طلبات نوتة أ / عادل صموئيل الجزء الثانى

[عادل صموئيل]

المشاركة الأصلية كتبت بواسطة sfakhri

الأستاذ عادل
1 - أريد أن أطرح استفساراً فيما يتعلق بالنوتات الأساسية للأغاني : هل يعارض ملحن ما أو قائد فرقة موسيقية أو فنان على منح المنتدى النوتات الأساسية لأغانيهم فيما لو طُلِب منهم ذلك ؟

2 - هل هناك قاعدة معينة لاختيار المقياس عند تدوين أغنية ما كأن يكون اثنان على أربعة أو أربعة على أربعة مع ملاحظة أن معظم تدوينات حضرتك تعتمد على الأزمنة الطويلة .
مع دوام الشكر والامتنان .

الاخ العزيز
اولا انا آسف لعدم الرد على الاسئلة احيانا بكون مشغول جدا وبدخل المنتدى بسرعة مش بلحق اقلب فى المشاركات يعنى ساعات فى 24 بيكون الموضوع زاد 3 صفحات .. لكن لما بكون فاضى برجع للخلف مش 3 صفحات ولكن 20 فحة ولا اترك سؤال بدون إجابة .. لأن اسئلتكم واجاباتى دى تنفع مدرسة للأجيال القادمة وبالذات لأن فيه اسئلة انا الوحيد الموجود على قيد الحياة ويستطيع اجابتها لأنها بتكون من صميم ما شهدته انا فى حياتى الشخصية
ونرجع للأسئلة ... زمان اام العمالقة ماكانوش هم بيستخدموا النوتة .. يعنى كانوا بيتعاملوا مع النوتة للفرق الموسيقية .. يعنى الملحن لما يعمل لحن جديد بيطلب احد الاساتذة المدونين وبيكون عادة طبعا مدون هو معتاد على التعامل معاه على طول وبيكون استريح لطريقة تدوينه ... وبالطبع كنت انا احد هؤلاء المدونين .. وكنا بنكتب النوتة بالقلم الرصاص بعدين بييجى واحد نساخ بينسخها بالريشة والحبر الشينى لاسود عشان يبقى شكلها حلو فى العزف تسهل على العازف وواضحة .. ده بالنسبة للفرقة الماسية بالذات .. لكن الفرق الاخرى كانوا بيقوماوا بتصوير النسخى اللى بالقلم الرصاص عدة نسخ ويشتغلوا بيها بس طبعا انت عارف خط اليد ممكن تكون حروف كتير مش واضحة وبالذات رؤوس النغمات يعنى انت لما تكون بتتملى من العود او بتكتب بسرعة مش بتضغط وتكبر رؤوس النغمات بتبقى نقطة مش واضحة وهنا ممكن تحصل اخطاء فى القراءة ..
لكن اعتقد ان مافيش ملحن يبخل بنوتة على اى منتدى وبالذات لما يكون اللحن خلاص اتسمع كتير ... يعنى حصلت هنا فى المنتدى الملحن الكبير المرحوم عبد العظيم محمد بعد وفاته احنا طلبنا منها النوت اللى عندهم وقامت ابنته مشكورة بتصوير كل النوت اللى تواجدت فى بيتو ونزلتها تباعا فى المنتدى
لكن المشكلة انو بيحصل ساعات شوية غباء او روتين من الفرق الحكومية يعنى مش بيرضوا يخرجوا النوت .. عشان ماتجيش فرقة تانية تعزف اللحن وتنافسهم مع ان رأيى انا العكس انا لو مدير فرقة الموسيقى العربية مثلا كنت اقدم اى نوتة يطلبها اى طالب للنوتة انو ممكن يصور نسخة منها حتى ولو لقاء اى أجر رمزى وبذلك نجمع مبلغ محترم ممكن نعمل بيه اى تطوير خطير .. يعنى النوت فى فرقة الموسيقى العربية بالآلاف ممكن بالفلوس اللى تيجى من التصوير نشترى كذا جهاز كمبيوتر وطابعات .. ونجيب موظفين بيعرفوا يكتبوا نوتة على الكمبيوتر ويقوموا بكتابة كل النوت الموجودة على الكمبيوتر واكيد ده مكسب كبير جدا جدا للموسيقى العربية وللتراث الموسيقى
ويبقى ماكلفتش الحكومة حاجة يعنى من ثمن التصوير للطالبين اعمل المشروع الجميل ده لكن حتقول لمين ؟؟؟؟ مع ودود الروتين الحكومى
اما سؤالك الاهم انا لما بكتب نوتة 2/4 او 4 / 4 ده بيكون مش بمزاجى او انا اللى بختار اكتبها ميزان ايه
بيكون طبيعة اللحن او الايقاع كده يعنى هنا اسمع اوى اوى اغنية طوف وشوف من ام كلثوم ... ثم راجع مع النوتة تلاقى الاجزاء اللى انا عاملها 2/4 بتكون اداء زى المارش العسكرى او ايقاع فوكس
اما الاجزاء اللى بعملها 4/$ بتكون ايقاعات رباعية زى الوحدة الكبيرة ... يعنى اللى بيتحكم فى الموضوع اللحن نفسو والايقاع نفسو ... احيانا لما بيكون الايقاع اصلا 2/4 وانت تكتبو 4/4 احينا بييجى آخر الجملة تلاقى المازورة فيها نوارين فقط والجملة خلصت كده ... بيضطر اللى بيدونها يمسحها كلها ويدونها تانى 2/4
المشكلة ان فيه فرق واضح جدا جدا بين 4/4 و 3/4 لكن بين 4/4 و2/4 مش حتلاقى فرق واضح
لذلك لازم تاخد بالك من الايقاع او طبيعة الجملة ,,, بالطبع لو راجعت كتير من النوت اللى فيها التحويل ده مع سمع الالحان نفسها حاتحس بالفرق
مع اطيب تحياتى عادل صموئيل