رخصة هدم

**سعدالشرقاوى** · #1 13/11/2009, 13h22

(رخصة هدم)

مشيت على قدّى,حاولت أعدّى
وقلت أعيش لو نصّ حياتى
ما قدر طوقى يبصّ لفوقى
علشان ضهرى المحنى مطاطى
واستنـّيت العمر يعدّى
وقلت حا تفرج قبل وفاتى
كل الخلق لقيتهم ضدّى
حتىّ عيالى ياناس ومراتى
,,,,
قال بيقولوا عليّه كبرت
وعايش من زمن الكوانين
بحكم السنّ خلاص خرّفت
ما عنتش فاهم فى القوانين
قول م الجيرة لقيتنى ف حيرة
كأنىّ صبحت من المجانين
علشان عايز أبنى لى أوضة
أجوّز فيها الواد حسنين
,,,,
لسّه باهدّ فى وسط الدّار
عايز أأسّس قبل ما ابنى
طبّوا خلايق من غير داعى
قلت مداعى,وجم فرح ابنى
قومى يا حاجّه وقابلى ضيوفك
قالت فوتنى ف حالى وسيبنى
دول م الحىّ وم الجمعيّه
عايزين رحصة قبل ماتبنى
,,,,
قلت ها رخّص ايه ياوليّه
انتى لديمه تعكـّرى دمّى
انتى نسيتى يومين دخلتنا
وكنـّا ف أوضه فى شقـّة أمّى
والحمّام كان بيكفـّينا
زىّ ما كفـّا أبويا وعمّى
وعلشان يومنا يفوت بسلامه
لازم تـتخرصى وتتلمّى
,,,,
قول شوّحت الفاس من ايدى
وروحت عليها وانا مش فايق
انتى مافيش فى دماغك حاجه
ومخـّك فاضى وبالك رايق
وكلامك ماسخ من أصله
على سنـّك أصلا مش لايق
وانا عرقان مش وقت هزارك
مش ها ضحكلك وانا مضـّايق
,,,,,
ولمّا عدلت الشال على راسى
وروحت منادى ..يامرحبتين
فى الافراح ان شالله نجيلكم
أنا والحاجّه وعيّلتين
كلّ ماحدّ يجوّز ابنه
ندر عليّه أجيب سبتين
واحنا فرحنا ماحدّدناهشى
ويمكن يبقى ف شهر اتنين
,,,,
بصّلى واحد أفندى وقال لى
انت عبيط واللاّ اتجنـّيت
قلت دا بيهزّر ويّايا
حلوه يابيه, شرّفت البيت
لقيت الكلّ بيشخط فيّه
ولمّوا عليّه زعيط ومعيط
قبل الهدم تطلـّع رخصه
وعندك جنحه عشان هدّيت
,,,,
قلت ياسيدى أمّا تكلمنى
تسيبنى أردّ وتدّينى فرصة
وحياة رحمة أبوك فهّمنى
أنا مش بيه ولا حا فتح بورصة
ودا فرنى البلدى وهدّيته
وما حلتيش غير تمن العرصة
مش سوّاق ممسوك فى كمين
جاىّ تقول لى بطاقة ورخصة
,,,,,
وبرضه بسيطه حا نبنوه تانى
دا فرن وكنـّا بنخبز فيه
وعقبال عندك جبناه غاز
وما فيش غاز راضى يكفـّيه
تعالى معايا وشوف انبوبته
والخرطوم المربوط فيه
وفيه مفتاح بتعلـّيه منـّه
وترجع لو حبيت تطفيه
,,,,
قال لى اتأدّب ماتهزّرشى
عايزنى ألطـّشلك واللا ايه؟
يالله معانا تروح ع المركز
تمضى تعهّد عند البيه
انـّك تعمل رخصة هدم
واتحضـّرنا نعاينوا عليه
وحا تنحفـّظ ع الادوات
واللى انهدّ لازم تبنيه
,,,,
لازم تثبت انّ الفرن
دا مبنى فى أرض ماهش زراعيّه
ورسم كروكى ,وتصوير جوّى
ومعاهم اثبات ملكيّة
وتبنى الدور الارضى قراش
والعلوى حسب الارضيّة
قلت (قراش)؟قالوا يعنى (جراج)
نطقوها بلغتى العامّية
,,,,
شرط أساسى ف بند الرّخصة
أبنى قراش وفى وسط الدّار
وانا عمرى ما قنيت عربيّة
وعندى ياناس م الدنيا حمار
واهو شايل ويّايا همومى
وبينقل فى سباخ وخضار
طول الليل متونـّس بيه
بينهّق على باب الدّار
,,,,
قول وصّونى على الطلبات
قبل سعادة البيه ما يسيبنى
والمطلوب كتبوه فى عريظة
وبعد مااجيبه أهدّ وأبنى
جيت عيّان ورقدت ف دارى
بدوخة تاخدنى ساعات وتجيبنى
قول ما قدرتش أهدّ فى دارى
قبل ما أهدّ خطوبة ابنى
,,,,,,

