11 سبتمبر ، قصيدة لسيد أبو زهده

[abuzahda]

المشاركة الأصلية كتبت بواسطة unicorn

جميل كعادتك دايما يا استاذنا و الله

مستفز لمشاكلنا و اوجاعنا و ضاغط عليها دايما
و بتفكرنا بيها و بتفسرها
تمام زى أبياتك عن العراق
التى آلمنا فيها دقة وصفك.....
عجبنى اوى هنا شطر البيت
"هتلر" رحل ، "بلفور" عطاهم عالطَبَقْ
حكيت الحكايتين فى بيت واحد!!!
و وصَّلت كل اللى عايز تقوله ببساطة شديدة
و دى بلاغة مش جديدة عليك أبدا يا أستاذنا
عندى بس تعليق صغير من باب التلاكيك يعنى
الى سبق اكل النبق
و دى فاكهة نادرة شبه الزيتون و طعمها اقرب الى التفاح

يمكن تكون موجودة فى كندا و تجيبلنا معاك رطلين هدية

يا تلاكيكك يا محمد أبو مندور
بص يا حمو يا حبيبي:
شيل من دماغك حكاية :
ان انا خواجة ، زي ما انا شلت صورة البرنيطة
علشان ما اكرهكش

أما يازمخشري بحري ، فموضوع "النبْق" بتاعك ده:
ممكن اوصفلك تاجر حبيبي في العاشر يجيبلك طرد أول قطفة
(لا ياراجل ، لا شكر على واجب)

و هتاكل أحلى
"نبْق" بتسكين الباء ، وهو ثمر شجرة "السِدْر" التي جاء ذكرها عند "سبأ" في القرآن الكريم
وهي شجرة كريمة موطنها جزيرة العرب
و تغسيل موتانا بورقها من السنة النبوية الطاهرة المشرفة
و أكل ثمارها لا يحتاج إلى "سباقٍ"
بدليل ان صاحبي التاجر بتاع العاشر ممكن يجيبهولك بالتليفون

أما "النبأ" - وهذا هجاء فصحاها- بفتح الباء - "الساكنة" عند صاحبي التاجر بتاع العاشر اللي هيهريك "نبْق" -
فهو "الخبر" و الذي يسبق إليه "يأكله" ، حتى أنها اعتمدت بلغة الصحافة ، ويكون له "السبق" ؟
والله أعلم

و أهديك صورتي بحديقة منزلي بسكاربرو ، كل ماالشيطان يقولك: ده خواجة ، وريهاله

[unicorn]

يا عم هو انا قلت انك خواجة
عارف يا سيدى انك مصرى مأصل و بالأمارة من شارع جسر البحر كمان
بس من كلامك انت يا ابن البلد يا مجدع ما دام موطنها جزيرة العرب بس تبقى نادرة
يعنى حصادها قليل
و اللى يسبق و يلحق هو اللى يلحق ثمرها
أما عن النطق يا ابو الواجب و تشكيل الحروف و الكلام دة,
دى عامية يا مولانا
و انت سيد العارفين
العامية فى ايدين لعيبة الكلمات زى حضرتك كدة
عجينة طرية
ما يوقفهومش تشكيل حروف
و يغيروه بسهولة عشان يجيبوا القافية ( بلا قافية يعنى)
على فكرة انا زارع الشجرة دى عندى ورا البيت فى ابو تلات فى الساحل الشمالى و بتطرح فى شهر 8
و اللى بيسبق هو اللى بياكلها
ابقى ادينى نمرة الراجل بتاع العاشر دة عشان ابيع المحصول عنده
ما علينا السلام امانة للكندية الجميلة و الصوت الرائع celin dion