يا جريد النخل العالي [الأرشيف] - منتدى سماعي للطرب العربي الأصيل

المساعد الشخصي الرقمي

مشاهدة النسخة كاملة : يا جريد النخل العالي

علاء طه ياسين

16/05/2009, 17h08

أحمد محمد امين

16/05/2009, 17h13

الله ايه الإحساس العالى ده

علاء طه ياسين

16/05/2009, 17h26

أخي أحمد
أشكرك علي تعليقك .. وده بعض مما عندكم من أحاسيس لو عبرت عن حاجة بتعبر عن مشاعر راقية جوه منكم ... وبصراحة الكل هنا بيشجعني وده بيدفعني للاستمرار والتجديد والمحاولات المستميتة إني أكون عند حسن الظن في كتاباتي .. شاكر ليك مرورك وتعليقك ..
علاء
ودي حتة هدية ليك
أول كلامي واستفتاح
والورد للنبي فتاح
وكل أوضة ولها مفتاح
وابعت سلامك يا غريب
اخويا أحمد ويدوم يدوم
انت القمر واحنا النجوم
وانا متشكر علي العموم
وابعت سلامك ياغريب

أحمد محمد امين

16/05/2009, 17h40

وديه منى ياياسين
محبة فى القلب ياغالى
تحية بألف لأ بإتنين
للرقة والذوق العالى

NAHID 76

16/05/2009, 18h10

بسم الله الرحمن الرحيم
يا جريد النخل العالى ميل وأرمى السلام
وأنا بشجع وأرمى الأعجاب بجريد النخل الي ينفع أغنيه فلكولوريه رائعه
الى الامام
تحياتى

علاء طه ياسين

16/05/2009, 18h30

أختي ناهد
بقيت باستني تعليقاتك علي كل غنوة باكتبها بصبر عجيب .. وباعرف ان غنوتي حلوة لما تعلقي عليها .. واستمد من كلماتك فكرة الغنوة اللي جاية ..
فاسمحي لي أرفع لك أحلي التحيات لشخصك الكريم ..
ياسين

يوسف أبوسالم

18/05/2009, 11h38

يا جريد النخل العالي ... ميل وارمي السلام

ف ايديا الناي متجرح ... وانا ويا الشوق باطوّح
والعمر خلاص هيروح ... مش باقي غير أيام
يا جريد النخل العالي ... ميل وارمي السلام

يا صبايا الشط التاني ... شفتوش بنت مواعداني
في عنيها السمر أغاني ... وكلام مش زيه كلام
يا جريد النخل العالي ... ميل وارمي السلام

أخدت وياها قمرنا ... والفرْح المالي ديارنا
بقا بس المر قدرنا ... والحزن ملا الأحلام
يا جريد النخل العالي ... ميل وارمي السلام

علاء ياسين

أخي علاء

لم أستطع قراءة عصفورتك هذه المغردة
إلا وأنا أغنيها أو أنغمها بيني وبين نفسي
ذكرتني بريف مصر وفولوكلوره الحميم
الذي عشنا أجمل فترات عمرنا ونحن نسمعه في الحسين وأيام رمضان وغير رمضان
ذكرتني بالشجى الحزين الذي يقطر من كثير من أغانينا الشعبية الرائعة في مصر المحروسة
ذكرتني ببهية وياسين ,,,وشفيقة ومتولي وأدهم الشرقاوي
وبوهيبة ولقاءها تحت شجرة محمد رشدي
ذكرتني بخضرة الشريفة وتوابعها وزكريا الحجاوي
ذكرتني بأعماقي
فشكرا لك

علاء طه ياسين

18/05/2009, 16h13

أخي يوسف ...
كنا واحنا عيال بنلعب في الجرون ... عارف الجرون ده مكان بيلموا فيه سنابل القمح وعيدان الفول بعد الحصاد ويدرسوها .. ويفصلوا الغلة عن التبن .. فكانوا الناس اللي بيحصدوا واسمهم المقرقرين اسمهم كده يغنوا غناوي جميلة فيها حزن وشجن وفي الليالي اللي تكون فيها القمراية طالعة يقعدوا يحكوا قصص وحواديت ... وكنت أتوه ويا ناعسه الهلالية .. والسفيرة عزيزة وسعدي ومرعي .. وست الحسن والجمال .. ورقص الغوازي .. انا فكرتك بأيامك وانت برضو فكرتني بيها نبقي خالصين يا عم .. بس وعد مني إني هأحاول أكون عند حسن ظنك واستلهم من الفولكلور أحلي الغناوى ..
تسلم أياديك علي تعليقك .. وألف شكر
ياسين

سعدالشرقاوى

19/05/2009, 20h25

يا حبيبى
مهو شوف اما اقول لك
يا تجينى ياتقول لى اروح لك يا تقول اروح منك فين
وزى ما رجعتنا للزمن الجميل اصبحت امامنا مسئول
ان ننعم معك بدسامة المغنى على مائدة الماضى
تسلم ايدك

علاء طه ياسين

19/05/2009, 20h37

عمي الشرقاوي ..
انا مستعد للقوالة .. وشاكر تعليقك الظريف .. وهأسمعك .. ويارب تعجبك قوالتي .. فاكر الغنوة بتاعت عالزراعية يارب اقابل حبيبي .. فاكر الغنوة بتاعت توب الحرير يا زبيدة شبك في النبقة .. فاكر الغناوي دي .. ادعيلي أقدر أستلهمها وأعيد من تاني كتابتها ..
شكرا ليك عمي سعد
علاء

مختار الحسانين

21/05/2009, 16h21

أخى العزيز ، أنت أسلوبك وموسيقاك غاية فى الروعة ، متدفقة بحنية فى قلب كل من يقرأ ، وياريت تكمل ، أنا حاسس أنها ليها بقية فى قلبك ....

