اهداء لشاعر /طارق العمرى
الجده والقمر
ينزل لحدينا
تحلب ضياه على كفها
و إحنا ف سُبات
احكى ياجده ع اللى فات
احكى ياجده ع اللى مات
وع اللى باع الملحمة
لملمى قلب التاريخ
احكى يا جده ورتلى
علشان ولادك من سنين
متعطشين
ابدى كلامك بالصلا
هتلاقى قلبى اللى اختلى
قاعد ومستنى الندا
قلبك سايعنا كلنا
حجرك كبير وِسْع المدى
يا ستنا وست البنات
الغوله ساكنة حيِّنا
خواجايه لابسة لبسنا
نزلت بلدنا وكان فرح
و كان مرح
و كان قانون
فلاح بيزرع قمحنا
ويغنى ع الارغول
وبلدنا متزوقه
محلاها فى الصوره
الواد شجيع بالأوى
والبنت أموره
ولانها غوله وبتكره
الفرحه
غمت عنين البنت
بالطرحه
البنت عوره
والولد كافر
خلت كبير البلد
ف الشرع بقى
كافر
الاسطى ساب مصنعه
بقى ف الكلام حريف
ضاع الربيع واختفى
بين الشتا والصيف
فى ناس بتزرع أمل
وناس بتزرع خوف
نفس الحكايه من زمن
نفس الانين
لا ديك بيدن ولا
حتى الولاد نايمين
الجده والقمر( لصبره ابو حسن)
العرض الشجري