تحليلات سيادة الرئيس ـ أبو على

[سيادة الرئيس]

مسائك فله طحن يا هاني
أنا كنت إمبارح في الساقية عملت دماغ مزيكا عاليه كيك
مش ممكن حاجه تحفه تحفه الواد ده دماغه عاليه و فيها مزيكا ماقولكش

ولا الكلام يا هاني بصراحة أحاسيس كلها هياسه خلتني أفوارت
لا و إيه شوية لعب بالنور تخلي دماغك تهيبّر هيبره مالهاش حل يا مان
هى دى المزيكه يا بادي بجد و هو ده الكلام بجد مش قادر أقول غير

WOW WOW WOW

إنتهى الكلام الموجه من أحدهم لهاني

من شوية سنين مش بعيده قوي يعني ما اقدرش أقول زمان كنا نستنى أى حفلة في أى مكان و في أى زمان و لأي حداٍ كان

بس رايح و ضامن إن هناك في حاجه ناويه تحترم عقلي
إن كان شاعر حيقول كلام موزون و له معنى
و إن كان مطرب حيتسلطن و يوري ودني العجب
و إن كان عازف فأكيد زاكر لي و سن آلته عشان عارف إنه حيسمعه عالم ما بيرحموش
ناهيك عن طبعا عن سكة حوش آدم

لكن هوه فيه إيه دلوقت

أقول لحضرتك

طالما العقول هيّست يبقى لازم الفن يهيس و طالما العقول أفّورت يبقى لازم الفن يأفور و طالما العقول هيّبرت يبقى لازم الفن يهيّبر

و طبعا هذا النوع موجه للطبقة الهاى و مثقفيهم يبقى بكل تأكيد ماحدش يقدر يقول إن ده فن هابط لأنك بكل بساطه حا تطلع بيئه و مش فاهم

أغلب رواد حفلاتهم من طبقات الشباب التوتي فروتي و محاولين تقليدهم من الطبقات الدنيا و أقطع دراعي من لغلوغه إن أغلبهم مش فاهم هوه بيسمع إيه لكن لازم يبان

فاهم و يهز دماغه زي ولاد عمو سام و إلا مش حايبقى واد

WOW

ما اقدرش أنكر إن بدايات الساقية كان فيها شئ من الإلتزام بتقديم فن ينفع يتسمع و لغاية دلوقتي بتفلت منها أحيانا كام حفلة لأسماء محترمة

و بدأت المصيبه بوصول موسيقيين و شعراء و مطربين لا يرقوا للتصنيف بكلمة هواة

لا و الأدهى إنهم بيعبوا أسطوانات

و إياك تكون في مكان راقي أو في سهرة راقية يعني أقصد مكان هاى و توجه و لو نقد لأحدهم فحضرتك على طول تطلع واحد مش كلاس

أمثلة أرباع الفنانين على خشبة الساقية كتيرة جدا و العبد لله عنده كتير منها و دي واحده منهم

في الفترة الأخيرة سمعت من كتير عن مغني و ملحن إسمه وجيه عزيز و أغلب ألحانه على كلمات لشاعر إسمه علي سلامه

و بيقدموا كتير في الساقية

دورت و شوفت و سمعت

هوه فين الشعر ما سمعتش غير كلام مهلهل كل همه إن القافية تكون مظبوطة و خلاص فكرني بلعبة كنا بنلعبها زمان و عيب أتكلم عنها

يعني و حياة أبوك بص بيقول إيه

كل ما أوزن ألاقي لسه ناقصني حته
أحط حته تقل حته و أجيب قميص تضيع جاكته

بالزمه ده كلام

أما اللحن فهو مهلهل أكتر من الكلام جمل موسيقية ركيكة و تحويلات بالعافية و أداء مناسب لما ذكرت

بس أوع المواضيع كلها واو بيتكلم عن المعناه و الضياع
لا و التنفيذ دف وقانون و عود و لابسيين تي شيرتات
يبقى لازم يكون فن راقي

و متنساش أول ما يخلص التسقيف و الصريخ لازم يكون نار

يا حضرات الراقيين ده فنكم الهابط

و طالما ده المفضل عند شباب الأيام دي و بيعجبهم يبقى لازم أقول على (علي ) يا رحمان يا رحيم