يا جريد النخل العالى
كان مالك بس ومالى
أنا كنت ف حالى وخالى
دلوقتى بقيت ما بنام

مجروح والجرح بينزف
وحبيبى تملى بيخلف
مواعيده معايا ويحلف
بكلام مافى زيه كلام

حبيتك والله

علاء طه ياسين

21/05/2009, 20h25

أستاذ مختار
أجمل من اللي انا كتبته .. انت كتبته .. انت قولت اللي كنت عاوز اكتبه ومش عرفت ..
الله عليك
علاء

مختار الحسانين

22/05/2009, 10h44

تعرف يا أستاذ علاء ، أنا بطلت أكتب حتى اللى يجى على بالى ، بقيت أقاوم الكتابة تماما ، اول مرة قابلت فيها شاعر عامية ، قالى يا مختار فيه مسابقة تسمى مسابقة الشباب والعمال لكتابة الشعر والزجل ، قولت ليه هكتب عن مصر حاجة وخدها قدمها ، المهم كان داخل فى المسابقة دى فطاحل الزجل فى مصر ، المهم كتبت قصيدة حتى ايامها قولت لزميلى الدكتور محمد ، اعملها عنوان ، فعمل عنوان باسم ( هوية ) وروحت كتبتها كومبيوتر ، المهم خدها يا سيدى وقدمها ، وانا نسيت الموضوع خالص ، وسافرت ، المهم الشاعر صاحبنا اتصل بى ، وقالى أنت حصلت على المركز الأول على مستوى الجمهورية ، واسمك فى جرنان كذا ، فعلا جبت الجورنان لكى اتأكد .... وفعلا كنت الاول

المهم بعد عودتى للبلد عرفت منه ، انه جالى شيك بمبلغ كويس ، روحت قصر ثقافة المنصورة ، قالولى روح فى الحتة الفلانية ، روحت الحتة الفولانية ، قالولى رجع القاهرة ، فطنشت ولا أخذت حتى الان لا شهادة تقدير ولا الفلوس . ولا اهتمت وزارة الثافة لعدم اهتمامى ...

انا اكتب بالاحتكاك ، وفى اعتقادى أن الاحتكاك بمن هم أحسن منى فى أى مجال يكسبنى معرفة أكثر من القراءة ، فى هذه الحالة ناخد معرفة مقشرة مفهومة ، ناخد خلاصة الخلاصة ، بس المشكلة فى مصر بلدنا ان الانانية وحب الذات وان كل واحد عايز هو بس اللى ينجح رجع بلدنا لورى خالص ، لأنى لما روحت قصور الثقافة لاقيت نوع من الحقد والغباء المتبادل بين المثقفين ، كل مثقف عايز هو يبقى المثقف الوحيد ، فانا سبتها مخضرة .

تعرف يا أستاذ علاء انى قادر على تلخيص اى كتاب فى قصيدة زجلية بحيث ، انا عملت كدا ، ولخصت كتب كتير بقصيدة زجل موسيقية ، ....... وعندى امثلة كتيرة لكدا ........

اسف على الازعاج

علاء طه ياسين

23/05/2009, 10h42

حبيبي وأخويا مختار ..
المهم إنك تسعد نفسك بأشعارك .. انت بتكتب لمتعتك الشخصية أولا ..
أما من ناحية قصور الثقافة ... ونوادي الأدب اللي تشبه بيوت الأدب (وانت فاهمني) ... يحكمها ناس كل همهم مصالحهم بس ... فلوس ومكافآت بتتاخد لزوم الجلسات والبارد والسخن اللي بيتشرب في القعدة ... وكتب ومؤلفات بتتنشر لناس معينة مش ليها لزوم ... ومفيش حد بيقرا ... وربنا يخلي القائمين علي اختيار الكتب ...
في كل مكان الواسطة والمحسوبية حتي في الفن والكورة اللي المفروض إنها مواهب وعطايا من عند ربنا ... واحنا مش عندنا سوق عكاظ لاختيار القصائد الجيدة وتعليقها داخل الكعبة زي المعلقات ... احنا عندنا سوق التلات ... الغناوي زي شوال البصل النتن ... والقصايد مرطرطة الكل بيقلب فيها ومحدش بيشتري .. وفي نهاية سوق التلات فاتحين ورشة للتأليف وسعر النص الواحد ربع جنية .. ولو هتاخد جملة مفيش تكليف ادفع اللي تدفعه ..
اكتب لإسعاد نفسك وبس ... وكفاية علينا كلمتين تشجيع من بعض .. وفي النهاية النت دلوقتي هو مثري الحركة الثقافية .. واحنا كلنا روافد بتصب في نهر واحد ..
ومش تيأس ولا تزعل ... اكتب وانا معاك ... وياريت أشوف قصايدك علي طول ..
علاء