[عادل صموئيل]

الاخ العزيز فؤاد العلمى
احترم وجهة نظرك التى تدل على خبرة علمية

احنا كخبراء بنقيس اللحن بما فيه من تحوبلات مقامية جميلة وتعدد فى المقامات وتعدد فى الايقاعات بس الاتنين بيبقوا مش استعراض عضلات فنية فقط ولكن عمل فن بمعنى انك لو جبت فى اى لحن لعبد العوهاب او السنباطى ( وبالطبع جميع العمالقة ) لو جبت اى تحويلة مقامية او تجويلة ايقاعية تلاقيها مش معوملة اعتباطا يعنى يقول هنا بنعمل بعد 4/4 نعمل 10 /8 ولكن بتبقى عمل من الروائع واى دارس موسيقى او محلل موسيقى بيقف عندها طويلا ... ولا تنسى برناج غواص فى بحر النغم بتاع عمار الشريعى كان بيمسك اى لحن من بتوع العمالقة ويحلله مازورة مازورة ويقف عدن كل نقلة طويلا وعمار الشريعى كان عبقرى وماحدش بيفرض عليه يختار اللحن او يقول كذا ب\ليل ان معظم خبراء الموسيقى كانو بينتظروا بشغف برنامج غواص فى بحر النغم ويستكشفوا بدقة حاجات ممكن تكون مرت عليهم مرور الكرام ... عمار الشريعى انتقل الى رحمة اللع من سنتين يعنى اكيد كان بيسمع كل الاغانى اللى طلعت بعد سنة 1990 اى بعد انتهاء عصر العمالقة وتلاقيه توقف عن اعداد حلقات جديدة من برنامج غواص فى بحر النغم واستمرت الاذاعة فى تقديم اعادة لحلقاته القديمة وذلك اكبر دليل ان بعد وفاة العمالقة ماحدش عمل الحان بالقيمة اللى ممكن ان واحد زى عمار الشرعى ممكن يقعد يحلل فيها ... ولو انت دققت فى معظم الاغانى اللى بتتعمل دلوقتى تلاقيها كلها تقريبا صبا على درجة عالية جدا بتقتل الطرب بتاع الصبا اللى فى مكانه الطبيعى اللى على الدوكاه ... وانا ما اعتقدش انى سمعت اغنية من الحديث فيها ايقاع لا 10/ 6 ولا 6 / 8 يعنى كلها تقريبا ايقاع واحد
ما لاحظتش طفرات ممن بتاعة زمان يعنى بليغ مثلا عمل اغنية الحب كله والاغنية دى عبارة عن كمية من الايقاعات غير مسبوقة فى اغنية واحدة بالقدر الكبير ده .... الخلاصة فيه حاجة اسمها اغنية طربية تسمعها فى مسرح واغنية تسمعها فى كباريه او فى ديسكو .. الاغنية المسرحية مثل اغانى ام كلثوم او عبد الوهاب او النوعية دى يعنى الجمهور بيقعد محترم وصامت لكى يسمع ويطرب فقط وهذا النوع انقرض اما الاغنية بتاعة الديسكو وهى التى يسمعها الجمهور وهو يرقص وهاتان النوعيتان ما ينفعش انك تخلص بينهما يعنى مثلا ايام ام كلثوم كان لما الجمهور ينفعل اوى ويصقف ويتسحن وممكن يقف وهو بيصقف كان ام كلثوم ما تعرفش تغنى وهمكده كانت بتخلى الموسيقى تعيد لحد ما يقعدوا ويسكتوا ويبقوا مؤهلين للسماع بعكس دلوقتى تلاقى المغنى هو بنفسه يفض يتنطط ويصقف ويستثير الجمهور لكى يخرج عن وعيه وما يبتديش يغنى غير لما الناس كلها تقف وترقص والفرق طبعا واضح
الغناء زى الطعام يعنى امتى تاكل وجبة خفيفة وامتى تاكل وجبة دسمة كان زمان لو فيه 25 مطرب معروف لو انا عملت مسابقة وسمعتك 25 جملة انت تقول على طول ده صوت مين لكن النهاردة فيه 999 مطرب وصعب جدا انك لو سمعت فقط تميز ده صوت مين لأنهم كلهو صوتهم واحد وماحدش منهم حتى لو نوعية او ستايل محدد فى الغناء واخطر شىء اليوم هو المؤثرات الصوتية عاملة زى ماكياج واحد بتحطو كل الستات بحيث يبقوا كلهم شكل واحد انا بلطبع سمعت كل العماقة على الطبيعة تلاقى صوتهم فى التسجيل هو هو اما اليوم تلاقى اللى بيغنى صوتو على الطبيعة شىء وصوتو فى التسجيل شىء تانى مختلف 100% لذلك كلهم لو حد استضافهم فى برنامج تليفزيونى مش بيرضوا يغنى يقولوا ( عندى انفلوانزا ) ولو غنى بيكون بلاى باك
مع اطيب تحياتى