[ام مدحت]

ياخوفى ياحمد

بستان حياتى ياحمد
وماحدّش يعرفه
مستنىّ تيجى ياحمد
فى الكوشة تشرفه
عليّا الهجر زاد
واستحملت البعاد يارب ماتنسى ياحمد
وغيرك يقــطفه
,,,,,
مافيش من اهلى واحد
كان يعرف بنـّا ايه
وان جالهم حدّ غيرك
خوفى يوافقوا عليه
والمرّ يزيد عليّه
ولاحدّ يحس بيّه
والسّر يموت معايه
وماحدّش يعرفه
يارب ماتنسى ياحمد
وغيرك يقطفه
,,,,,
ماحدّش من جرانـّا
كان يعرف بيّه ايه
والحب اللى مابنـّا
عمرى ماقولتش عليه
خوفى تزيد الاسيّه
وتبان دمعة عنيّه
والناس ح تحسّ بيّه
وعنيّه حتكشفه
ياخوفى لاتنسى ياحمد
وغيرك يقطفه
,,,,,
من يوم ماوعيت لروحى
وأنا روحى فيك ياغالى
محتارة بين جروحى
وبين سهر الليالى
تعالى وخد عنيّه
ماتشمّتهمش فيّه
حضـّرت الجن ياحمد
وانت اللى ح تصرفه
ياخوفى لاتنسى ياحمد
وغيرك يقطفه