**على عبداللاه** · #2 13/11/2009, 22h07

يا باشا انت فعلا مالكش حل
كده يلزمك محامى علشان الجنحه
ههههههههههههههههه
زياره بتجره
على راى النباروه

**سعدالشرقاوى** · #3 14/11/2009, 07h58

اقتباس:

المشاركة الأصلية كتبت بواسطة على عبداللاه

يا باشا انت فعلا مالكش حل

كده يلزمك محامى علشان الجنحه
ههههههههههههههههه
زياره بتجره
على راى النباروه

يابو علوه
صباحك فل وياسمين
انا عامل التوكيل لحضرتك
مش عشان الجنحة
لكن عشان تشوف حكاية بند القراش فى الدور الارضى دى
لانك عارف البير وغطاه
والمديوب مايلزموش قراش
يلزمه بالفم المليان كلمة من اربع حروف (طوّاله)
حتى لايظن المشرّع ان نجوع كفر الشيخ ونباروه
يسرى عليها ما يسرى على شارع جامعة الدول العربية
ويسمى بقانون البناء الموحّد
الله يعينك
المهمة بدأت تصعب

**ام مدحت** · #4 22/11/2009, 22h35

ياصاحب التوته
اضيفك علما بانه
قد زادة بندا جميلا
وهو تكوين مجلس ادارة للسكان يتم انتخاب
رئيسه بواسطة السكان
تكون مهمته التبليغ عن مخالفاتهم
والبقية تاتى

**NAHID 76** · #5 23/11/2009, 10h48

بسم الله الرحمن الرحيم
خالى سعد الشرقاوى
بأنامل الجراح المتمكن تمسك بدل القلم مشرط لتفتح عن كوامن الجرح والألم فى دقه متناهيه وأسلوب سهل سلس يصل للقلوب قبل العقول
تقديرى لهذا التمكن المتفرد ونحن معك وبك تحت التوته
أخر كلامى سلام

**سعدالشرقاوى** · #6 23/11/2009, 21h24

اقتباس:

المشاركة الأصلية كتبت بواسطة NAHID 76

بسم الله الرحمن الرحيم
خالى سعد الشرقاوى
بأنامل الجراح المتمكن تمسك بدل القلم مشرط لتفتح عن كوامن الجرح والألم فى دقه متناهيه وأسلوب سهل سلس يصل للقلوب قبل العقول
تقديرى لهذا التمكن المتفرد ونحن معك وبك تحت التوته
أخر كلامى سلام

نورتينا ياست الكل والدنيا من غيركم كانت صعبة
على كل حبايبكم
وربنا مايحرمناش منكم
وهذا التعديل هديتى اليك بعداضافة بند مجلس الادارة بتاع ام مدحت
لانها عايزه تترشح ضدى

(رخصة هدم)

