رد: عايز واسطه
[QUOTE=محمودسعد;346824]
اقتباس:
المشاركة الأصلية كتبت بواسطة سعدالشرقاوى
عايز واسطة
لمّا تلاقى السّلم عالى
لمّا الكلّ يقول وانا مالى
لو كان حالك يشبه حالى
قوم تعالالى نشوف لك واسطه
,,,,,,,,,
هيّا الكنز اللى مخبّيلك
شمس رخيصه تنوّر ليلك
عايز الدّنيا بحالها تجيلك
شغـّل مخـّك شوف لك واسطه
,,,,,,,,,,
لمّا الحقّ يضيع من ايدك
لمّا النّدل ح يصبح سيدك
لمّا درجتك مش ح تفيدك
تبقى حياتك من غير واسطه
,,,,,,,,,,,
لمّا تعوز تفرح بوجودك
وتبنى نجاحك على مجهودك
كلّ النّاس ح يلاحظوا جمودك
وصعب وصولك من غير واسطه
,,,,,,,,,,,
لمّا الدنيا تبقى مصالح
واللى يضرّ يتوه فى الصّالح
واللىّ يخاصم واللىّ يصالح
لازم يبحث عن ميت واسطه
,,,,,,,,,,,
لمّا الحقّ يتوه فى الباطل
والمقتول يتحوّل قاتل
لمّا الايد تتمدّ لعاطل
يبقى ياويل اللى مالوش واسطه
,,,,,,,,,,,,
عايز تسرق عايز تنهب
عايز تقعد عايز تهرب
عايز تشتم عايز تضرب
قبل دا كلـّه تشوف لك واسطه
,,,,,,,,,,
عايز تحلم أىّ منام
عايز تاكل واللا تنام
أو فى الحرّ تاخد حمّام
كلّ شئونك عايزه الواسطه
,,,,,,,,,,,
فى كلّ مجال لو مانتش غاوى
تشغـّل مخـّك تعمل حاوى
أولى اعدادى ساعتها تساوى
مؤهّل عالى لو فيه واسطه
,,,,,,,,,,
طول ما جناب البيه مسنود
يبقى طموحه مالوهش حدود
ولا بيلاقى طريق مسدود
والمفتاح مصنوع بالواسطه
,,,,,,,,,,
قول لى الزّاى ح تعالج ولدك
واللا تقضىّ مصالح والدك
لو حتىّ المسئول من بلدك
مش ح تخلـّص من غير واسطه
,,,,,,,,,,,
بكره تكلـّم بيها خواتك
بكره تقابل بيها حماتك
ولو عوزت أختك واللا مراتك
خوفى ساعتها تشوف لك واسطه
,,,,,,,,,,,
لمّا تركنا الفرصه ياغالى
ولسان حالنا يقول وأنا مالى
وحقّ عيالك ويّا عيالى
مدهوس تحت رجول الواسطه
,,,,,,,,,,,,
عمر ألدوله ما تلمح خيرك
طول ما ف ايدك فرصة غيرك
جبت حرام وكـّلته لغيرك
روحت النّار ومعاك الواسطه
,,,,,,,,,,
خيبه ودخلت كلّ حياتنا
رفعت نسبة سلبيّاتنا
نفسى دقيقه قبل وفاتنا
نور العدل يطفىّ الواسطه
,,,,,,,,,,
نفسى أشوفنا صحينا وفوقنا
ومن غير واسطه أخدنا حقوقنا
يحكم فينا ضميرنا وزوقنا
ويقتل بينا وباء الواسطه
,,,,,,,,,,,, الله الله الله الله
حد من اللي بيعرفوا يتكلموا يعمل معايا واجب ويتوسط بيني وبين الراجل الشرقاوي ده ؟
انا مش عارف اتكلم ؟
الله الله الله الله وخلي بالك ياريس ان الحكايه دي مش هاتفوتني وهاخدك واسطه لسعد الشرقاوي |
تصور يا استاذ/محمود
اول مره أعرف انك شاعر غنائى كبير
مش بس أمير الطرب
فين ياعم أشعارك وأغانيك المكتوبة
|
العرض الشجري