أخوكم مش ضد الحداثه لكن في حد أدنى للإبداع الفني و إلا حا يبقى بزرميط

أنا عارف إني فتحت النار على نفسي لكن دي هى عقيدتي في الفن

ما اقدرش آكل بسبوسه بالزيت الحار

يا ساقية إنت و اخواتك إتقي الله في ذوق ولادنا

و حياة سيدك النبي إسمع واحده من أسطوانته و احكم انت
و إمعانا في الواو الأسطوانه بعنوان

ناقص حته

و يسامحني عمي الأستاذ صلاح للرفع المباشر هنا ما أنا مش عارف أرفع دي فين

[unicorn]

عندك حق يا ريّس
و ليك حق تفتح للهبل ده موضوع مخصوص
مش خسارة فيهم كلمتين بستفة
و الغريبة ان الولة المطرب صوته يجى منه ابن الإيه
و أكيد برضه فيه مجهود فى البروفات و التجهيزات , بس للاسف كله على مافيش
و ده لضياع الهدف من العمل
الهدف هنا هو الضحك على العقول و ليس احترام العقول تماما كما ذكرت سيادتك
و فكرتنى بالست دى اللى بتقلد شعر نجم اللى جابوها فى القاهرة اليوم و الشئ بالشئ يذكر
و بتقول قصيدة ما حدش فاهم منها حاجة
و كل واحد قفاه أطول من قفا (اللا مؤاخذة) و عمّال يهز فى راسه على الكلام ( ال يعنى الكلام فيه اسقاطات و توريات مش أى حد يفهمها)
و مين اللى قاعدين يلمعوا و يورنشوا فى الهبل
الموسيقار عزت أبو عوف اللى قاطع حتة موكيت من الأرضية و لازقها على راسه
و ذات السبعين عاما رجاء الجداوى
و كله عمّال يهز راسه و يصفق
يا أستاذى سيد درويش عمل يا بلح زغلول يا حليوة يا بلح
و بعرور عمل البلح البلح
الفرق بين الاتنين بسيط
هو فرق فى الهدف من العمل
الأول احترم عقل المصرى اللى أكيد سيفهم ماذا يقصد سى السيد من غنوته
و البعرور لم يحترم الا وسط الراقصات

[ايهاب عامر]

السلام عليكم ورحمه الله وبركاته
استاذى الفاضل استاذ صلاح علام
لا اخفى عليك قلقى الشديد واندهاشى اول ما قرات ما كتبته اولا لكن مع استمرارى ووصولى الى نقلك للكلمات على لسان الروش هانى
ارتحت وقلت انا هنا فى سماعى
اخونا وجيه عزيز محير جدا
ولكن الغريب هو افراد الاعلام له كثيرا
شاهدت له من فتره حلقه كامله فى برنامج واسع المشاهده
وغنى كثير من اغنياته منها المرايا وحاجات ومحتاجات وغيرها
اكيد بعد الحلقه دى زاد محبيه
عموما بمناسبه اللغه اللى حضرتك نقلتهالنا على لسان اخونا هانى الروش والمرووش صاحبه
عارف يا غالى
مشكلتنا اننا بنستعمل كلمات ما نعرفش معناها خالص
هديلك مثل مضحك جدا
عندنا بلد اسمها قها بها اكبر مصنع للمواد الغذائيه فى بر مصر
عارف معنى كلمه قها فى القاموس ايه ؟
الحاجه اللى تسد النفس
اه والله يا غالى
يعنى الشركه الكبيره دى
اسمها
الشركه اللى بتسد النفس للصناعات الغذائيه
وزعلان من اولاد اليوم يا غالى
عليه العوض ومنه العوض
ربنا يخليك لينا يا عبد الوهاب انت وام كلثوم
يخليهم ايه بس يا ايهاب
دول ماتو وشبعوا موت
اوعى تقول كده يا واد يا هوبا
دول باقيين فى وجدان كل اللى بيفهموا فن
ولا ايه يا عمنا الغالى استاذ صلاح
شكرا يا غالى على وجع القلب اللى اتوجعناه من
وجيه عزيز علشان الحته اللى ناقصه منه
تقبل خالص تحياتى

[صلاح السويفي]

المشاركة الأصلية كتبت بواسطة سيادة الرئيس

و يسامحني عمي الأستاذ صلاح للرفع المباشر هنا ما أنا مش عارف أرفع دي فين

بس بشـرط ........

ملخص كلام حضرتك ..هو مضمون موضوع كنت وضعته نبحث في سر هذا الهبوط

نحتاج جدا لرأي حضرتك ..وماهي التصورات الممكنة للعلاج..

