هى ـ وقطتها .... وأعمال أخرى

[مختار الحسانين]

المشكلة بالنسبة لى أنى سريع فى ترك المنتديات ، وحاليا أنا مؤسس لمنتدى يسمى الجغرافيون العرب كونى معيد فى تخصص الجغرافيا ، ودخلت هذا المنتدى الرائع للاستمتاع بمنولوجات اسماعيل يس وشكوكو ، ولكن مع كل الاسف لم استطع تحميل ملف واحد من الملفات الموجودة ضمن مرفقات المنتدى ...

بالنسبة لأسعار السرفيسات عاملة أيه عندكوا فى القاهرة .... تصدقى وتؤمنى بالله ، أحنا كشعب مصرى أكثر شعب متبهدل فى هذا العالم ، نحن الشعب الوحيد فى هذا الكوكب الفضائى الذى يستغل من أول تباع السرفيس مرورا بالطبيب والمهندس الى أخر التركيب المهنى والاقتصادى ، نحن من بنينا الاهرامات جوعى عراة حتى ينعم الملك بنومه فى هدوء وراحة فى قبره الاسطورى ، نحن من نصنع من أجل الاخرين حضارتنا وننسى أننا أصحابها فى الاساس .

السرفيس والميكروباص وقطارات الدرجة التالتة تلخيص حقيقى لمعاناة المصريين ، علاوة على مواصلات الدرجة التالتة التى تربط بين المدن الصغيرة والقرى المجاروة ..... ويعلم الله أننى لم أطرد أى طالب أو طالبة كما يفعل بعد الدكاترة والمعيدين ، حتى لو وصلوا فى الدقائق الاخيرة ، فيكفى أن تقول البنت أنا جاية من المنزلة أو السنبلاوين أو اجا ، وحضرتك عارف المواصلات ن فأقول فى سرى عارف عارف ، خصوصا خالى عنتر ونزلة البرد وخناقتى كذا مرة مع سواق السرفيس والتباع بتاعه الضلالى واكل باقى فلوس الغلابة .

خلينا نرجع تانى للسرفيسات ونقول قصيدة مأساة شعب لزميلى المرسى ، القصيدة الزجلية كانت من كام سنة أيام لما كانت الاجرة ب ريال ( عشرون قرشا مصريا ) ، كنا نعطى التباع المخروم ( 25 قرش ، ربع جنيه ) فيرجع لينا الشلن ، أو هوا يقول شوف شلن وانا أعطيك بريزة ( 10 قروش ) .....

أنا هكتب القصيدة دى فى الرد الجاى بس عايز أقول حاجة غريبة لافتة نظرى ، ان التباعين واللى بينادوا على اى بضاعة فى مصر ، بيقولوا شعر موزون وهما بيندهوا على بضاعتهم ... بصراحة الناس دى مع قرفها وسخطها علينا فهم مخزن كبير ( هارد ديسك بشرى ) لكل التجارب المصرية ....

تعرفى انا ساعات كتيرة جدا أشترى حاجات محتجهاش أبدا فى شقتى ، وبشتريها برضه عشان بحب الناس دى ، مرة منساش ولد صعيدى بيبيع الربابة الخشبية ، وقفته اتكلمت معاه ، انت منين يا حبيبى ، عامل أيه ، أنت فى المدرسة ولا لأ ، بتعمل الحاجات الحلوة دى ازاى ، المهم اقوله حبيبى أنا مش عايزها بس انا هديك تمنها ومش هاخدها ، فهوا يقولى لأ خدها من غير فلوس ، يعنى هو اجدع منى ، راجل بجد ، ولد ناشف كدا مش طرى زى العيال بتوع نادى الجزيرة وجزيرة الورد فى المنصورة اللى فى العشرينات وبياكلوا سندوتشات هامبورجر ،،،،