مشيت على قدّى,حاولت أعدّى

وقلت أعيش لو نصّ حياتى

ما قدر طوقى يبصّ لفوقى

علشان ضهرى المحنى مطاطى

واستنـّيت العمر يعدّى

وقلت حا تفرج قبل وفاتى

كل الخلق لقيتهم ضدّى

حتىّ عيالى ياناس ومراتى

,,,,

قال بيقولوا عليّه كبرت

وعايش من زمن الكوانين

بحكم السنّ خلاص خرّفت

ما عنتش فاهم فى القوانين

قول م الجيرة صبحت ف حيرة

وقالوا عليّه من المجانين

علشان عايز أبنى لى أوضة

أجوّز فيها الواد حسنين

,,,,

لسّه باهدّ فى وسط الدّار

عايز أأسّس قبل ما ابنى

طبّوا خلايق من غير داعى

قلت مداعى,وجم فرح ابنى

قومى يا حاجّه وقابلى ضيوفك

قالت فوتنى ف حالى وسيبنى

دول م الحىّ وم الجمعيّه

عايزين رحصة قبل ماتبنى

,,,,

قلت ها رخّص ايه ياوليّه

انتى لديمه تعكـّرى دمّى

انتى نسيتى يومين دخلتنا

وكنـّا ف أوضه فى شقـّة أمّى

والحمّام كان بيكفـّينا

زىّ ما كفـّا أبويا وعمّى

وعلشان يومنا يفوت بسلامه

لازم تـتخرصى وتتلمّى

,,,,

قول شوّحت الفاس من ايدى

وروحت عليها وانا مش فايق

انتى مافيش فى دماغك حاجه

ومخـّك فاضى وبالك رايق

وكلامك ماسخ من أصله

على سنـّك أصلا مش لايق

وانا عرقان مش وقت هزارك

مش ها ضحكلك وانا مضـّايق

,,,,,

ولمّا عدلت الشال على راسى

وروحت منادى ..يامرحبتين

فى الافراح ان شالله نجيلكم

أنا والحاجّه وعيّلتين

كلّ ماحدّ يجوّز ابنه

ندر عليّه أجيب سبتين

واحنا فرحنا ماحدّدناهشى

ويمكن يبقى ف شهر اتنين

,,,,

بصّلى واحد أفندى وقال لى

انت عبيط واللاّ اتجنـّيت

قلت دا بيهزّر ويّايا

حلوه يابيه, شرّفت البيت

لقيت الكلّ بيشخط فيّه

ولمّوا عليّه زعيط ومعيط

قبل الهدم تطلـّع رخصه

وعندك جنحه عشان هدّيت

,,,,

قلت ياسيدى أمّا تكلمنى

تسيبنى أردّ وتدّينى فرصة

وحياة رحمة أبوك فهّمنى

أنا مش بيه ولا حا فتح بورصة

ودا فرنى البلدى وهدّيته

وما حلتيش غير تمن العرصة

مش سوّاق ممسوك فى كمين

جاىّ تقول لى بطاقة ورخصة

,,,,,

وبرضه بسيطه حا نبنوه تانى

دا فرن وكنـّا بنخبز فيه

وعقبال عندك جبناه غاز

وما فيش غاز راضى يكفـّيه

تعالى معايا وشوف انبوبته

والخرطوم المربوط فيه

وفيه مفتاح بتعلـّيه منـّه

وترجع لو حبيت تطفيه

,,,,

قال لى اتأدّب ماتهزّرشى

عايزنى ألطـّشلك واللا ايه؟

يالله معانا تروح ع المركز

تمضى تعهّد عند البيه

انـّك تعمل رخصة هدم

واتحضـّرنا نعاينوا عليه

وحا تنحفـّظ ع الادوات

واللى انهدّ لازم تبنيه

,,,,

لازم تثبت انّ الفرن

دا مبنى فى أرض ماهش زراعيّه

ورسم كروكى ,وتصوير جوّى

ومعاهم اثبات ملكيّة

وتبنى الدور الارضى قراش

والعلوى حسب الارضيّة

قلت (قراش)؟قالوا يعنى (جراج)

نطقوها بلغتى العامّية

,,,,

وجنب قراشك تعمل غرفة

مجلس لأدارة الساكنين

وحا تترشـّح تمسك ريّس

يعنى على عيالك لاتنين

واتبلـّغنا بأىّ مخالفه

تحصل منهم اللاّ نشدّك

واوعاك تسقط فى الترشيح

واللا مراتك تدخل ضدّك

,,,,,

شرط أساسى ف بند الرّخصة

أبنى قراش وفى وسط الدّار

وانا عمرى ما قنيت عربيّة

وعندى ياناس م الدنيا حمار

واهو شايل ويّايا همومى

وبينقل فى سباخ وخضار

طول الليل متونـّس بيه

بينهّق على باب الدّار

,,,,

قول وصّونى على الطلبات

قبل سعادة البيه ما يسيبنى

والمطلوب كتبوه فى عريظة

وبعد مااجيبه أهدّ وأبنى

جيت عيّان ورقدت ف دارى

بدوخة تاخدنى ساعات وتجيبنى

قول ما قدرتش أهدّ فى دارى

قبل ما أهدّ خطوبة ابنى