القول المأثور من ديوان عبد الرحمن المجدوب

[بريكسي فريد]

جحش البغل لا تغنجيه و بالزيت تدهني جلوده
الصك و العض فيه هاذيك عادة جدوده

اذا ناض ريحك لوح التبن طول قامة
و اذا ما ناض لا تدوي و اطلب غير السلامة

بهت النساء بهتين من بهتهم جيت هارب
يتحزموا باللفاع و يتخللوا بالعقارب

كيد النساء كيدين و من كيدهم يا حزوني
راكبة على ظهر السبع و تقول الحداء ياكلوني

حديث النساء يونس و يعلم الفهامة
يديروا شركة مع الريح و يحسنوا لك بلا ماء

الدنيا مثلها دراعة ما يلبسها غير اللي يشطح
يلبسها و يدوح بها ساعة و ينكد عليها بعد ما يفرح

الدنيا مثلها دلاعة تتقرقب ما بين الدلاع
ماذا لحقوها من طماعة و رمتهم في بير ما له قاع

حطيتها تبرد جاء من لقفها سخونة
هذا دواء من يبرد خير المواكل سخونة

تخلطت و لا بغت تصفى و لعب خزها فوق ماها
رياس على غير مرتبة هما سبب خلاها

حوست شعبان و عرقوب و حوست عرب الزناقي
المال قطعة من القلب جربتها من عناقي

من جاور الجواد جاد بجودهم و من ناسب الارذال خاب ضناه
و من جاور قدرة انطلى بحمومها و من جاور صابون جاب نقاه

فاعل الشر مقبوض فاعل الخير سالك
بالك بالك بدراهمك جبتها لك

شيبني مرو يخمم من علق لاصقين في لهاته
هذاك به هم المراة عزوه يا ناس في حياته

الكاتبة تنادي و معها الخير و لو كان من بعيد تجيها
و الخاطي عليك من يديك يطير رزقك من قبل ما هو فيها

وحدة رخيصة بميات ألف وحدة غالية بجلد قعود
وحدة تجيب الخير معها وحدة تطرده بعمود

نوصيك يا حارث القديم بالك من دخانها لا يعميك
لا تدي المراة المعفونة تتعاون هي و الزمان عليك

اللي يركب يركب ازرق شعرة بشعرة سبيبه
و اللي يصحب يصحب العبد في كل حزة يصيبه

الاجواد ما يقولوا لا لا و حديثهم خطا و صواب
اذا قالك روح و تعالى هذيك مارة الكذاب

من لا يطعمك عند جوعك و لا يحضر لك في مصايب
لا تحسبه من فزوعك قد حاضر قد غايب

خبزة و القلب مشروح و الضحك هو ايدامه
خزار و الكبش مذبوح ما يلذشي علي طعامه

ما كان كالحرث تجارة ما كان كالأم حبيب
ما كان كالشر خسارة ما كان كالدين طليب

يا لايم لا تلومني في وسط الناس و اذا عينك في الملامة فرزني
الفضة الصافية ولات نحاس و الثوب اللي كان وافي عراني

حبيبي ان كان غضب ما صبت له طب بعد المحبة جفاني
نجيب القهوة و نصب و نحدثه بالمعاني

أنا قلبي رهيف ما يحمل تكليف و انتم يا لطيف ما فيكم رحمة
رفدتونا منين كان الحمل خفيف سيبتونا منين صرنا ضعفة

جبت اولادي يقلعوا تنكادي زادوني تنكاد على تنكاد
اذا كانوا الاولاد كيف اولادي لا يعطي لضانيين اولاد

قلبي تقطع بالمواس ما جاء برا نلوحه
من كان كواي للناس يصبر لكيات روحه

يا قايل العار كيفاش يحلى كلامك
تمرض و لا عدت توزار و تتفكر الناس عارك

مثلت روحي لحمام مبني على صهد ناره
من فوق ما بان دخان و من تحت طابوا احجاره

من الثلج عملت مطرح بالهوا غطيت روحي
من القمر عملت مصباح و بالنجوم ونست روحي

قلبي جاء بين المعلم و الزبرة و الحداد مشوم ما يشفق عليه
يردف له الضربة على الضربة و اذا برد يزيد النار عليه

ما يرقد في الليل مهموم اللي يحمل الذل مانع
ما يغسل العرض صابون ما يقلب القلب صانع

خفيف الاقدام ينمل لو كان وجهه مراية
قليل الاكتاف ينذل لو كان جهده عتاية

الامان يا ابني الامان و الامان يقطع الرقبة
حطيت يا ابني الاحسان جبت البلاء بلا سبة

حبيبك حبه و السر اللي بينكم اخفيه
اذا حبك حبه اكثر و اذا تركك لا تسال عليه

الصاحب لا تلاعبه و الناعر لا تفوت عليه
اللي حبك حبه اكثر و اللي باعك لا تشريه

[بريكسي فريد]

