[بريكسي فريد]

من كتاب Cheikh Si Hamza Boubakeur
Trois Poètes Algeriens PP 238-239.
قمر الليل للمرحوم عبد الله بن كريو.

قمر الليل خوالفي تتونّس بيه = نلقى فيه أوصاف يرضاهم بالي
يا صاح عندي خليلة تشبه ليه = من مرغوبي فيه سهري يحلا لي
نبات نقسّم في الليالي ننظر ليه = يفرق من بينا الحذار التالي
خايف لا بعض السحابات تغطّيه = إذا غاب ضياه يتغير حالي
يا سايل عن خاطري واش مسهّيه = مع الريم اللّي جلا قلبي جالي
يا تهواسي خاطري واش ينسّيه = وين الطب اللّي يناسب لاعلالي
ضرّ معاشر كبدي و أنا خافيه = صابر للحمّى الشديدة مذا لي
هذا المرسم كانت الخدّاعة فيه = مسبوغة الأنجال خلاّته خالي
يا ما هبّلني جيت للرسم شاكيه = ما جوبني ما سمع لي لسوالي
مرسم ولفي كي خلا و علاه نجيه = نتفكر ما فات يثقب مشعالي
يـا مـرسـولـي سـيـر بجـوابـي و دّيــه = و مـكـّن بـه الـظـريـفــة و اعـنـــي لــــــي
هات اخبار الخير لينا كن نبيه = و المارة اللّي بينّا ورّيها لي
سال على محبوبي قلبي سال عليه = سال عليها سال شطانة حالي
قل لها و علاه محبوبك تنسيه = غيظانة شكيت ما كيشي تسالي
مزّقتِ قلبي بشفرة هضمتيه = يوم فراقك صار لي كالهبالي
خيالك عن ظاهر العين رسمتيه = واين ما صدّيت نلقاه قبالي
قدّاش انْ مرسول لي شقيتيه = كرهوك الحسّاد بغض على جالي
نشرت ثوب المحبّة و طوتيه = واه جديد محبّتك يرجع بالي
ودعتك مفتاح قلبي ضيّعتيه = سمطتي عنّي ايّامي و اشغالي
جرّعتيني مرّ ما كنتش نشتيه = ذقت اصناف الحبّ من دون اجيالي
بعيني كي ننطح المرسم نخطيه = يتفلت منّي الميز و يغدا لي
يتفكر قلبي زمان انْ كنّا فيه = سترونا ليّام و الوقت موالي
ياك حلفت لي يمين و وفيتيه = قلت لي تشتاق ما زال خيالي
صحّ منامك بالوفا كيما شفتيه = تفسيره ما بينّا ظاهر جالي
أنت شفتي ذا المنام أُو فسّرتيه = و علمت بالجايّة قلتها لي
يا عال العليى الباليني تبليه = و اجعل حاله في المحبّة كي حالي
تزيلف قلب الحبيبة تكويه = و تثقب مشعالها كي مشعالي
تديره شطرين عل النص تساويه = قسمة تدّيها و قسمة تبقى لي
باش تشوف الحبّ و تلوم مواليه = تعرف قدّ اللّي صبر كيما حالي
حبّـي عـنـّي جـار مـا طقتشـي نخفـيـه = يـا نـوايــة خـاطـــري هـــــذا حـالــــــي
يضيف المرحوم السي حمزة بو بكر بيتين في اخر القصيدة و يقول هما زيادة عن المرحوم كشر الشعني.
كيف يخطفني حبها نسهى و نتيه = يتفلت مني الميز و يغدى لي
بعيني نصحى المرسم و نخليه = و تتلاطم شور الوعر من تخبالي