فاكر وانت صغيّر

**سعدالشرقاوى** · #1 26/10/2009, 21h47

(فاكر وانت صغيّر)

(فاكر وانت صغيّر جيتنا
صونـّا العهد وعلمناك
وأمّا كبرت نسيت عشرتنا
حتى بواسطه ماكلمناك)
,,,
ياللى نسيت أيامنا الحلوه
والعهد اللىّ مشينا عليه
ونسيت طعم الليل والغنوة
عنوانـّا ضاع منـّك ليه
قولنا هاتكمل بيك فرحتنا
وعلى نيّاتنا بنستناك
وأمّا كبرت نسيت عشرتنا
حتى بواسطه ماكلمناك
(فاكر وانت صغيّر جيتنا
صونـّا العهد وعلمناك
وأمّا كبرت نسيت عشرتنا
حتى بواسطه ماكلمناك)
,,,
كنت بتفرح وتزعّلنا
ونتمنالك بس تعيش
جالك يوم واستغنيت عنـّا
من أوّل ماطلع لك ريش
مع الزمن تغدر بينا
وبقسوة تقتل سعادتنا
أتاريك بتتعلم فينا
وتخون فى عيشنا وملحتنا
واتحمّـلنا الصّعب وشيلنا
كلّ ملامه ماحمّلناك
وأمّا كبرت نسيت عشرتنا
حتى بواسطه ماكلمناك
(فاكر وانت صغيّر جيتنا
صونـّا العهد وعلمناك
وأمّا كبرت نسيت عشرتنا
حتى بواسطه ماكلمناك)

,,,
حتى الورد زرعنا لحبّك
أرض قلوبنا وصورتك فيه
كل ما زهر الحب ينوّر
قسوة قلبك بتـّطفـّيه
قلبى بيسأل ردّ وقول له
جبت منين الغدر دا كله
ياللى ربطـّه بسحر عيونك
خللى غرورك ييجى يحلـّه
عمر ما هونت علينا ياسيدنا
ولا عمرنا يوم همّلناك
وأمّا كبرت نسيت عشرتنا
حتى بواسطه ماكلمناك
(فاكر وانت صغيّر جيتنا
صونـّا العهد وعلمناك
وأمّا كبرت نسيت عشرتنا
حتى بواسطه ماكلمناك)
,,,

**غازي الضبع** · #2 27/10/2009, 06h36

الله ينور يا عم سعد يا فنان
بس مين قليل الـ ..... اللي انت كاتب فيه هذا الزجل

تحياتي وتقديري يا فنان

**على عبداللاه** · #3 27/10/2009, 13h31

تحياتى وتقديرى يا عم سعد
ما شاء الله عليك

**NAHID 76** · #4 27/10/2009, 15h48

بسم الله الرحمن الرحيم
خالى سعد الشرقاوى
يا دين النبى على كل كلمه
وشوف يا خال
أول ما الريش طلع وتعلم الطيران طار منك وزاغ
عفارم عليك
تحياتى

**Tarek Elemary** · #5 27/10/2009, 16h43

خوفى لا يكون الواد مدحت يا عم سعد ....

بس حتى لو كان ... هذه حال الدنيا
و قديماً قال الأعشى
علمته رمى السهام فما إشتد ساعده رمانى
وعلمته نظم القوافي فلما نظم قافية هجاني
===========
واضح إن ده حال الدنيا
و أنت رائع كالعادة يا أبو مدحت
دمت لنا و للمتذوقين

**د أنس البن** · #6 28/10/2009, 06h50

والله يا سى طارق كلام فى سرك
أنا كنت ناوى اقول زيك
وعلشان كده قرأتها يجى عشرين تمانين مره
ولما جيت اكتب ردى على كل هذا الدفق من المرارة والأسى
لم يطاوعنى قلبى
لكن على رأيك آدى حال الدنيا
ويا رب نكون غلطانين
شوف الشاعر زمان قال ايه عن الأب وحنان الأب أمام ابن جاحد

أَرْضى عن ابني إذا ما عقني حذراً
عليه أن يَغْضَبَ الرحمنُ من غَضَبي

وهذا عمنا أميه بن الصلت يقول :

غَذَوْتُكَ مولوداً وَعْلتُكَ يافعاً
تُعَلُّ بما أدنْي إليك وتَنْهَلُ.

إذا ليلةٌ نابَتْكَ بالشَّكْوِ لم أَبِتْ
لشَكْواكَ إِلا ساهراً أَتَمَلْمَلُ.

كأني أنا المطروقُ دوَنكَ بالذي
طُرِقْتَ به دوني وعينيَ تَهْمُلُ.

تَخَافُ الرَّدَىْ نَفْسِي عليكَ وإِنها
لتَعلمُ أن الموتَ حتمٌ مؤجلُ.

فلما بَلَغْتَ السِّنَّ والغايةَ التي
إليها مَدَىْ ما كُنْتَ فيكَ أُؤَمِّلُ.

جَعَلْتَ جزائيْ منكَ جَبْهاً وغِلْظةً
كأنكَ أنتَ المنعمُ المتفضِّلُ.

**علاء طه ياسين** · #7 28/10/2009, 12h07

سعد الشرقاوي
من غير ما أشكرك لأنك أكبر من كل شكر

الشعر كما العصافير ع التوت وانت الصياد ..
وانا با ضحك للبنت اللي بتضحك في الحواديت وأديها ميعاد ..
قلبك يشبهني يا واخد من غيط الياسمين الهوا والزاد ..
الله لو كان ف إيديا الكون مكنتشي تفرق بينا بلاد ..
مشتاق لك جامد مشتاق لك ..
بأتكي علي وجعي وباكتب لك ..
وحياة الأولاد ..

علاء ياسين

**Tarek Elemary** · #8 29/10/2009, 08h03

علاء طه يس ظهر فى بر السماعى يا رجاله
و قال يا رجاله بالإنجليزى (يا منز)
أيه يابنى فينك و فين أراضيك و أيه يرضيك
***
يا عم علاء وجودك بيننا بيــــــــهون كتير الجرح
و بيزود بدون تهويل فى لياليــــــــنا الهنا و الفرح
و بنحبك و حبك شئ ما هوش عاوز كلام أو شرح

**علاء طه ياسين** · #9 29/10/2009, 12h27

أخي / طارق العمري

يرضيني تكون دايما مبسوط وسعيد ..
وكمان تدعيلي ف طلعة فجر جديد ..
ونعيد ليالينا وأيامنا ..
وتعاود تضحك أحلامنا ..
وانا وانت وسعد الشرقاوي الايد في الايد ..

اعتذر للغياب لسوء الحالة الصحية .. وأشياء أخري ..
علاء ياسين

**سعدالشرقاوى** · #10 31/10/2009, 11h08

اقتباس:

المشاركة الأصلية كتبت بواسطة غازي الضبع

الله ينور يا عم سعد يا فنان

بس مين قليل الـ ..... اللي انت كاتب فيه هذا الزجل

تحياتي وتقديري يا فنان

اخى الحبيب
الاستاذ/ياسين
الحقيقة انهم صبحوا كتير
قليل ال.....
الله يعزّك
حتى كادت تكون ظاهره
وربنا يهديهم
ومن فات قديمه تاه
لك خالص الحب والتقدير