تحليلات سيادة الرئيس ـ أبو على

[سيادة الرئيس]

قال عنه صلاح جاهين

( أنا أشهر منه و هو أشعر مني )

طلعت أدب نزلت أدب
و طالع نازل أئزئز لب

طلعت أدب أدب دبيب
و نزلت أدب سبع سراديب
أنا اخوك الدب مانيش الديب
ومفنجل عيني تقول دا أديب
ولا دا عاشق داب في دباديب
الحلو إلّي بيغطس و يئب
طلعت أدب نزلت أدب

طلعت أدب نزلت أدب
و طالع نازل أئزئز لب

طلعت أدب برجل و إيد
و نزلت أدب و عيشه بتإيد
ريحت رقبتي من التحويد
و عملت صغيّر قلت يا سيِّد
إن كانّك مش شايف لبعيد
إعمل زيي على ضفرك شب
طلعت أدب نزلت أدب

طلعت أدب نزلت أدب
و طالع نازل أئزئز لب

طلعت أدب البط ما بضش
نزلت أدب أخوك ما أبضش
أنا باستعبط و ما بستعبطش
أنا بتلخبط و ما بتلخبطش
أنا صاحب رقه و صاحب تتش
إن زفّر بوئي و لا أسب
طلعت أدب نزلت أدب

طلعت أدب نزلت أدب
و طالع نازل أئزئز لب

طلعت أدب السئف إترج
نزلت أدب البير إعرج
العالم ماله العالم وج
و يا حبيبي كان طعمك فج
إن كنت حبيب أنا برضه مُحب
طلعت أدب نزلت أدب

طلعت أدب نزلت أدب
و طالع نازل أئزئز لب

الله يرحمك يا أستاذ : فؤاد

قافية ( ب و د و ش و ج )
و يرجع تاني للباء بكل سلاسه و حلاوه

و لو قعدت للصبح مش حا اخلص من دي حلاوة كلام

نيجي للحن الأستاذ : سيد مكاوي

أنا أظن إنه إلهامه في هذا اللحن خده من دندنة الأطفال للعبة ( طلعت أدب )

المقام : كرد
طبقة التسجيل : دو

مع ملاحظة أنه في نفس طبقة التسجيل ( دو ) لو كان استخدم جنس الأصل مرة أخرى في الطبقات العالية ففي هذه الحالة يكون المقام ( حجازكاركرد ) كما في ( سماعي طاطيوس )

اللحن من أوله في منتهى البساطة و سهل عم سيد الممتنع واضح من أول نغمه بيقولها

تلت نغمات بيقول عليها المقدمة و بداية الغناء صول و فا و رى

و تتعاد ديما في ( طلعت أدب نزلت أدب )

و في الكوبليهات المتكرره بيروح يجيب سلم المقام من فوقه ( ري جواب )
و ينزل السلم بكامل ترتيبه دون أى قفزه على ( طلعت أدب أدب دبيب و نزلت أدب أربع سراديب )

و ما شابهها في الكوبليهات الأخرى

فيه بساطة أكتر من كده

لكن ما يسكتش و تبان الألمعية و العبقرية بعد كده

( المعترك )

يروح جايب باقي كلام الكوبلية ( مشار إليه بالأحمر ) في نفس واحد بدون أي لازمه و لا حتى رد من الكورس
في إستعراض مقامي غاية في الطرب يخليك تحبس نفسك لآخر الكوبلية لأ و ايه معاهم برضه ( طلعت أدب نزلت أدب )

و على كده لآخر الأغنية

الله يرحمك يا شيخ

نيجي للمؤدي

بصوت الشيخ سيد موجوده هنا

لكن إسماعوها من عمار الشريعي و عوده

التسجيل مأخوذ من سهرة طويلة تحتوي على إبداعات عمارية من كل العصور

و لاحظ كيف يؤدي ما أشرت إليه

أقصد

المعترك

و مساء و صباح الفل

طلعت أدب
كلمات : فؤاد حداد
ألحان : سيد مكاوي
عود و غناء : عمار الشريعي

الرابط مرفوع بنفس تاريخ الموضوع

[الألآتى]

مش واخد بالك ياعم صلاح .. إنه واخد الكرد ( علاوله ) .. يعنى سلم الكرد بدون حرف زيادة أو حرف ناقص .. من الدو للدو .. والأكاده إنه مش مستخدم أى عُربه .. ولا حساس ولا غماز .. ولا حاجه أبداً ..

وبرغم ذلك .. الشغل حلو والجمل لذيذة .. هو ده عم سيد مكاوى ..

الكرد المستعمل .. كرد الدو ( كرديللى ) .. أو ( حجاز كار كرد ) ..

وعجبنى قوى .. السلم الهابط .. إللى شرحته حضرتك .. برضه من الدو للدو .. دون أى حوداية ..

[سيادة الرئيس]

فليسمح لي أحمد عدوية أن أقتبس جملته الشهيرة و أقول

الله عليك يا آلاتي يا أدير

و حلوين أوي الكلمتين دول

( علاوله ) و ( الأكاده )

[صلاح السويفي]

(الأكادة ) إن سماعي عامر بفنـــانين عُلماء في فنهم

وبيتكلموا على أساس علمي وعملي صحيح

مش ناس بيتكلموا كلام كدا(علاوله )

[رائد عبد السلام]

الأساتذة الراسخين في علوم الموسيقي:
- سيادة الرئيس ( أبو قلب دهب )
- عمنا أبو حسام ( الآلاتي )
بصراحة أنتم قامات عالية جدا في الموسيقي ....أنا طول عمري باسمع أغنية (طلعت أدب) والذي زاد جمالها التحليل الموسيقي المتخصص....وأنتم في هذا المجال ....أصحاب باع وخبرة..
ياريت ياعمنا أبو حسام تنظر لإبداعات ركن الأدباتية ولو بنصف عين ...عشان لو عجبك كلام ..يجعل ريشتك تتحرك ..وتثري المنتدي بل والحياة الفنية بغنوة جميلة ....خالص تحياتي لأهل الفن

[سيادة الرئيس]

السيد : رائد
شكرا على كلامتك الرقيقة

[الألآتى]

العزيز : رائد المصرى ..

لولا الكلمة ماكانت الجملة اللحنية .. وكلما كانت الكلمة جميلة .. زاد جمال الجملة اللحنية ..

وأعذرنى لتقصيرى وقلة زياراتى لقسم الإبداعات الأدبية .. هو تقصير ليس مقصود بالتأكيد .. ولكن أعمالى فى المنتدى لا تترك لى لحظة واحدة للغوص فى أرجاء الأقسام .. والنهل من منابعها .. لكن بالتأكيد سأجد وقتاً للمتابعة .. وأنا متأكد أننى سأجد الكلمة الحلوة ..

أشكرك أخى العزيز لإطراءك الجميل ..