مرة صعب عليا تباع السرفيس ، الراجل الكبير اللى قد أبويا الله يرحمه ويحسن إليه ، دار حوار بينى وبينه قدام الناس ،،، بقوله يابا الحاج أنت بتشتغل الشغلانة دى ليه بس ، انت كبير فى السن وواجب انك تستريح ، قالى يابنى انا عندى بنتين مجوزهم ومديون ولازم أسدد الفلوس ، علاوة على انى ( هوا مقلش علاوة صراحة دى من عندى ) عندى بنت تالتة ، حسيت بيه جامد وهو بيتكلم ، بيقولى يابنى انا بشتغل من الصبح حتى الخامسة على السرفيس ، بعد الخامسة اشتغل فى المحطة اغسل عربيات ،،،، لأخر الكلام الكتير اللى دار ، فقولت ليه ايه رأيك بقى أنت روح استريح ومتروحش البنزينة تشتغل وخد كل اللى فى جيبى واسمتع اليوم بحياتك ، فى نهاية الموقف فرغت جيوبى من كل ما أملك وحلفته ميروحش الشغل هذا اليوم ، واكتفيت باللى هيوصلنى لحد بيتى ، والدموع كانت على حدود عيونى الجنوبية وانا نازل من السرفيس ، نظراته لى كانت فيها امل ، ونظراتى ليه كانت فيها ألم .......

تعرفى أنا متأكد من أيه دلوقتى يا أختى ناهد

أنا الميه اللى فى المطبخ اللى بعمل بيها الشاى اتبخرت ....

[NAHID 76]

بسم الله الرحمن الرحيم
أستاذى مختار
تعرف أنا حسه بأيه الان
أنى كل ما اقرأ لحضرتك أشعر بعد ثانيه باالعطش من حديثك المؤثر
وعلى فكره طالما حضرتك عارف المنزله
والمنصوره وجزيره الورد أنا من نفس المكان تقريبا
أمال حضرتك فين الان لانك بتسألنى المواصلات فى مصر عامله أيه
أما عن حكايه عدم معرفتك التحميل أو عدم تمكنك سوف يساعدك فى ذلك كل الزملاء
تحياتى

[رايا]

جميل يا مدام ناهد
وبالرغم ان البعض انتقد المبالغة شوية
فى وصفك للاحداث على اساس ان القصة القصيرة
لا تتحمل الوصف الزائد لكن الحقيقة ان
الواحد لم يشعر بالملل فى القراءة واسلوبك شدنا ان نتتبع
نهاية القصة وان كنت اعتقد ان حادثة حماة وردة ليس مبرر
لخروج ورده وحملها الصينية وهى حامل اعتقد ان فى الريف وفى هذة المناطق شئ مالوف ان تجدى زوجة الابن تخدم حماتها وان تخرج للعمل مع زوجها رغم حملها وبالتالى لوم اهالى القرية انها خرجت غير منطقى بدرجة كافية
لكن بصفة عامة الفكرة واختيار المكان ونوعية الحرفة اختيار موفق فى الربط بين فلسفة الحيا ة والموت .......ابدعتى كالعادة
شكرا ليكى مدام ناهد

[NAHID 76]

بسم الله الرحمن الرحيم
الجميل هو أنتى يا رايا بصفتك الشخصيه
وكمان الجميل أنك العنصر النسائى المتواجد فى القصه ليشد من أزرى ويأخذ بيدى
ويشعرنى بأنى لست وحدى
كل كلام جميل وحنيتك بتشع من بين السطور
شرفتينى وأثلج صدرى تواجدك
تحياتى

[مختار الحسانين]

نعم

انا كنت بحسب حضرتك من القاهرة ، واحنا عندنا فى الدقهلية القاهرة هى مصر ، ولا أيه ؟


أنا من مركز أجا فى محافظة الدقهلية من قرية الزخرفة والزجاج .... ولو تحبى اهدى لحضرتك طقم زجاج مزخرف بالذهب ،،،،،، وأيضا اعمل معيدا بجامعة المنصورة لو فيه أى شئ أقدر اساعدكم فيه تحت أمرك

السلام عليكم ورحمة الله

وان شاء الله أكتب مأساة شعب فى رد قادم