واللا مافيش أمل ؟؟

يهمني جدا رأي حضرتك هناك في الموضوع ..

" حوار مع فنجان شاي ..حول أسباب هبوط الأغنية "

http://www.sama3y.net/forum/showthread.php?t=29692

[صالح الحرباوي]

سلام و احترام،
.
أستاذي فخامة الرئيس
لا يسعني إلا أن أقف، لأحييك رافعا القبعة التي أتخيلها فوق رأسي....
يا أستاذي صلاح ...هذه الأنماط من (الهباب) كما تقولون في مصر المحروسة، انتشرت كالوباء (عافانا و عافاكم الله) في جميع أرجاء العالم العربي برمتّه.
و من البديهي و المؤكد أيضا، أنه إذا هبط مستوى الفن و الطرب في مصر... سقط وراءه الفن و الطرب في سائر الأقطار العربية و إذا ارتقى و لمع في مصر رفع معه سائر البلاد العربية...
فندعوا الله بأن يأتينا بالفرج و من مصر...
تحياتي
.

[هاله]

موضوع جيل يااستاذ صلاح
لكن حضرتك جيت على فنانى الساقيه بس
ما حضرتك لو تتبعت منظومه الفن عموما هتلاقى فيها كتير من الاسفاف والتهريج
لكن هتلاقى برضه موجود فن راقى متميز لكن للاسف مش عارف ياخد فرصته فى خضم هوجه الاسفاف والهبوط المسيطره على منظومه الفن عموما
يعنى لو اخدنا مثل المغنى الى ناقصه حته ده هتلاقى صوته كويس لكن ينقصه تكامل اضلاع الاغنيه من لحن وكلمات علشان تبقى اغنيه هادفه فعلا
موضوع متميز من حضرتك
لذا فتقبل تحياتى

[unicorn]

بالمناسبة
لسة كنت مع واحد صاحبى و بنتكلم على الزيادة 30 % فى الأجور و بعدها زيادة 50% فى سعر الوقود اللى حايخللى السلع كلها تولّع نار,
و تعبنا من الكلام و المناقشة فى الاسعار و حال الناس , وحبيت أطرّى الجو فحكيتله على موضوع أحط حته تقل حته دة ,
قاللى بس يبقى اللى عاملها بيرمى على الموضوع دة
و النبى هاتهالى أسمعها بدل ما ارمى نفسى فى المالح

[M O H A M E D]

السلام عليكم

أحب أنبه حضراتكم إن وجيه عزيز بالفعل له موضوع في منتدى سماعي

في قسم المبدعين

وجـــــــيــــه عــــــزيــــــــز

..

و انا متفق معاكم في آراءكم ..

لكن أحب اعرف اللي بيسمعوه بيحبوا فيه إيه ؟؟
_

مع تحياتي و احترامي للجميع و أذواقهم

[سيادة الرئيس]

شكرا لكل المداخلات من السيدات و السادة

عمي الأستاذ : صلاح بك

إن موضوعك واضح و صريح بكل عناصره

المصيبة الجديدة أن ما كنت أضع عليه أمل و هو الإتجاه الجادي في الكلمة و اللحن ها هو قد بدأ السوس ينخر فيه

و لا أجد له مسمى إلا

هبوط الفن الراقي

في النهاية لن يبقى لنا و لا لأولادنا شئ

و أنا قصدت أن يكون موضوعي التالي لهذا هو أغنية ( عم بطاطا )

تجد فيها كل المقومات

كلمة جيدة
لحن شجي و مُطرِب
أداء عالي متمكن

فليس من الحق المضمون أن يفرض علينا كلمة و لحن و أداء ليس فيهم أى ( صنعة ) فنية بحجة أنه يخاطب أبناء جيل ما
فليعلم أن هناك أجيال أخرى ما زالت على قيد الحياة

[بشير عياد]

كيف لم أرَ هذا إلا الآن ؟؟؟
هذا موضوع في الصميم
لابد أن يظلّ مفتوحًا وعلى قيد الحياة
كالمجزرة
نحن بحاجة إلى مثل هذه الكتابة وهذه الاختلافات
بشرط مراعاة أدب الحوار فقد رأيت اليوم بالمنتدى ما ساءني وجعلني أحزن بسبب التراشق بالألسنة
سلمت يداك أبا عليّ