[dorame]

الاستاذ الكريم والفاضل عادل صموئيل
اختيارك لاغنية اسالك الرحيل جميل جدا لان ذوقك اجمل وفنك وكرمك اعلى
الاستاذ فواد
شكرا جزيلا لهذا المقال عن الاسطورة الفنية السنباطي لرائعته الاطلال وكم ارتاح عندما ارى كلام جميل عن السنباطي
الاستاذ عادل والاستاذ فواد
في حكاية عن اختلاف بين كلثوم والسنباطي عن اجر اللحن فافترقوا واتجهت الى اللالحان الوهابية وبليغ والموجي لكي توصل رسالة للسنباطي عن استطاعتها لتركة وبدا عبدالوهاب باول لحن انت عمري فصاح الجمهور وكتبت الصحف " ذهب العهد السنباطي وبدا العهد الوهابي" ولكن كبرياء السنباطي ظل حتى تاهت ام كلثوم بتلحين الاطلال فارشدوها ما لها الا السنباطي فاصلحوا بينهم بعد مضي سنتين وكان السنباطي خائف قليلا من ردت فعل الجمهور لانهم تعودوا قليلا على الاغاني الاسرع شوية ولكن كانت الاعجوبة وكتب الاعلام لا عهد الا عهد السنباطي فهل هذة رواية من الف ليلة وليلة ام هي حقيفية فعلا

تحياتي بكر الجنيد
اخى العزيز
انا بالطبع كنت لسه صغير وقت الموضوع ده وماكنتش دخلت الوسط الفنى لكن بخبرتى اللى اتعلمتها بالعمل معاهم فترة طويلة اقول اللى ممكن والله طبعا اعلم
الفنان المبدع اللى مثل ام كلثوم ( وكانت بخيلة جدا فى الحياة العامة ) لكن مش ممكن تبخل على فنها , يعنى رياض السنباطى الموسيسقار الوحيد اللى كانت ام كلثوم تسميه الموسيقار العبقرى
يعنى مش ممكن تستغنى عنه عشان اى فلوس مهما كانت وظل السنباطى لآخر لحظة بياخد اعلى اجر فى تلحينه لأم كلثوم وبرضاها التام
وقصة تلحين عبد الوهاب لأم كلثوم من الواقع ان كانت هى وعبد الوهاب معزومينفى سهرة موجود فيها الزعيم الراحل جمال عبد الناصر واصر انو يقعد على مائدة العشاء بينهم
وقال لهم ليه ماتتعاونش مع بعض يعنى اللى عند عبد الوهاب مع اللى عند ام كلثوم اكيد حايطلع شىء مبهر وفعلا الصحفيين سموا انت عمرى لقاء السحاب
ومن حسن حظ ام كلثوم ( ومن حسن حظ الجمهور ومن حسن حظ التاريخ ) اقول لك سر خطير ان عبد الوهاب كان من قبلها بوقت بطل غنا بشكل رسمى واتجه الى التلحين فام كلثوم ساعتها ستعتبر تتويجا لحياته العملية فى التلحين ... بمعنى انو لو كان لسه مطرب اعقد كان يخاف يلحن لأم كلثوم لأنها ممكن تاخد جزء من الهالة التى حوله
ولو تلاحظ ان فريد الاطرش الذى استمر مطربا لآخر لحظة فى حياته كان بيتردد يلحن بالذات لأم كلثوم وعبد الحليم علماً بأن كان فيه كلام اتذكر عدة مرات عن تعاون بينهم , لكن فريد لحن لكل المطربين اللى اقل من مكانته هو شخصيا كمطرب
القصص كثيرة والعلم عند الله لكن انا بكتب من منطلق انى كنت بدرس شخصية كل فنان اتعامل معه وخرجت بمعلومة خطيرة ان الذكاء موهبة مهمة جدا جدا للفنان بالإضافة الى مواهبه الفنية
يعنى لو اخذت عبد الحليم ومحمد قنديل كمثال ... قنديل لايقل عن حليم موهبة لكن عبد الحليم اذكى والذكاء هنا بيفتح كل الابواب المغلقة يعنى الملحنين يعطوا احلى ماعندهم للذكى لأنه الطريق الى الذكرى والتاريخ ... واليوم بعد ما مات الجميع بعدة عشرات من السنين ذهب الاشخاص وذهب المال ولكن بقى مانسمعه اليوم .... انت لما تسمع ام كلثوم تقول ياسلام الله يرحمها اد ايه كانت عظيمة ولما تسمع اى مطرب من بتوع اليوم تحس بمدى التفاهة
نسيت اقول حاجة مهمة : ان ام كلثوم كان لازم تتعامل مع ملحنين جدد غير السنباطى لسبب عشان التطور وماتبقاش فى ستايل واحد لأن الستايل الواحد بيبقى بتاع نوع واحد من الجمهور لكن التنويع بيلم حواليها جميع انواع الجمهور مع اختلاف اذواقهم
وعشان كمان ماتجيش سنة 1966 مثلا وتبقى ام كلثوم موضة قديمة وللعلم الخطير ايضا ان ام كلثوم بعد ما غنت للآخرين الحان السنباطى تطورت ايضا
مع اطيب تحياتى عادل صموئيل