[عادل صموئيل]

المشاركة الأصلية كتبت بواسطة منذر44

استاذ عادل انت قلت في وقت سابق جملة معبرة اعجبتني جدا وهي ان غياب المرفقات عن المنتدى
كغياب المياه عن نهر النيل وها قد عادت المياه الى مجاريها فمبروك لنا جميعا عودة الروح للمنتدى وبعد طول انتظار
فشكرا لجهود كل من ساهم في هذا الانجاز
وبعيدا عن السياسة احب طرح موضوع للنقاش
استاذ عادل ومن خلال متابعتي لأغاني الزمن الجميل وجدت ان اغلب الاغاني الطويلة هي من
اختصاص المطربات كالسيدة ام كلثوم ووردة وفايزة احمد ونجاة وميادة الحناوي بينما المطربين
اصحاب الاغاني الطويلة فهم قلائل واهمهم عبد الحليم حافظ له عشر اغاني طويلة وفريد الاطرش
له اقل من هذا العدد بينما اطول اغنية لعبد الوهاب وهي من غير ليه وهي لحنها اساسا لعبد الحليم
ومن هنا السؤال الذي يطرح نفسه لماذا؟ ما هو السر في ذلك ؟

اخى العزيز
مفيش سر فى الموضوع .. ولكن هى بتيجى بظروفها ... والعملية بتبقى توابع لسوابق .. بعنى ان الجمهور تعود على ام كلثوم مثلا وهى تغنى اغنية واحدة فى ساعتين وبالعكس كان الجمهور بنفسه يطلب الاعادة .. وده بيخلى الفنان يستمر فى هذا النهج ... فتخصصت ام كلثوم فى الاغانى الطويلة حتى لما عملت اغانى فيلم رايعة العدوية كان فيه كذا اغنية جميلة جدا وقصيرة لكنها لم تغنيهم فى حفلات لأن الجمهور بيحتاج يسمع منها الاغانى الطويلة
وتلى ام كلثوم فى هذه الدرجة فايزة احمد بالذات لن معظم اغانيها الاخيرة كانت مش اقل من 17 صفحة بس اهم شىء الذكاء يعنى فايزة كانت بتلاحظ ان الجمهور مع طول الاغنية بيطلب منها تعيد مرة ثانية وثالثة ولما تعيد من نفسها كان الجمهور بيصفق للإستحسان .. اما وردة نوعت نفسها بين الاغانى الطويلة والقصيرة يعنى لما كان عبد الوهاب بيلحن لها كانت بتعمل اغنى طويلة لأن الجموهر بيتذوق الحان عبد الوهاب بدرجة عالية جدا وبيحس ان كل ماتطول الاغنية انه حايسمع كمية اكبر من الدرر ... والذكاء زى ماقلت هو اللى بيخلى الفنان يطلع لفوق او يهبط الفنان الذكى بيعمل اغنية من نوعية ما بيحس ان الجمهور عايز كده بيكرر التجربة .. ومعظمهم كانوا يميلون الى كذا اغنية قصيرة فى الحفل بحيث ان الجمهور بيسمع الوان مختلفة وايقاعات وسرعات مختلفة وبيفضل متابع مش بيزهق منو ... لأن كان زمان انت بتروح تسمع فقط وهنا لازم تسمع ماتريد لكن الامر اختلف هذه الايام الجمهور مش بيروح الحفلة يسمع ولكن لكى يصفق ويتمايل ويصرخ مع الدوشة اللى ع المسرح ومن هنا فهو بالطبع لايسمع شيئاً ... يعنى ممكن يعدى لحن جميل وراه لحنزى الزفت والجمهور بيرقص طالما سامع ايقاعات .. ييعنى انا شخصيا لما طلع كاظم الساهر لم يستهوينى مطلقا وحاولت اسمعو عدة مرات والسبب انا حسيت انو غبى فنيا بمعنى انو كان بيغنى قصيدة طويلة ابيات كتير جدا على جمهور مش بيسمع اصلا ... يعنى ام كلثوم كانت لما تغنى قصيدة طويلة كان لازم انها تعيد الجملة 3 او 4 مرات حتى انت تستوعبها وتحسها ثم تعيد الكوبليه بحاله 3 مرات بحيث انك تبتدى تحفظها وتتمتع بها .. سمعت كاظم الساهر بيغنى الجملة مرة واحدة ويروح للتالية ماشى زى القطار السريع لما تنظر من النافذة لاتستوعب شيئا .. وعلى شباب اصبح مستواهم فى اللغة العربية وفهم الشعر صفر بس هم مش بيسمعوا ولكن بيصفقوا ويتمايلوا ويرقصوا وكل مجموعة من الجمهور تطلع بنت حلوة ترقص فى الكرسى تلاقى 170 رقاصة فى الجمهور يعنى جو مش جو سمع بتاتا ..
الخلاصة انا النهاردة لو فيه حفلة انا ممكن اعزف اغنية طويلة لم كلثوم او 7 اغانى قصيرة متنوعة .. لكن السؤال الخطير امتى اعزف ده وامتى اعزف ده ... يعنى حسب نوعية الجمهور
مع اطيب تحياتى عادل صموئيل