اه يا محنتي عدت خماس و الثبن عمى عيوني
خمست على عرة الناس كي يوجد العشا يزعكوني

مكتوب ربي نوديه و الصبر واجب علينا
و اللي نحبوه نخليه يا ناس ما اعتاها غبينة

اذا هي دنيتك مهمومة و زمانك ما هو معك مليح
خلي الدرسة في التبن ملمومة و اسنتى حتى يهب الريح

يا قلب نكويك بالنار و اذا بريت نزيدك
يا قلب خلفت لي العار و تريد من لا يريدك

يا قلبي يا حامل الماء للعقبة و يا طراد الشمس مالك الا مهبول
لا تبغي من لا يحبك بمحبة و اذا حبك القلب غير خلي الناس تقول

اللي بغانا نبغوه على محبة الله نلموه
و اللي جفانا نجفوه هذاك تهنية منه

اللي حب الطلبة نحبوه و نعملوه فوق الراس عمامة
و اللي كره الطلبة نكرهوه حتى الى يوم القيامة

يا ويل من طاح في بير و صعب عنه طلوعه
فرفر ما صاب جنحين يبكي و سالوا دموعه

مثلت روحي لتبيب في كل شجرة ينادي
يعيط يا قلة الحبيب يا خروجي من بلادي

لا في الجبل واد معلوم و لا في الشتا ريح دافي
لا في العدو قلب مرحوم و لا في النسا عهد وافي

راح ذاك الزمان و ناسه و جا ذا الزمان بفاسه
و كل من يتكلم بالحق كسروا له راسه

السابق من الخيل تعتر و ربي يدبر عليها
و اذا يكلخ الفم ربي لا يحاسبني عليها

اعطاته الكف و الدف حتى رداته مثل الرغيفة
تقول دقيقها مسلف و الا كتسال للمعلم حسيفة

الدنيا يكنوها ناقة اذا عطفت بحليبها ترويك
و اذا عطفت ما تشد فيها لباقة تتكفح و لو كان في يديك

يا حسراه بعد اللية و الزبدة الطرية عدت نكدد في عظام الراس
و من بعد ركوبي على الشاحب العلوية عاد ركوبي على بغل نكاس

العبد اللي كان مذوب ما تعيبه كحولة
و الحر اللي كان مجعوب ما يسوى نص فولة

الشواف يشوف من قاع القصعة و الغربال تشوف منه قاع الناس
الكيس يعفس على راس اللفعة و العوام يعوم بحر لا يقاس

المصبط ما درى بالحافي و الزاهي يضحك على الهموم
اللي راقد على القطيفة دافي و العريان كي يجيه النوم

القرد مشى للغرب و الذيب داب راسه
لو كان الخير في البصل ما ينغرس على راسه

[بريكسي فريد]

احرث يا الحراث و طيب راس المراجع
راه مال التجار ما زال ليك راجع

لا تجري لا تهقهق و امش مشية موافقة
ما تدي غير اللي كتب لك لو كان تموت بالشقا

اللي حبك حبه و في محبته كن صافي
و اللي كرهك لا تسبه و خليه تلقى العوافي

اللي طارت من سعود ايامها تتخبل في ريشها و تعيش
و اللي قعدت تا تعوس ايامها ما هي بالصحة و لا بالريش

الطير الطير ما ظنيته يطير من بعد ما والف
خلى قفصي و عمر قفص الغير رماني في بحور خلاني تالف

يا من درى شي الحال يصبح و تدوم لينا الشميسة
اللي عاش لابد يفرح و تزول عليه الغبينة

يا ناس من شاف دمي غابت عني السمية
للبحر نشكي بهمي ينشف يولي تنية

الزيت يخرج من الزيتونة و الفاهم يفهم لغات الطير
اللي ما تخرج كلمته ميزونة يحجرها في ضميره خير

اللي علينا احنا درناه و اللي على الله هو به ادرى
خيط المحبة فنيناه ما خصاته غير المدرا

الناس قالوا لي عجايب و انا طريقي مسرور
اذا صفيت مع ربي العبد ما فيه ضرور

عينك و حواجبك سود و سوالفك هندويلة
يا نابشة الارض بالعود اتكلمي يا هبيلة

يا الجايزات في الطريق يا مقورين العمايم
في راسكم شي عناية و الا راتعين كالبهايم

حليله من ماتت امه و باباه في الحج غايب
و ما صاب حدان يلفه و ضحى بين الدواوير سايب

حجيت سبع حجات و تبت سبع توبات
رجيت نفسي تبقى لغيرها لا بات

شفيتني يا المسكين و شفاني حالك
الزين ما تاخذه و الدين ما ينعطى لك

ادهن السير يسير و به ترطاب الخرازة
النقبة تجيب الطير من باب سوس لتازة

انتهى