[رائد عبد السلام]

المشاركة الأصلية كتبت بواسطة سعدالشرقاوى

ومات جمال عبدالناصر



ابكى ياطــــــــــير السما كتـّر من الآهات
وارسم لفرخك صورمرسومه ع الجنهات
واطفى يانيل الاسى للارض لمّا اشــتكت
حتى السواقى بكت يوم الزعـــيم ما مات
,,,,,,,,,,
زهزهت الدنيا واحلوّت
ويّاكى يامصر
وانا تحت التوته وباتوضىّ
لصلاة العصر
,,,
وختمت صلاتى وفيه رعشه
بتهزّنى هزّ
لو روحنا تنفـّـد مكتوبنا
ماكانت تـنعـزّ
,,,
ورجعت المغرب من غيطى
مش عارف ليه
مخطوف القلب ومتّاخد
خايف من ايه
,,,
ماقدرش اتعشىّ وانا حاسس
فى دماغى بدق
فيه حاجه غريبه ف احساسى
لو جيت للحق
,,,
وفتحت الراديو اسمع نشره
وغنوة احرار
آهى كات بتريّح اعصابى
وبتطفىّ النار
,,,
فى الراديو ما فيش غير المقرئ
بآيات الله
قرآن وخلاص اىّ محطّه
الصوت هوّاه
,,,
حسّيت وكانّ اكيد حاجه
مداريها الغيب
يالطيف بعبادك ترحمنا
ياسميع يا مجيب
,,,
ساعتين وتلاته وانا ف حاله
والقلب حزين
وسمعت اخيرا صوت (انور)
بيقول عن مين
,,,
بيقول الغالى جمال ودّع
وفارقنا ومات
ولقيتنى ساعتها ف دوّامه
ويّا الاموات
,,,
بقى يعنى يارب بتستكتر
على مصر جمال
سبحانك صاحب ملكوتك
والدنيا زوال
,,,
على جسر الترعه لقيت لمّه
كلهّا نسوان
وكانّ بلدنا كانت تايهه
من غير عنوان
,,,
كات عمّتى خضره بتعدّد
وتقول موّال
خايفين ع الارض لاياخدوها
بعدك ياجمال
,,,
حتىّ الاطفال كانو بيبكوا
مش عارف ليه
ولمحت الصوره المرسومه
على ربع جنيه
,,,
ورايت فى منامى راجل اسود
خد منىّ عيالى
كان ويّاه واحد بيهدّوا
فى السدّ العالى
,,,
دا جمال كان عايش علشانّا
بالناس مهموم
من يوم الثوره لدلوقتى
مارتاح ولا يوم
,,,
حسيت وكانى بقيت فعلا
من بعده يتيم
دا جمال انقذنى وشال راسى
بعد التلطيم
,,,
وفضلت اعدّ ف حسناته
على كل الناس
حسنات لو عايز اكتبها
ولا ميت كرّاس
,,,
ارتاح ياجمال واحنا نكمّل
بقيت المشوار
افكارك عايشه ف افكارنا
ليل ويّا نهار
,,,
وإلي لقاء لمواصلة(حكايات تحت التوته)

مع تحياتى/سعدالشرقاوى


رسمت بريشة

الشاعر الفنان/ رائدعبدالسلام

تسلم إيدك ياعم سعد

قصيدة جميلة ومحسوسة

علي فكرة ياعم سعد لمّا عبد الناصر مات
كنت أنا صغير جداً لكن من كلام المعاصرين له ...
كانوا بيحبوه ..والمحبة من الله
وقصيدتك دليل علي افتتان الناس
بعبد الناصر
ومع إن السادات -الله يرحمه -قدّم لمصر عشر أضعاف
ما قدّمه عبد الناصر ..إلا أن الناس لا تحبه بنفس القدر

تسلم إيدك