” رق الحبيب “
أحمد رامي محمدالقصبجي أم كلثوم
*****
رق الحبيب وواعدني * وكان له مدة غايب عني
حرمت عيني الليل من النوم * لاجل النهار ما ييجي يطمني
صعب عليَّ أنام * أحسن أشوف في المنام
غير اللي يتمناه قلبي
سهرت أستناه * واسمع كلامي معاه
واشوف خياله قاعد جنبي
*****
من كتر شوقي سبقت عمري * وشفت بكرة والوقت بدري
وإيه يفيد الزمن * مع اللي عاش في الخيال
واللي في قلبه سكن * أنعم عليه بالوصال
*****
طلع عليَّ النهار * سهران في نور الأمل
وغنت الأطيار * لحن الهوى والغزل
وفضلت أفكر في ميعادي * واحسب لقربه ألف حساب
وكان كلامي مع اصحابي * عن المحبة والأحباب
من فرحتي بدي اتكلم * واقول : حبيبي مواعدني
لكن أخاف ليكون بينهم * مظلوم في حبه يحسدني
*****
هجرت كل خليل لىَّ * وفضلت عايش مع روحي
أحسن يبان شيء في عينيَّ * من كتر خوفي على روحي
*****
ولما قرب معاد حبيبي * ورحت أقابله
هنيت فؤادي على نصيبي * من قرب وصله
ولقيتني طايل م الدنيا * كل اللي اهواه
بس اللي كان فاضل لىّ * أسعـد بلقـاه
*****
لما خطر ده على فكري * حير أمري
والقرب سبّب تعذيبي
ولقيتني خايف على عمري * ليروح مني
من غير ما اشوف حسن حبيبي
"رق الحبيب"
العرض الشجري