفيش ممثل ماعملش نكد وهم
ومفيش مؤلف ماكتبش كلام نكد وهم
ومفيش ملحن مالحنش لحن نكد وهم
ومفيش مطرب ماغناش اغاني نكد وهم
لا وايه
مفيش مستمع ماحبش اغني هم ونكد ؟؟؟؟؟؟
وبعدين انا مش معتق ؟؟انا لسه جديد ؟؟

**على عبداللاه** · #6 02/12/2009, 16h37

اقتباس:

المشاركة الأصلية كتبت بواسطة محمودسعد

تصدق

مفيش ممثل ماعملش نكد وهم
ومفيش مؤلف ماكتبش كلام نكد وهم
ومفيش ملحن مالحنش لحن نكد وهم
ومفيش مطرب ماغناش اغاني نكد وهم
لا وايه
مفيش مستمع ماحبش اغني هم ونكد ؟؟؟؟؟؟
وبعدين انا مش معتق ؟؟انا لسه جديد ؟؟

دى حقيقه
وبالذات حكيوة المستمع دى
بس انا قصدت جرح أمه بالكامل فى دماغهم إن الفلسطينى
إنسان مش تمام وباع أرضه ... حبيت أوضح إن اللى باعوها
خرجوا منهم وإتجنسوا جنسيات تانيه وإن اللى فى الأرض بقه
معصورين بين النار .. وبيربطنا بيهم دم ودين .. وعروبه
بكيت على لسان واحد منهم للأمه العربيه اللى ما عندهاش إلا
إدانة الفلسطينى بإنه باع الأرض ...!!! وهو معصور جواها ...!!
دى تذكره مش نكد ... ولا أيه ؟؟

**صبره ابو حسن** · #7 03/12/2009, 00h03

الاستاذ محمود سعد

الفنان الكبير ملحن مصرى

انا مع الاستاذ محمود اننا شعب نحب الاعمال اللى فيها نكد ونحب نشوفها ونسمعها اكتر من مره
وكذلك مع ملحن مصرى انه له الحريه ان تكون له سياسته الفنيه واسلوبه
لكن الاستا ذ الشاعر على عبد اللاه عمل جميل وانا مش ناسيك فى الورد ومدكنلك اتنين

**محمودسعد** · #8 03/12/2009, 04h37

شوف ياسيدي
اقصد ملحن مصري اولا
من واقع تجربه شخصيه ؟؟؟؟
كان فيه مؤلف جميل فوق ماتتصور بس نجاحه كله جه في مقفول عليه لوحدي الباب بتاعه حسن الاسمر وبعدها عد الجروح ياالم وقبلهم كانت كتاب حياتي ياعين والغريب يااخي ان الناس كلها كانت بترقص لما حسن الاسمر يغني ايا من هذه الاغاني ؟؟بيرقصوا بيرقصوا ؟؟المهم وصلنا لبعض انا وماهر عبده سليمان المؤلف الجميل ده عشان نعمل مع بعض اغنيتين اولهم عيني عليك ياحزين عيني واغنيه اخري لم يكن قد شرع في فكرتها ولما روحنا الرقابه عشان نصرح الاغنيه بتاعه الحزين دي قام عم مدكورثابت الرقيب الاكبر مسك المؤلف وغسله بجد كلام هزار طبعا وقال له بالحرف ؟؟يااخي انت نكدت علينا خالص هو انت مفيش عندك ولااغنيه فرح ؟؟؟فرد ماهر وقال له اهو كده وصلت لفكره الاغنيه التانيه لمحمود سعد ؟؟وعمل اغنيه فرايحي وفرايحي خالص وكلامها جميل وبيقول والنبي ياجميل بصلي بصه دا الجار للجار والنبي وصي وتصدق ان الناس ماسمعتش بتاعت الفرح وسمعت ورددت عيني عليك ياحزين ؟؟؟والله وحياه اولادي هذا حصل وفي مره قعدت مع ملحن جميل وكبير واسمه مهدي خميس عليه رحمة الله وهو ده اللي عمل اغنيه توهان وطبعا انت هاتفكر ان اغنيه توهان دي اغنيه بيئه ؟؟؟لا والله ده مهدي خميس كان بيعيط وهو بيغنيها وبيقول تايهين والدنيا بتلعب بالخلق وكل الناس تايهين وقلوبها بتتعب وزمانها ماهو حساس ؟؟ ده الكلام اما اللحن فلو مش عندك هاسمعهولك ؟لحن يبكي خالص وتصدق لما غناه حسن ضرب وعمل قنبله وباع مليونين شريط والاعجب ان الناس كانت بترقص وفرحانه والامثله كثيره واكتر من الاسمر بكتير وشوف فريد غني زينه زينه ازاي ؟؟؟؟؟؟؟؟؟؟
ولنا عوده

**على عبداللاه** · #9 03/12/2009, 20h29

اقتباس:

المشاركة الأصلية كتبت بواسطة صبره ابو حسن

الاستاذ محمود سعد

الفنان الكبير ملحن مصرى
انا مع الاستاذ محمود اننا شعب نحب الاعمال اللى فيها نكد ونحب نشوفها ونسمعها اكتر من مره
وكذلك مع ملحن مصرى انه له الحريه ان تكون له سياسته الفنيه واسلوبه
لكن الاستا ذ الشاعر على عبد اللاه عمل جميل وانا مش ناسيك فى الورد ومدكنلك اتنين

الغالى جدا // صبره أبوحسن

ودتينك فى قلبى وإنت بالفعل صديقى ونور عينى
والنكد مطلوب برضو ... بيه نستطعم بعده الفرح أوى

**ملحن مصري** · #10 02/12/2009, 19h16

فيه مقوله بتقول لكي تعرف شعب لابد أن تتطلع علي ثقافته وتتعلم لغته والبند الأهم بالنسبه لي ف المقوله دي هو التعرف علي ثقافة الآخر
وحضرتك يا أستاذ محمود واخد الموضوع من جانب واحد بس وأنا بفكر ف الغنا مش عشان أغني او ألحن وخلاص
أنا بحاول أدرس البيئه المحيطه عشان أقدر أوظف الفن بتاعي لخدمة المجتمع مش إني ألحن غم وهم ونكد وأخلي الناس عايشه ف هموم علي طول
دور الفنان لازم يبقي إيجابي يا أستاذ محمود مش مجرد ملحن أو مطرب وخلاص
وياسيدي موضوع معتق معتقدش يزعلك بالعكس انا اللي قصدته إن حضرتك فنان من بتوع زمان اللي إتعلمنا منهم كتير